| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ခန္ဓသုတ္တံ
10. Khandhasuttaṃ
၃၂၁. သာဝတ္ထိနိဒာနံ ။ ‘‘ယော ခော, ဘိက္ခဝေ, ရူပသ္သ ဥပ္ပာဒော ဌိတိ အဘိနိဗ္ဗတ္တိ ပာတုဘာဝော, ဒုက္ခသ္သေသော ဥပ္ပာဒော, ရောဂာနံ ဌိတိ, ဇရာမရဏသ္သ ပာတုဘာဝော။ ယော ဝေဒနာယ။ ယော သညာယ။ ယော သင္ခာရာနံ။ ယော ဝိညာဏသ္သ ဥပ္ပာဒော ဌိတိ အဘိနိဗ္ဗတ္တိ ပာတုဘာဝော, ဒုက္ခသ္သေသော ဥပ္ပာဒော, ရောဂာနံ ဌိတိ, ဇရာမရဏသ္သ ပာတုဘာဝော။ ယော စ ခော, ဘိက္ခဝေ, ရူပသ္သ နိရောဓော ဝူပသမော အတ္ထင္ဂမော, ဒုက္ခသ္သေသော နိရောဓော, ရောဂာနံ ဝူပသမော, ဇရာမရဏသ္သ အတ္ထင္ဂမော။ ယော ဝေဒနာယ။ ယော သညာယ။ ယော သင္ခာရာနံ။ ယော ဝိညာဏသ္သ နိရောဓော ဝူပသမော အတ္ထင္ဂမော, ဒုက္ခသ္သေသော နိရောဓော, ရောဂာနံ ဝူပသမော, ဇရာမရဏသ္သ အတ္ထင္ဂမော’’တိ။ ဒသမံ။
321. Sāvatthinidānaṃ . ‘‘Yo kho, bhikkhave, rūpassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo vedanāya… yo saññāya… yo saṅkhārānaṃ… yo viññāṇassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo ca kho, bhikkhave, rūpassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo. Yo vedanāya… yo saññāya… yo saṅkhārānaṃ… yo viññāṇassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo’’ti. Dasamaṃ.
ဥပ္ပာဒသံယုတ္တံ သမတ္တံ။
Uppādasaṃyuttaṃ samattaṃ.
တသ္သုဒ္ဒာနံ –
Tassuddānaṃ –
စက္ခု ရူပဉ္စ ဝိညာဏံ၊ ဖသ္သော စ ဝေဒနာယ စ။
Cakkhu rūpañca viññāṇaṃ, phasso ca vedanāya ca;
သညာ စ စေတနာ တဏ္ဟာ၊ ဓာတု ခန္ဓေန တေ ဒသာတိ။
Saññā ca cetanā taṇhā, dhātu khandhena te dasāti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဥပ္ပာဒသံယုတ္တဝဏ္ဏနာ • 5. Uppādasaṃyuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဥပ္ပာဒသံယုတ္တဝဏ္ဏနာ • 5. Uppādasaṃyuttavaṇṇanā
