| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. කලන්‌දකඞ්‌ගපඤ්‌හො
3. Kalandakaṅgapañho
3. ‘‘භන්‌තෙ නාගසෙන, ‘කලන්‌දකස්‌ස එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, කලන්‌දකො පටිසත්‌තුම්‌හි ඔපතන්‌තෙ නඞ්‌ගුට්‌ඨං පප්‌ඵොටෙත්‌වා මහන්‌තං කත්‌වා තෙනෙව නඞ්‌ගුට්‌ඨලගුළෙන පටිසත්‌තුං පටිබාහති, එවමෙව ඛො, මහාරාජ, යොගිනා යොගාවචරෙන කිලෙසසත්‌තුම්‌හි ඔපතන්‌තෙ සතිපට්‌ඨානලගුළං පප්‌ඵොටෙත්‌වා මහන්‌තං කත්‌වා තෙනෙව සතිපට්‌ඨානලගුළෙන සබ්‌බකිලෙසා පටිබාහිතබ්‌බා. ඉදං, මහාරාජ, කලන්‌දකස්‌ස එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන චූළපන්‌ථකෙන –
3. ‘‘Bhante nāgasena, ‘kalandakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kalandako paṭisattumhi opatante naṅguṭṭhaṃ papphoṭetvā mahantaṃ katvā teneva naṅguṭṭhalaguḷena paṭisattuṃ paṭibāhati, evameva kho, mahārāja, yoginā yogāvacarena kilesasattumhi opatante satipaṭṭhānalaguḷaṃ papphoṭetvā mahantaṃ katvā teneva satipaṭṭhānalaguḷena sabbakilesā paṭibāhitabbā. Idaṃ, mahārāja, kalandakassa ekaṃ aṅgaṃ gahetabbaṃ. Bhāsitampetaṃ, mahārāja, therena cūḷapanthakena –
‘යදා කිලෙසා ඔපතන්‌ති, සාමඤ්‌ඤගුණධංසනා;
‘Yadā kilesā opatanti, sāmaññaguṇadhaṃsanā;
සතිපට්‌ඨානලගුළෙන, හන්‌තබ්‌බා තෙ පුනප්‌පුන’’’න්‌ති.
Satipaṭṭhānalaguḷena, hantabbā te punappuna’’’nti.
කලන්‌දකඞ්‌ගපඤ්‌හො තතියො.
Kalandakaṅgapañho tatiyo.
