| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၇. ကုလသုတ္တံ
7. Kulasuttaṃ
၁၇. ‘‘နဝဟိ, ဘိက္ခဝေ, အင္ဂေဟိ သမန္နာဂတံ ကုလံ အနုပဂန္တ္ဝာ ဝာ နာလံ ဥပဂန္တုံ, ဥပဂန္တ္ဝာ ဝာ နာလံ နိသီဒိတုံ။ ကတမေဟိ နဝဟိ? န မနာပေန ပစ္စုဋ္ဌေန္တိ, န မနာပေန အဘိဝာဒေန္တိ, န မနာပေန အာသနံ ဒေန္တိ, သန္တမသ္သ ပရိဂုဟန္တိ, ဗဟုကမ္ပိ ထောကံ ဒေန္တိ, ပဏီတမ္ပိ လူခံ ဒေန္တိ, အသက္ကစ္စံ ဒေန္တိ နော သက္ကစ္စံ, န ဥပနိသီဒန္တိ ဓမ္မသ္သဝနာယ, ဘာသိတမသ္သ န သုသ္သူသန္တိ။ ဣမေဟိ ခော, ဘိက္ခဝေ, နဝဟင္ဂေဟိ သမန္နာဂတံ ကုလံ အနုပဂန္တ္ဝာ ဝာ နာလံ ဥပဂန္တုံ ဥပဂန္တ္ဝာ ဝာ နာလံ နိသီဒိတုံ။
17. ‘‘Navahi, bhikkhave, aṅgehi samannāgataṃ kulaṃ anupagantvā vā nālaṃ upagantuṃ, upagantvā vā nālaṃ nisīdituṃ. Katamehi navahi? Na manāpena paccuṭṭhenti, na manāpena abhivādenti, na manāpena āsanaṃ denti, santamassa pariguhanti, bahukampi thokaṃ denti, paṇītampi lūkhaṃ denti, asakkaccaṃ denti no sakkaccaṃ, na upanisīdanti dhammassavanāya, bhāsitamassa na sussūsanti. Imehi kho, bhikkhave, navahaṅgehi samannāgataṃ kulaṃ anupagantvā vā nālaṃ upagantuṃ upagantvā vā nālaṃ nisīdituṃ.
‘‘နဝဟိ, ဘိက္ခဝေ, အင္ဂေဟိ သမန္နာဂတံ ကုလံ အနုပဂန္တ္ဝာ ဝာ အလံ ဥပဂန္တုံ, ဥပဂန္တ္ဝာ ဝာ အလံ နိသီဒိတုံ။ ကတမေဟိ နဝဟိ? မနာပေန ပစ္စုဋ္ဌေန္တိ, မနာပေန အဘိဝာဒေန္တိ, မနာပေန အာသနံ ဒေန္တိ, သန္တမသ္သ န ပရိဂုဟန္တိ, ဗဟုကမ္ပိ ဗဟုကံ ဒေန္တိ, ပဏီတမ္ပိ ပဏီတံ ဒေန္တိ, သက္ကစ္စံ ဒေန္တိ နော အသက္ကစ္စံ, ဥပနိသီဒန္တိ ဓမ္မသ္သဝနာယ, ဘာသိတမသ္သ သုသ္သူသန္တိ။ ဣမေဟိ ခော, ဘိက္ခဝေ, နဝဟင္ဂေဟိ သမန္နာဂတံ ကုလံ အနုပဂန္တ္ဝာ ဝာ အလံ ဥပဂန္တုံ, ဥပဂန္တ္ဝာ ဝာ အလံ နိသီဒိတု’’န္တိ။ သတ္တမံ။
‘‘Navahi, bhikkhave, aṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ nisīdituṃ. Katamehi navahi? Manāpena paccuṭṭhenti, manāpena abhivādenti, manāpena āsanaṃ denti, santamassa na pariguhanti, bahukampi bahukaṃ denti, paṇītampi paṇītaṃ denti, sakkaccaṃ denti no asakkaccaṃ, upanisīdanti dhammassavanāya, bhāsitamassa sussūsanti. Imehi kho, bhikkhave, navahaṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ nisīditu’’nti. Sattamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇-၈. ကုလသုတ္တာဒိဝဏ္ဏနာ • 7-8. Kulasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၉. ဂဏ္ဍသုတ္တာဒိဝဏ္ဏနာ • 5-9. Gaṇḍasuttādivaṇṇanā
