Library / Tipiṭaka / තිපිටක • Tipiṭaka / විනයවිනිච්ඡය-උත්තරවිනිච්ඡය • Vinayavinicchaya-uttaravinicchaya |
කථිනක්ඛන්ධකකථා
Kathinakkhandhakakathā
2697.
2697.
භික්ඛූනං වුට්ඨවස්සානං, කථිනත්ථාරමබ්රවි;
Bhikkhūnaṃ vuṭṭhavassānaṃ, kathinatthāramabravi;
පඤ්චන්නං ආනිසංසානං, කාරණා මුනිපුඞ්ගවො.
Pañcannaṃ ānisaṃsānaṃ, kāraṇā munipuṅgavo.
2698.
2698.
න උල්ලිඛිතමත්තාදි-චතුවීසතිවජ්ජිතං;
Na ullikhitamattādi-catuvīsativajjitaṃ;
චීවරං භික්ඛුනාදාය, උද්ධරිත්වා පුරාණකං.
Cīvaraṃ bhikkhunādāya, uddharitvā purāṇakaṃ.
2699.
2699.
නවං අධිට්ඨහිත්වාව, වත්තබ්බං වචසා පුන;
Navaṃ adhiṭṭhahitvāva, vattabbaṃ vacasā puna;
‘‘ඉමිනාන්තරවාසෙන, කථිනං අත්ථරාමි’’ති.
‘‘Imināntaravāsena, kathinaṃ attharāmi’’ti.
2700.
2700.
වුත්තෙ තික්ඛත්තුමිච්චෙවං, කථිනං හොති අත්ථතං;
Vutte tikkhattumiccevaṃ, kathinaṃ hoti atthataṃ;
සඞ්ඝං පනුපසඞ්කම්ම, ආදාය කථිනං ඉති.
Saṅghaṃ panupasaṅkamma, ādāya kathinaṃ iti.
2701.
2701.
‘‘අත්ථතං කථිනං භන්තෙ, සඞ්ඝස්ස අනුමොදථ;
‘‘Atthataṃ kathinaṃ bhante, saṅghassa anumodatha;
ධම්මිකො කථිනත්ථාරො’’, වත්තබ්බං තෙන භික්ඛුනා.
Dhammiko kathinatthāro’’, vattabbaṃ tena bhikkhunā.
2702.
2702.
‘‘සුඅත්ථතං තයා භන්තෙ, සඞ්ඝස්ස කථිනං පුන;
‘‘Suatthataṃ tayā bhante, saṅghassa kathinaṃ puna;
ධම්මිකො කථිනත්ථාරො, අනුමොදාමි’’තීරයෙ.
Dhammiko kathinatthāro, anumodāmi’’tīraye.
2703.
2703.
කථිනස්ස ච කිං මූලං, කිං වත්ථු කා ච භූමියො;
Kathinassa ca kiṃ mūlaṃ, kiṃ vatthu kā ca bhūmiyo;
කතිධම්මවිදො භික්ඛු, කථිනත්ථාරමරහති.
Katidhammavido bhikkhu, kathinatthāramarahati.
2704.
2704.
මූලමෙකං, සියා වත්ථු, තිවිධං, භූමියො ඡ ච;
Mūlamekaṃ, siyā vatthu, tividhaṃ, bhūmiyo cha ca;
අට්ඨධම්මවිදො භික්ඛු, කථිනත්ථාරමරහති.
Aṭṭhadhammavido bhikkhu, kathinatthāramarahati.
2705.
2705.
සඞ්ඝො මූලන්ති නිද්දිට්ඨං, වත්ථු හොති තිචීවරං;
Saṅgho mūlanti niddiṭṭhaṃ, vatthu hoti ticīvaraṃ;
ඛොමාදීනි ඡ වුත්තානි, චීවරානි ඡ භූමියො.
Khomādīni cha vuttāni, cīvarāni cha bhūmiyo.
2706.
2706.
පුබ්බපච්චුද්ධරාධිට්ඨා-නත්ථාරො මාතිකාපි ච;
Pubbapaccuddharādhiṭṭhā-natthāro mātikāpi ca;
පලිබොධො ච උද්ධාරො, ආනිසංසා පනට්ඨිමෙ.
Palibodho ca uddhāro, ānisaṃsā panaṭṭhime.
2707.
2707.
ධොවනඤ්ච විචාරො ච, ඡෙදනං බන්ධනම්පි ච;
Dhovanañca vicāro ca, chedanaṃ bandhanampi ca;
සිබ්බනං රජනං කප්පං, ‘‘පුබ්බකිච්ච’’න්ති වුච්චති.
Sibbanaṃ rajanaṃ kappaṃ, ‘‘pubbakicca’’nti vuccati.
2708.
2708.
සඞ්ඝාටි උත්තරාසඞ්ගො, අථො අන්තරවාසකො;
Saṅghāṭi uttarāsaṅgo, atho antaravāsako;
පච්චුද්ධාරො අධිට්ඨානං, අත්ථාරොපෙසමෙව තු.
Paccuddhāro adhiṭṭhānaṃ, atthāropesameva tu.
2709.
2709.
පක්කමනඤ්ච නිට්ඨානං, සන්නිට්ඨානඤ්ච නාසනං;
Pakkamanañca niṭṭhānaṃ, sanniṭṭhānañca nāsanaṃ;
සවනාසා ච සීමා ච, සහුබ්භාරොති අට්ඨිමා.
Savanāsā ca sīmā ca, sahubbhāroti aṭṭhimā.
2710.
2710.
කතචීවරමාදාය, ආවාසෙ නිරපෙක්ඛකො;
Katacīvaramādāya, āvāse nirapekkhako;
අතික්කන්තාය සීමාය, හොති පක්කමනන්තිකා.
Atikkantāya sīmāya, hoti pakkamanantikā.
2711.
2711.
ආනිසංසමථාදාය, විහාරෙ අනපෙක්ඛකො;
Ānisaṃsamathādāya, vihāre anapekkhako;
ගන්ත්වා පන විහාරං සො, අඤ්ඤං සුඛවිහාරිකං.
Gantvā pana vihāraṃ so, aññaṃ sukhavihārikaṃ.
2712.
2712.
තත්ථ තං විහරන්තොව, කරොති යදි චීවරං;
Tattha taṃ viharantova, karoti yadi cīvaraṃ;
නිට්ඨිතෙ චීවරෙ තස්මිං, නිට්ඨානන්තාති වුච්චති.
Niṭṭhite cīvare tasmiṃ, niṭṭhānantāti vuccati.
2713.
2713.
‘‘චීවරං න කරිස්සාමි, න පච්චෙස්සං තමස්සමං’’;
‘‘Cīvaraṃ na karissāmi, na paccessaṃ tamassamaṃ’’;
එවං තු ධුරනික්ඛෙපෙ, සන්නිට්ඨානන්තිකා මතා.
Evaṃ tu dhuranikkhepe, sanniṭṭhānantikā matā.
2714.
2714.
කථිනච්ඡාදනං ලද්ධා, ‘‘න පච්චෙස්ස’’න්ති චෙ ගතො;
Kathinacchādanaṃ laddhā, ‘‘na paccessa’’nti ce gato;
කරොන්තස්සෙව නට්ඨං වා, දඩ්ඪං වා නාසනන්තිකා.
Karontasseva naṭṭhaṃ vā, daḍḍhaṃ vā nāsanantikā.
2715.
2715.
ලද්ධානිසංසො සාපෙක්ඛො, බහිසීමං ගතො පන;
Laddhānisaṃso sāpekkho, bahisīmaṃ gato pana;
සුණාති චන්තරුබ්භාරං, සා හොති සවනන්තිකා.
Suṇāti cantarubbhāraṃ, sā hoti savanantikā.
2716.
2716.
චීවරාසාය පක්කන්තො, බහිසීමං ගතො පන;
Cīvarāsāya pakkanto, bahisīmaṃ gato pana;
‘‘දස්සාමි චීවරං තුය්හං’’, වුත්තො සවති කෙනචි.
‘‘Dassāmi cīvaraṃ tuyhaṃ’’, vutto savati kenaci.
2717.
2717.
පුන වුත්තෙ ‘‘න සක්කොමි, දාතුන්ති තව චීවරං’’;
Puna vutte ‘‘na sakkomi, dātunti tava cīvaraṃ’’;
ආසාය ඡින්නමත්තාය, ආසාවච්ඡෙදිකා මතා.
Āsāya chinnamattāya, āsāvacchedikā matā.
2718.
2718.
වස්සංවුට්ඨවිහාරම්හා , විහාරඤ්ඤං ගතො සියා;
Vassaṃvuṭṭhavihāramhā , vihāraññaṃ gato siyā;
ආගච්ඡං අන්තරාමග්ගෙ, තදුද්ධාරමතික්කමෙ.
Āgacchaṃ antarāmagge, taduddhāramatikkame.
2719.
2719.
තස්ස සො කථිනුද්ධාරො, සීමාතික්කන්තිකො මතො;
Tassa so kathinuddhāro, sīmātikkantiko mato;
කථිනානිසංසමාදාය, සාපෙක්ඛොව සචෙ ගතො.
Kathinānisaṃsamādāya, sāpekkhova sace gato.
2720.
2720.
සම්භුණාති පුනාගන්ත්වා, කථිනුද්ධාරමෙව චෙ;
Sambhuṇāti punāgantvā, kathinuddhārameva ce;
තස්ස සො කථිනුද්ධාරො, ‘‘සහුබ්භාරො’’ති වුච්චති.
Tassa so kathinuddhāro, ‘‘sahubbhāro’’ti vuccati.
2721.
2721.
පක්කමනඤ්ච නිට්ඨානං, සන්නිට්ඨානඤ්ච සීමතො;
Pakkamanañca niṭṭhānaṃ, sanniṭṭhānañca sīmato;
චත්තාරො පුග්ගලාධීනා, සඞ්ඝාධීනන්තරුබ්භරො.
Cattāro puggalādhīnā, saṅghādhīnantarubbharo.
2722.
2722.
නාසනං සවනඤ්චෙව, ආසාවච්ඡෙදිකාපි ච;
Nāsanaṃ savanañceva, āsāvacchedikāpi ca;
තයොපි කථිනුබ්භාරා, න තු සඞ්ඝා, න භික්ඛුතො.
Tayopi kathinubbhārā, na tu saṅghā, na bhikkhuto.
2723.
2723.
ආවාසපලිබොධො ච, පලිබොධො ච චීවරෙ;
Āvāsapalibodho ca, palibodho ca cīvare;
පලිබොධා දුවෙ වුත්තා, යුත්තමුත්තත්ථවාදිනා.
Palibodhā duve vuttā, yuttamuttatthavādinā.
2724.
2724.
අට්ඨන්නං මාතිකානං වා, අන්තරුබ්භාරතොපි වා;
Aṭṭhannaṃ mātikānaṃ vā, antarubbhāratopi vā;
උබ්භාරාපි දුවෙ වුත්තා, කථිනස්ස මහෙසිනා.
Ubbhārāpi duve vuttā, kathinassa mahesinā.
2725.
2725.
අනාමන්තාසමාදානං, ගණතො යාවදත්ථිකං;
Anāmantāsamādānaṃ, gaṇato yāvadatthikaṃ;
තත්ථ යො චීවරුප්පාදො, ආනිසංසා ච පඤ්චිමෙ.
Tattha yo cīvaruppādo, ānisaṃsā ca pañcime.
කථිනක්ඛන්ධකකථා.
Kathinakkhandhakakathā.