Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya

    ၅. ကေသကမ္ဗလသုတ္တံ

    5. Kesakambalasuttaṃ

    ၁၃၈. ‘‘သေယ္ယထာပိ, ဘိက္ခဝေ, ယာနိ ကာနိစိ တန္တာဝုတာနံ ဝတ္ထာနံ, ကေသကမ္ဗလော တေသံ ပဋိကိဋ္ဌော အက္ခာယတိ။ ကေသကမ္ဗလော, ဘိက္ခဝေ, သီတေ သီတော, ဥဏ္ဟေ ဥဏ္ဟော, ဒုဗ္ဗဏ္ဏော, ဒုဂ္ဂန္ဓော, ဒုက္ခသမ္ဖသ္သော။ ဧဝမေဝံ ခော, ဘိက္ခဝေ, ယာနိ ကာနိစိ ပုထုသမဏဗ္ရာဟ္မဏဝာဒာနံ 1 မက္ခလိဝာဒော တေသံ ပဋိကိဋ္ဌော အက္ခာယတိ။

    138. ‘‘Seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso. Evamevaṃ kho, bhikkhave, yāni kānici puthusamaṇabrāhmaṇavādānaṃ 2 makkhalivādo tesaṃ paṭikiṭṭho akkhāyati.

    ‘‘မက္ခလိ, ဘိက္ခဝေ, မောဃပုရိသော ဧဝံဝာဒီ ဧဝံဒိဋ္ဌိ – ‘နတ္ထိ ကမ္မံ, နတ္ထိ ကိရိယံ, နတ္ထိ ဝီရိယ’န္တိ။ ယေပိ တေ, ဘိက္ခဝေ, အဟေသုံ အတီတမဒ္ဓာနံ အရဟန္တော သမ္မာသမ္ဗုဒ္ဓာ, တေပိ ဘဂဝန္တော ကမ္မဝာဒာ စေဝ အဟေသုံ ကိရိယဝာဒာ စ ဝီရိယဝာဒာ စ။ တေပိ, ဘိက္ခဝေ, မက္ခလိ မောဃပုရိသော ပဋိဗာဟတိ – ‘နတ္ထိ ကမ္မံ, နတ္ထိ ကိရိယံ, နတ္ထိ ဝီရိယ’န္တိ။ ယေပိ တေ, ဘိက္ခဝေ, ဘဝိသ္သန္တိ အနာဂတမဒ္ဓာနံ အရဟန္တော သမ္မာသမ္ဗုဒ္ဓာ, တေပိ ဘဂဝန္တော ကမ္မဝာဒာ စေဝ ဘဝိသ္သန္တိ ကိရိယဝာဒာ စ ဝီရိယဝာဒာ စ။ တေပိ, ဘိက္ခဝေ, မက္ခလိ မောဃပုရိသော ပဋိဗာဟတိ – ‘နတ္ထိ ကမ္မံ, နတ္ထိ ကိရိယံ, နတ္ထိ ဝီရိယ’န္တိ။ အဟမ္ပိ, ဘိက္ခဝေ, ဧတရဟိ အရဟံ သမ္မာသမ္ဗုဒ္ဓော ကမ္မဝာဒော စေဝ ကိရိယဝာဒော စ ဝီရိယဝာဒော စ။ မမ္ပိ, ဘိက္ခဝေ, မက္ခလိ မောဃပုရိသော ပဋိဗာဟတိ – ‘နတ္ထိ ကမ္မံ, နတ္ထိ ကိရိယံ, နတ္ထိ ဝီရိယ’’’န္တိ။

    ‘‘Makkhali, bhikkhave, moghapuriso evaṃvādī evaṃdiṭṭhi – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, ahesuṃ atītamaddhānaṃ arahanto sammāsambuddhā, tepi bhagavanto kammavādā ceva ahesuṃ kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, bhavissanti anāgatamaddhānaṃ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Ahampi, bhikkhave, etarahi arahaṃ sammāsambuddho kammavādo ceva kiriyavādo ca vīriyavādo ca. Mampi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’’’nti.

    ‘‘သေယ္ယထာပိ , ဘိက္ခဝေ, နဒီမုခေ ခိပ္ပံ ဥဍ္ဍေယ္ယ 3 ဗဟူနံ 4 မစ္ဆာနံ အဟိတာယ ဒုက္ခာယ အနယာယ ဗ္ယသနာယ; ဧဝမေဝံ ခော, ဘိက္ခဝေ, မက္ခလိ မောဃပုရိသော မနုသ္သခိပ္ပံ မညေ လောကေ ဥပ္ပန္နော ဗဟူနံ သတ္တာနံ အဟိတာယ ဒုက္ခာယ အနယာယ ဗ္ယသနာယာ’’တိ။ ပဉ္စမံ။

    ‘‘Seyyathāpi , bhikkhave, nadīmukhe khippaṃ uḍḍeyya 5 bahūnaṃ 6 macchānaṃ ahitāya dukkhāya anayāya byasanāya; evamevaṃ kho, bhikkhave, makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti. Pañcamaṃ.




    Next: ၆. သမ္ပဒာသုတ္တံ • 6. Sampadāsuttaṃ




    Footnotes:
    1. သမဏပ္ပဝာဒာနံ (သီ. သ္ယာ. ကံ. ပီ.)
    2. samaṇappavādānaṃ (sī. syā. kaṃ. pī.)
    3. ဩဍ္ဍေယ္ယ (သီ.)
    4. ဗဟုန္နံ (သီ. သ္ယာ. ကံ. ပီ.)
    5. oḍḍeyya (sī.)
    6. bahunnaṃ (sī. syā. kaṃ. pī.)



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ကေသကမ္ဗလသုတ္တဝဏ္ဏနာ • 5. Kesakambalasuttavaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၁၀. ကေသကမ္ဗလသုတ္တာဒိဝဏ္ဏနာ • 5-10. Kesakambalasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact