| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၂. ကဏ္ဋကသုတ္တံ
2. Kaṇṭakasuttaṃ
၇၂. ဧကံ သမယံ ဘဂဝာ ဝေသာလိယံ ဝိဟရတိ မဟာဝနေ ကူဋာဂာရသာလာယံ သမ္ဗဟုလေဟိ အဘိညာတေဟိ အဘိညာတေဟိ ထေရေဟိ သာဝကေဟိ သဒ္ဓိံ – အာယသ္မတာ စ စာလေန 1, အာယသ္မတာ စ ဥပစာလေန 2, အာယသ္မတာ စ ကုက္ကုဋေန 3, အာယသ္မတာ စ ကဠိမ္ဘေန 4, အာယသ္မတာ စ နိကဋေန 5, အာယသ္မတာ စ ကဋိသ္သဟေန; အညေဟိ စ အဘိညာတေဟိ အဘိညာတေဟိ ထေရေဟိ သာဝကေဟိ သဒ္ဓိံ။
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
တေန ခော ပန သမယေန သမ္ဗဟုလာ အဘိညာတာ အဘိညာတာ လိစ္ဆဝီ ဘဒ္ရေဟိ ဘဒ္ရေဟိ ယာနေဟိ ပရပုရာယ 11 ဥစ္စာသဒ္ဒာ မဟာသဒ္ဒာ မဟာဝနံ အဇ္ဈောဂာဟန္တိ ဘဂဝန္တံ ဒသ္သနာယ။ အထ ခော တေသံ အာယသ္မန္တာနံ ဧတဒဟောသိ – ‘‘ဣမေ ခော သမ္ဗဟုလာ အဘိညာတာ အဘိညာတာ လိစ္ဆဝီ ဘဒ္ရေဟိ ဘဒ္ရေဟိ ယာနေဟိ ပရပုရာယ ဥစ္စာသဒ္ဒာ မဟာသဒ္ဒာ မဟာဝနံ အဇ္ဈောဂာဟန္တိ ဘဂဝန္တံ ဒသ္သနာယ။ ‘သဒ္ဒကဏ္ဋကာ ခော ပန ဈာနာ’ ဝုတ္တာ ဘဂဝတာ။ ယံနူန မယံ ယေန ဂောသိင္ဂသာလဝနဒာယော တေနုပသင္ကမေယ္ယာမ ။ တတ္ထ မယံ အပ္ပသဒ္ဒာ အပ္ပာကိဏ္ဏာ ဖာသုံ 12 ဝိဟရေယ္ယာမာ’’တိ။ အထ ခော တေ အာယသ္မန္တော ယေန ဂောသိင္ဂသာလဝနဒာယော တေနုပသင္ကမိံသု; တတ္ထ တေ အာယသ္မန္တော အပ္ပသဒ္ဒာ အပ္ပာကိဏ္ဏာ ဖာသုံ ဝိဟရန္တိ။
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
အထ ခော ဘဂဝာ ဘိက္ခူ အာမန္တေသိ – ‘‘ကဟံ နု ခော, ဘိက္ခဝေ, စာလော, ကဟံ ဥပစာလော, ကဟံ ကုက္ကုဋော, ကဟံ ကဠိမ္ဘော, ကဟံ နိကဋော, ကဟံ ကဋိသ္သဟော; ကဟံ နု ခော တေ, ဘိက္ခဝေ, ထေရာ သာဝကာ ဂတာ’’တိ?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ဣဓ, ဘန္တေ, တေသံ အာယသ္မန္တာနံ ဧတဒဟောသိ – ‘ဣမေ ခော သမ္ဗဟုလာ အဘိညာတာ အဘိညာတာ လိစ္ဆဝီ ဘဒ္ရေဟိ ဘဒ္ရေဟိ ယာနေဟိ ပရပုရာယ ဥစ္စာသဒ္ဒာ မဟာသဒ္ဒာ မဟာဝနံ အဇ္ဈောဂာဟန္တိ ဘဂဝန္တံ ဒသ္သနာယ ‘သဒ္ဒကဏ္ဋကာ ခော ပန ဈာနာဝုတ္တာ ဘဂဝတာ ယံနူန မယံ ယေန ဂောသိင္ဂသာလဝနဒာယော တေနုပသင္ကမေယ္ယာမ တတ္ထ မယံ အပ္ပသဒ္ဒာ အပ္ပာကိဏ္ဏာ ဖာသုံ ဝိဟရေယ္ယာမာ’တိ။ အထ ခော တေ, ဘန္တေ, အာယသ္မန္တော ယေန ဂောသိင္ဂသာလဝနဒာယော တေနုပသင္ကမိံသု။ တတ္ထ တေ အာယသ္မန္တော အပ္ပသဒ္ဒာ အပ္ပာကိဏ္ဏာ ဖာသုံ ဝိဟရန္တီ’’တိ ။
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘သာဓု သာဓု, ဘိက္ခဝေ, ယထာ တေ မဟာသာဝကာ သမ္မာ ဗ္ယာကရမာနာ ဗ္ယာကရေယ္ယုံ, ‘သဒ္ဒကဏ္ဋကာ ဟိ, ဘိက္ခဝေ, ဈာနာ’ ဝုတ္တာ မယာ။
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘ဒသယိမေ, ဘိက္ခဝေ, ကဏ္ဋကာ။ ကတမေ ဒသ? ပဝိဝေကာရာမသ္သ သင္ဂဏိကာရာမတာ ကဏ္ဋကော, အသုဘနိမိတ္တာနုယောဂံ အနုယုတ္တသ္သ သုဘနိမိတ္တာနုယောဂော ကဏ္ဋကော, ဣန္ဒ္ရိယေသု ဂုတ္တဒ္ဝာရသ္သ ဝိသူကဒသ္သနံ ကဏ္ဋကော, ဗ္ရဟ္မစရိယသ္သ မာတုဂာမူပစာရော 15 ကဏ္ဋကော, 16 ပဌမသ္သ ဈာနသ္သ သဒ္ဒော ကဏ္ဋကော, ဒုတိယသ္သ ဈာနသ္သ ဝိတက္ကဝိစာရာ ကဏ္ဋကာ, တတိယသ္သ ဈာနသ္သ ပီတိ ကဏ္ဋကော, စတုတ္ထသ္သ ဈာနသ္သ အသ္သာသပသ္သာသော ကဏ္ဋကော, သညာဝေဒယိတနိရောဓသမာပတ္တိယာ သညာ စ ဝေဒနာ စ ကဏ္ဋကော ရာဂော ကဏ္ဋကော ဒောသော ကဏ္ဋကော မောဟော ကဏ္ဋကော။
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘အကဏ္ဋကာ , ဘိက္ခဝေ, ဝိဟရထ။ နိက္ကဏ္ဋကာ, ဘိက္ခဝေ, ဝိဟရထ။ အကဏ္ဋကနိက္ကဏ္ဋကာ, ဘိက္ခဝေ, ဝိဟရထ။ အကဏ္ဋကာ, ဘိက္ခဝေ, အရဟန္တော; နိက္ကဏ္ဋကာ, ဘိက္ခဝေ, အရဟန္တော; အကဏ္ဋကနိက္ကဏ္ဋကာ, ဘိက္ခဝေ, အရဟန္တော’’တိ။ ဒုတိယံ။
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. ကဏ္ဋကသုတ္တဝဏ္ဏနာ • 2. Kaṇṭakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄. အာကင္ခသုတ္တာဒိဝဏ္ဏနာ • 1-4. Ākaṅkhasuttādivaṇṇanā
