Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၁. ကာလတ္တယအနတ္တသုတ္တံ
11. Kālattayaanattasuttaṃ
၁၁. သာဝတ္ထိနိဒာနံ ။ ‘‘ရူပံ, ဘိက္ခဝေ, အနတ္တာ အတီတာနာဂတံ; ကော ပန ဝာဒော ပစ္စုပ္ပန္နသ္သ! ဧဝံ ပသ္သံ, ဘိက္ခဝေ, သုတဝာ အရိယသာဝကော အတီတသ္မိံ ရူပသ္မိံ အနပေက္ခော ဟောတိ; အနာဂတံ ရူပံ နာဘိနန္ဒတိ; ပစ္စုပ္ပန္နသ္သ ရူပသ္သ နိဗ္ဗိဒာယ ဝိရာဂာယ နိရောဓာယ ပဋိပန္နော ဟောတိ။ ဝေဒနာ အနတ္တာ။ သညာ အနတ္တာ။ သင္ခာရာ အနတ္တာ။ ဝိညာဏံ အနတ္တာ အတီတာနာဂတံ; ကော ပန ဝာဒော ပစ္စုပ္ပန္နသ္သ! ဧဝံ ပသ္သံ, ဘိက္ခဝေ, သုတဝာ အရိယသာဝကော အတီတသ္မိံ ဝိညာဏသ္မိံ အနပေက္ခော ဟောတိ; အနာဂတံ ဝိညာဏံ နာဘိနန္ဒတိ; ပစ္စုပ္ပန္နသ္သ ဝိညာဏသ္သ နိဗ္ဗိဒာယ ဝိရာဂာယ နိရောဓာယ ပဋိပန္နော ဟောတီ’’တိ။ ဧကာဒသမံ။
11. Sāvatthinidānaṃ . ‘‘Rūpaṃ, bhikkhave, anattā atītānāgataṃ; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ rūpasmiṃ anapekkho hoti; anāgataṃ rūpaṃ nābhinandati; paccuppannassa rūpassa nibbidāya virāgāya nirodhāya paṭipanno hoti. Vedanā anattā… saññā anattā… saṅkhārā anattā… viññāṇaṃ anattā atītānāgataṃ; ko pana vādo paccuppannassa! Evaṃ passaṃ, bhikkhave, sutavā ariyasāvako atītasmiṃ viññāṇasmiṃ anapekkho hoti; anāgataṃ viññāṇaṃ nābhinandati; paccuppannassa viññāṇassa nibbidāya virāgāya nirodhāya paṭipanno hotī’’ti. Ekādasamaṃ.
နကုလပိတုဝဂ္ဂော ပဌမော။
Nakulapituvaggo paṭhamo.
တသ္သုဒ္ဒာနံ –
Tassuddānaṃ –
နကုလပိတာ ဒေဝဒဟာ၊ ဒ္ဝေပိ ဟာလိဒ္ဒိကာနိ စ။
Nakulapitā devadahā, dvepi hāliddikāni ca;
သမာဓိပဋိသလ္လာဏာ၊ ဥပာဒာပရိတသ္သနာ ဒုဝေ။
Samādhipaṭisallāṇā, upādāparitassanā duve;
အတီတာနာဂတပစ္စုပ္ပန္နာ၊ ဝဂ္ဂော တေန ပဝုစ္စတိ။
Atītānāgatapaccuppannā, vaggo tena pavuccati.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀-၁၁. ကာလတ္တယဒုက္ခသုတ္တာဒိဝဏ္ဏနာ • 10-11. Kālattayadukkhasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀-၁၁. ကာလတ္တယဒုက္ခသုတ္တာဒိဝဏ္ဏနာ • 10-11. Kālattayadukkhasuttādivaṇṇanā