| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. කුලසුත්‌තවණ්‌ණනා
9. Kulasuttavaṇṇanā
361. නවමෙ දුබ්‌භික්‌ඛාති දුල්‌ලභභික්‌ඛා. ද්‌වීහිතිකාති ‘‘ජීවිස්‌සාම නු ඛො න නු ඛො’’ති එවං පවත්‌තඊහිතිකා. ‘‘දුහිතිකා’’තිපි පාඨො. අයමෙව අත්‌ථො. දුක්‌ඛා ඊහිති එත්‌ථ න සක්‌කා කොචි පයොගො සුඛෙන කාතුන්‌ති දුහිතිකා. තත්‌ථ තත්‌ථ මතමනුස්‌සානං විප්‌පකිණ්‌ණානි සෙතානි අට්‌ඨිකානි එත්‌ථාති සෙතට්‌ඨිකා. සලාකාවුත්‌තාති සලාකමත්‌තවුත්‌තා, යං තත්‌ථ වුත්‌තං වාපිතං, තං සලාකමත්‌තමෙව අහොසි, ඵලෙ න ජනයතීති අත්‌ථො.
361. Navame dubbhikkhāti dullabhabhikkhā. Dvīhitikāti ‘‘jīvissāma nu kho na nu kho’’ti evaṃ pavattaīhitikā. ‘‘Duhitikā’’tipi pāṭho. Ayameva attho. Dukkhā īhiti ettha na sakkā koci payogo sukhena kātunti duhitikā. Tattha tattha matamanussānaṃ vippakiṇṇāni setāni aṭṭhikāni etthāti setaṭṭhikā. Salākāvuttāti salākamattavuttā, yaṃ tattha vuttaṃ vāpitaṃ, taṃ salākamattameva ahosi, phale na janayatīti attho.
උග්‌ගිලිතුන්‌ති ද්‌වෙ අන්‌තෙ මොචෙත්‌වා කථෙතුං අසක්‌කොන්‌තො උග්‌ගිලිතුං බහි නීහරිතුං න සක්‌ඛීති . ඔගිලිතුන්‌ති පුච්‌ඡාය දොසං දිස්‌වා හාරෙතුං අසක්‌කොන්‌තො ඔගිලිතුං අන්‌තො පවෙසෙතුං න සක්‌ඛීති.
Uggilitunti dve ante mocetvā kathetuṃ asakkonto uggilituṃ bahi nīharituṃ na sakkhīti . Ogilitunti pucchāya dosaṃ disvā hāretuṃ asakkonto ogilituṃ anto pavesetuṃ na sakkhīti.
ඉතො සො ගාමණි එකනවුතිකප්‌පෙති භගවා කථයමානොව යාව නික්‌ඛන්‌තො නාසිකවාතො න පුන පවිසති, තාවතකෙන කාලෙන එකනවුතිකප්‌පෙ අනුස්‌සරි ‘‘අත්‌ථි නු ඛො කිඤ්‌චි කුලෙ පක්‌කභික්‌ඛාදානෙන උපහතපුබ්‌බ’’න්‌ති පරිජානනත්‌ථං. අථෙකම්‌පි අපස්‌සන්‌තො ‘‘ඉතො සො, ගාමණී’’තිආදිමාහ. ඉදානි දානාදීනං ආනිසංසං කථෙන්‌තො අථ ඛො යානි තානි කුලානි අඩ්‌ඪානීති ධම්‌මදෙසනං ආරභි. තත්‌ථ දානසම්‌භූතානීති දානෙන සම්‌භූතානි නිබ්‌බත්‌තානි. සෙසපදද්‌වයෙපි එසෙව නයො. එත්‌ථ පන සච්‌චං නාම සච්‌චවාදිතා. සාමඤ්‌ඤං නාම සෙසසීලං. විකිරතීති අයොගෙන වළඤ්‌ජෙන්‌තො විප්‌පකිරති. විධමතීති ධමෙන්‌තො විය නාසෙති. විද්‌ධංසෙතීති නාසෙති. අනිච්‌චතාති හුත්‌වා අභාවො බහුනාපි කාලෙන සඞ්‌ගතානං ඛණෙනෙව අන්‌තරධානං.
Ito so gāmaṇi ekanavutikappeti bhagavā kathayamānova yāva nikkhanto nāsikavāto na puna pavisati, tāvatakena kālena ekanavutikappe anussari ‘‘atthi nu kho kiñci kule pakkabhikkhādānena upahatapubba’’nti parijānanatthaṃ. Athekampi apassanto ‘‘ito so, gāmaṇī’’tiādimāha. Idāni dānādīnaṃ ānisaṃsaṃ kathento atha kho yāni tāni kulāni aḍḍhānīti dhammadesanaṃ ārabhi. Tattha dānasambhūtānīti dānena sambhūtāni nibbattāni. Sesapadadvayepi eseva nayo. Ettha pana saccaṃ nāma saccavāditā. Sāmaññaṃ nāma sesasīlaṃ. Vikiratīti ayogena vaḷañjento vippakirati. Vidhamatīti dhamento viya nāseti. Viddhaṃsetīti nāseti. Aniccatāti hutvā abhāvo bahunāpi kālena saṅgatānaṃ khaṇeneva antaradhānaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. කුලසුත්‌තං • 9. Kulasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. කුලසුත්‌තවණ්‌ණනා • 9. Kulasuttavaṇṇanā
