| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၉. ကာယဂတာသတိဝဂ္ဂော
19. Kāyagatāsativaggo
၅၆၃. ‘‘ယသ္သ ကသ္သစိ, ဘိက္ခဝေ, မဟာသမုဒ္ဒော စေတသာ ဖုဋော အန္တောဂဓာ တသ္သ ကုန္နဒိယော ယာ ကာစိ သမုဒ္ဒင္ဂမာ; ဧဝမေဝံ, ဘိက္ခဝေ, ယသ္သ ကသ္သစိ ကာယဂတာ သတိ ဘာဝိတာ ဗဟုလီကတာ အန္တောဂဓာ တသ္သ ကုသလာ ဓမ္မာ ယေ ကေစိ ဝိဇ္ဇာဘာဂိယာ’’တိ။
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
၅၆၄-၅၇၀. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော မဟတော သံဝေဂာယ သံဝတ္တတိ။ မဟတော အတ္ထာယ သံဝတ္တတိ။ မဟတော ယောဂက္ခေမာယ သံဝတ္တတိ။ သတိသမ္ပဇညာယ သံဝတ္တတိ။ ဉာဏဒသ္သနပ္ပဋိလာဘာယ သံဝတ္တတိ။ ဒိဋ္ဌဓမ္မသုခဝိဟာရာယ သံဝတ္တတိ။ ဝိဇ္ဇာဝိမုတ္တိဖလသစ္ဆိကိရိယာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခော, ဘိက္ခဝေ, ဧကဓမ္မော ဘာဝိတော ဗဟုလီကတော မဟတော သံဝေဂာယ သံဝတ္တတိ။ မဟတော အတ္ထာယ သံဝတ္တတိ။ မဟတော ယောဂက္ခေမာယ သံဝတ္တတိ။ သတိသမ္ပဇညာယ သံဝတ္တတိ။ ဉာဏဒသ္သနပ္ပဋိလာဘာယ သံဝတ္တတိ။ ဒိဋ္ဌဓမ္မသုခဝိဟာရာယ သံဝတ္တတိ။ ဝိဇ္ဇာဝိမုတ္တိဖလသစ္ဆိကိရိယာယ သံဝတ္တတီ’’တိ။
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
၅၇၁. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ ကာယောပိ ပသ္သမ္ဘတိ, စိတ္တမ္ပိ ပသ္သမ္ဘတိ, ဝိတက္ကဝိစာရာပိ ဝူပသမ္မန္တိ, ကေဝလာပိ ဝိဇ္ဇာဘာဂိယာ ဓမ္မာ ဘာဝနာပာရိပူရိံ ဂစ္ဆန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခော, ဘိက္ခဝေ, ဧကဓမ္မေ ဘာဝိတေ ဗဟုလီကတေ ကာယောပိ ပသ္သမ္ဘတိ, စိတ္တမ္ပိ ပသ္သမ္ဘတိ, ဝိတက္ကဝိစာရာပိ ဝူပသမ္မန္တိ, ကေဝလာပိ ဝိဇ္ဇာဘာဂိယာ ဓမ္မာ ဘာဝနာပာရိပူရိံ ဂစ္ဆန္တီ’’တိ။
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
၅၇၂. ‘‘ဧကဓမ္မေ, ဘိက္ခဝေ, ဘာဝိတေ ဗဟုလီကတေ အနုပ္ပန္နာ စေဝ အကုသလာ ဓမ္မာ နုပ္ပဇ္ဇန္တိ, ဥပ္ပန္နာ စ အကုသလာ ဓမ္မာ ပဟီယန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခော, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနုပ္ပန္နာ စေဝ အကုသလာ ဓမ္မာ နုပ္ပဇ္ဇန္တိ, ဥပ္ပန္နာ စ အကုသလာ ဓမ္မာ ပဟီယန္တီ’’တိ။
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
၅၇၃. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ, ဥပ္ပန္နာ စ ကုသလာ ဓမ္မာ ဘိယ္ယောဘာဝာယ ဝေပုလ္လာယ သံဝတ္တန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခော, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ, ဥပ္ပန္နာ စ ကုသလာ ဓမ္မာ ဘိယ္ယောဘာဝာယ ဝေပုလ္လာယ သံဝတ္တန္တီ’’တိ။
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
၅၇၄. ‘‘ဧကဓမ္မေ, ဘိက္ခဝေ, ဘာဝိတေ ဗဟုလီကတေ အဝိဇ္ဇာ ပဟီယတိ, ဝိဇ္ဇာ ဥပ္ပဇ္ဇတိ, အသ္မိမာနော ပဟီယတိ, အနုသယာ သမုဂ္ဃာတံ ဂစ္ဆန္တိ, သံယောဇနာ ပဟီယန္တိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခော, ဘိက္ခဝေ, ဧကဓမ္မေ ဘာဝိတေ ဗဟုလီကတေ အဝိဇ္ဇာ ပဟီယတိ, ဝိဇ္ဇာ ဥပ္ပဇ္ဇတိ, အသ္မိမာနော ပဟီယတိ, အနုသယာ သမုဂ္ဃာတံ ဂစ္ဆန္တိ, သံယောဇနာ ပဟီယန္တီ’’တိ။
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
၅၇၅-၅၇၆. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော ပညာပဘေဒာယ သံဝတ္တတိ။ အနုပာဒာပရိနိဗ္ဗာနာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခော, ဘိက္ခဝေ, ဧကဓမ္မော ဘာဝိတော ဗဟုလီကတော ပညာပဘေဒာယ သံဝတ္တတိ။ အနုပာဒာပရိနိဗ္ဗာနာယ သံဝတ္တတီ’’တိ။
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
၅၇၇-၅၇၉. ‘‘ဧကဓမ္မေ , ဘိက္ခဝေ, ဘာဝိတေ ဗဟုလီကတေ အနေကဓာတုပဋိဝေဓော ဟောတိ။ နာနာဓာတုပဋိဝေဓော ဟောတိ။ အနေကဓာတုပဋိသမ္ဘိဒာ ဟောတိ။ ကတမသ္မိံ ဧကဓမ္မေ? ကာယဂတာယ သတိယာ။ ဣမသ္မိံ ခော, ဘိက္ခဝေ, ဧကဓမ္မေ ဘာဝိတေ ဗဟုလီကတေ အနေကဓာတုပဋိဝေဓော ဟောတိ။ နာနာဓာတုပဋိဝေဓော ဟောတိ။ အနေကဓာတုပဋိသမ္ဘိဒာ ဟောတီ’’တိ။
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
၅၈၀-၅၈၃. ‘‘ဧကဓမ္မော, ဘိက္ခဝေ, ဘာဝိတော ဗဟုလီကတော သောတာပတ္တိဖလသစ္ဆိကိရိယာယ သံဝတ္တတိ။ သကဒာဂာမိဖလသစ္ဆိကိရိယာယ သံဝတ္တတိ။ အနာဂာမိဖလသစ္ဆိကိရိယာယ သံဝတ္တတိ။ အရဟတ္တဖလသစ္ဆိကိရိယာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခော, ဘိက္ခဝေ, ဧကဓမ္မော ဘာဝိတော ဗဟုလီကတော သောတာပတ္တိဖလသစ္ဆိကိရိယာယ သံဝတ္တတိ။ သကဒာဂာမိဖလသစ္ဆိကိရိယာယ သံဝတ္တတိ။ အနာဂာမိဖလသစ္ဆိကိရိယာယ သံဝတ္တတိ။ အရဟတ္တဖလသစ္ဆိကိရိယာယ သံဝတ္တတီ’’တိ။
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
၅၈၄-၅၉၉. ‘‘ဧကဓမ္မော , ဘိက္ခဝေ, ဘာဝိတော ဗဟုလီကတော ပညာပဋိလာဘာယ သံဝတ္တတိ။ ပညာဝုဒ္ဓိယာ သံဝတ္တတိ။ ပညာဝေပုလ္လာယ သံဝတ္တတိ။ မဟာပညတာယ သံဝတ္တတိ။ ပုထုပညတာယ သံဝတ္တတိ။ ဝိပုလပညတာယ သံဝတ္တတိ။ ဂမ္ဘီရပညတာယ သံဝတ္တတိ။ အသာမန္တပညတာယ 1 သံဝတ္တတိ။ ဘူရိပညတာယ သံဝတ္တတိ။ ပညာဗာဟုလ္လာယ သံဝတ္တတိ။ သီဃပညတာယ သံဝတ္တတိ။ လဟုပညတာယ သံဝတ္တတိ။ ဟာသပညတာယ 2 သံဝတ္တတိ။ ဇဝနပညတာယ သံဝတ္တတိ။ တိက္ခပညတာယ သံဝတ္တတိ။ နိဗ္ဗေဓိကပညတာယ သံဝတ္တတိ။ ကတမော ဧကဓမ္မော? ကာယဂတာ သတိ။ အယံ ခော, ဘိက္ခဝေ, ဧကဓမ္မော ဘာဝိတော ဗဟုလီကတော ပညာပဋိလာဘာယ သံဝတ္တတိ။ ပညာဝုဒ္ဓိယာ သံဝတ္တတိ။ ပညာဝေပုလ္လာယ သံဝတ္တတိ။ မဟာပညတာယ သံဝတ္တတိ။ ပုထုပညတာယ သံဝတ္တတိ။ ဝိပုလပညတာယ သံဝတ္တတိ။ ဂမ္ဘီရပညတာယ သံဝတ္တတိ။ အသာမန္တပညတာယ သံဝတ္တတိ။ ဘူရိပညတာယ သံဝတ္တတိ။ ပညာဗာဟုလ္လာယ သံဝတ္တတိ။ သီဃပညတာယ သံဝတ္တတိ။ လဟုပညတာယ သံဝတ္တတိ။ ဟာသပညတာယ သံဝတ္တတိ။ ဇဝနပညတာယ သံဝတ္တတိ။ တိက္ခပညတာယ သံဝတ္တတိ။ နိဗ္ဗေဓိကပညတာယ သံဝတ္တတီ’’တိ။
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
ကာယဂတာသတိဝဂ္ဂော ဧကူနဝီသတိမော။
Kāyagatāsativaggo ekūnavīsatimo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၉. ကာယဂတာသတိဝဂ္ဂဝဏ္ဏနာ • 19. Kāyagatāsativaggavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၉. ကာယဂတာသတိဝဂ္ဂဝဏ္ဏနာ • 19. Kāyagatāsativaggavaṇṇanā
