| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. ජලූකඞ්‌ගපඤ්‌හො
8. Jalūkaṅgapañho
8. ‘‘භන්‌තෙ නාගසෙන, ‘ජලූකාය එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, ජලූකා යත්‌ථ අල්‌ලීයති, තත්‌ථෙව දළ්‌හං අල්‌ලීයිත්‌වා රුහිරං පිවති, එවමෙව ඛො, මහාරාජ, යොගිනා යොගාවචරෙන යස්‌මිං ආරම්‌මණෙ චිත්‌තං අල්‌ලීයති, තං ආරම්‌මණං වණ්‌ණතො ච සණ්‌ඨානතො ච දිසතො ච ඔකාසතො ච පරිච්‌ඡෙදතො ච ලිඞ්‌ගතො ච නිමිත්‌තතො ච දළ්‌හං පතිට්‌ඨාපෙත්‌වා තෙනෙවාරම්‌මණෙන විමුත්‌තිරසමසෙචනකං පාතබ්‌බං. ඉදං, මහාරාජ, ජලූකාය එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන අනුරුද්‌ධෙන –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘පරිසුද්‌ධෙන චිත්‌තෙන, ආරම්‌මණෙ පතිට්‌ඨාය;
‘‘‘Parisuddhena cittena, ārammaṇe patiṭṭhāya;
තෙන චිත්‌තෙන පාතබ්‌බං, විමුත්‌තිරසමසෙචන’’’න්‌ති.
Tena cittena pātabbaṃ, vimuttirasamasecana’’’nti.
ජලූකඞ්‌ගපඤ්‌හො අට්‌ඨමො.
Jalūkaṅgapañho aṭṭhamo.
