| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. ပဉ္စမပဏ္ဏာသကံ
5. Pañcamapaṇṇāsakaṃ
(၂၁) ၁. ကိမိလဝဂ္ဂော
(21) 1. Kimilavaggo
၁. ကိမိလသုတ္တံ
1. Kimilasuttaṃ
၂၀၁. ဧကံ သမယံ ဘဂဝာ ကိမိလာယံ 1 ဝိဟရတိ ဝေဠုဝနေ။ အထ ခော အာယသ္မာ ကိမိလော 2 ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ ကိမိလော ဘဂဝန္တံ ဧတဒဝောစ – ‘‘ကော နု ခော, ဘန္တေ, ဟေတု ကော ပစ္စယော, ယေန တထာဂတေ ပရိနိဗ္ဗုတေ သဒ္ဓမ္မော န စိရဋ္ဌိတိကော ဟောတီ’’တိ? ‘‘ဣဓ, ကိမိလ, တထာဂတေ ပရိနိဗ္ဗုတေ ဘိက္ခူ ဘိက္ခုနိယော ဥပာသကာ ဥပာသိကာယော သတ္ထရိ အဂာရဝာ ဝိဟရန္တိ အပ္ပတိသ္သာ, ဓမ္မေ အဂာရဝာ ဝိဟရန္တိ အပ္ပတိသ္သာ, သင္ဃေ အဂာရဝာ ဝိဟရန္တိ အပ္ပတိသ္သာ, သိက္ခာယ အဂာရဝာ ဝိဟရန္တိ အပ္ပတိသ္သာ, အညမညံ အဂာရဝာ ဝိဟရန္တိ အပ္ပတိသ္သာ။ အယံ ခော, ကိမိလ, ဟေတု အယံ ပစ္စယော, ယေန တထာဂတေ ပရိနိဗ္ဗုတေ သဒ္ဓမ္မော န စိရဋ္ဌိတိကော ဟောတီ’’တိ။
201. Ekaṃ samayaṃ bhagavā kimilāyaṃ 3 viharati veḷuvane. Atha kho āyasmā kimilo 4 yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kimilo bhagavantaṃ etadavoca – ‘‘ko nu kho, bhante, hetu ko paccayo, yena tathāgate parinibbute saddhammo na ciraṭṭhitiko hotī’’ti? ‘‘Idha, kimila, tathāgate parinibbute bhikkhū bhikkhuniyo upāsakā upāsikāyo satthari agāravā viharanti appatissā, dhamme agāravā viharanti appatissā, saṅghe agāravā viharanti appatissā, sikkhāya agāravā viharanti appatissā, aññamaññaṃ agāravā viharanti appatissā. Ayaṃ kho, kimila, hetu ayaṃ paccayo, yena tathāgate parinibbute saddhammo na ciraṭṭhitiko hotī’’ti.
‘‘ကော ပန, ဘန္တေ, ဟေတု ကော ပစ္စယော, ယေန တထာဂတေ ပရိနိဗ္ဗုတေ သဒ္ဓမ္မော စိရဋ္ဌိတိကော ဟောတီ’’တိ? ‘‘ဣဓ, ကိမိလ, တထာဂတေ ပရိနိဗ္ဗုတေ ဘိက္ခူ ဘိက္ခုနိယော ဥပာသကာ ဥပာသိကာယော သတ္ထရိ သဂာရဝာ ဝိဟရန္တိ သပ္ပတိသ္သာ, ဓမ္မေ သဂာရဝာ ဝိဟရန္တိ သပ္ပတိသ္သာ, သင္ဃေ သဂာရဝာ ဝိဟရန္တိ သပ္ပတိသ္သာ, သိက္ခာယ သဂာရဝာ ဝိဟရန္တိ သပ္ပတိသ္သာ, အညမညံ သဂာရဝာ ဝိဟရန္တိ သပ္ပတိသ္သာ။ အယံ ခော, ကိမိလ, ဟေတု အယံ ပစ္စယော, ယေန တထာဂတေ ပရိနိဗ္ဗုတေ သဒ္ဓမ္မော စိရဋ္ဌိတိကော ဟောတီ’’တိ။ ပဌမံ။
‘‘Ko pana, bhante, hetu ko paccayo, yena tathāgate parinibbute saddhammo ciraṭṭhitiko hotī’’ti? ‘‘Idha, kimila, tathāgate parinibbute bhikkhū bhikkhuniyo upāsakā upāsikāyo satthari sagāravā viharanti sappatissā, dhamme sagāravā viharanti sappatissā, saṅghe sagāravā viharanti sappatissā, sikkhāya sagāravā viharanti sappatissā, aññamaññaṃ sagāravā viharanti sappatissā. Ayaṃ kho, kimila, hetu ayaṃ paccayo, yena tathāgate parinibbute saddhammo ciraṭṭhitiko hotī’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. ကိမိလသုတ္တဝဏ္ဏနာ • 1. Kimilasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄. ကိမိလသုတ္တာဒိဝဏ္ဏနာ • 1-4. Kimilasuttādivaṇṇanā
