| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
ඛුද්‌දකනිකායෙ
Khuddakanikāye
මිලින්‌දපඤ්‌හපාළි
Milindapañhapāḷi
1.
1.
මිලින්‌දො නාම සො රාජා, සාගලායං පුරුත්‌තමෙ;
Milindo nāma so rājā, sāgalāyaṃ puruttame;
ආසජ්‌ජ රාජා චිත්‍රකථිං, උක්‌කාධාරං තමොනුදං;
Āsajja rājā citrakathiṃ, ukkādhāraṃ tamonudaṃ;
අපුච්‌ඡි නිපුණෙ පඤ්‌හෙ, ඨානාට්‌ඨානගතෙ පුථූ.
Apucchi nipuṇe pañhe, ṭhānāṭṭhānagate puthū.
හදයඞ්‌ගමා කණ්‌ණසුඛා, අබ්‌භුතා ලොමහංසනා.
Hadayaṅgamā kaṇṇasukhā, abbhutā lomahaṃsanā.
අභිධම්‌මවිනයොගාළ්‌හා, සුත්‌තජාලසමත්‌තිතා;
Abhidhammavinayogāḷhā, suttajālasamattitā;
නාගසෙනකථා චිත්‍රා, ඔපම්‌මෙහි නයෙහි ච.
Nāgasenakathā citrā, opammehi nayehi ca.
තත්‌ථ ඤාණං පණිධාය, හාසයිත්‌වාන මානසං;
Tattha ñāṇaṃ paṇidhāya, hāsayitvāna mānasaṃ;
සුණාථ නිපුණෙ පඤ්‌හෙ, කඞ්‌ඛාට්‌ඨානවිදාලනෙති.
Suṇātha nipuṇe pañhe, kaṅkhāṭṭhānavidālaneti.
2. තං යථානුසූයතෙ – අත්‌ථි යොනකානං නානාපුටභෙදනං සාගලං නාම නගරං නදීපබ්‌බතසොභිතං රමණීයභූමිප්‌පදෙසභාගං ආරාමුය්‍යානොපවනතළාකපොක්‌ඛරණිසම්‌පන්‌නං නදීපබ්‌බතවනරාමණෙය්‍යකං සුතවන්‌තනිම්‌මිතං නිහතපච්‌චත්‌ථිකං 5 පච්‌චාමිත්‌තානුපපීළිතං විවිධවිචිත්‍රදළ්‌හමට්‌ටාලකොට්‌ඨකං වරපවරගොපුර 6 තොරණං ගම්‌භීරපරිඛාපණ්‌ඩරපාකාරපරික්‌ඛිත්‌තන්‌තෙපුරං. සුවිභත්‌තවීථිචච්‌චරචතුක්‌කසිඞ්‌ඝාටකං සුප්‌පසාරිතානෙකවිධවරභණ්‌ඩපරිපූරිතන්‌තරාපණං විවිධදානග්‌ගසතසමුපසොභිතං 7 හිමගිරිසිඛරසඞ්‌කාසවරභවනසතසහස්‌සප්‌පටිමණ්‌ඩිතං ගජහයරථපත්‌තිසමාකුලං අභිරූපනරනාරිගණානුචරිතං ආකිණ්‌ණජනමනුස්‌සං පුථුඛත්‌තියබ්‍රාහ්‌මණවෙස්‌සසුද්‌දං විවිධසමණබ්‍රාහ්‌මණසභාජන 8 සඞ්‌ඝටිතං බහුවිධවිජ්‌ජාවන්‌ත 9 නරචිර 10 නිසෙවිතං කාසිකකොටුම්‌බරිකාදිනානාවිධවත්‌ථාපණසම්‌පන්‌නං සුප්‌පසාරිතරුචිරබහුවිධපුප්‌ඵගන්‌ධාපණං ගන්‌ධගන්‌ධිතං ආසීසනීයබහුරතනපරිපූරිතං දිසාමුඛසුප්‌පසාරිතාපණං සිඞ්‌ගාරවාණිජගණානුචරිතං කහාපණරජතසුවණ්‌ණකංසපත්‌ථරපරිපූරං පජ්‌ජොතමානනිධිනිකෙතං පහූතධනධඤ්‌ඤවිත්‌තූපකරණං පරිපුණ්‌ණකොසකොට්‌ඨාගාරං බහ්‌වන්‌නපානං බහුවිධඛජ්‌ජභොජ්‌ජලෙය්‍යපෙය්‍යසායනීයං උත්‌තරකුරුසඞ්‌කාසං සම්‌පන්‌නසස්‌සං ආළකමන්‌දා විය දෙවපුරං.
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
එත්‌ථ ඨත්‌වා තෙසං පුබ්‌බකම්‌මං කථෙතබ්‌බං, කථෙන්‌තෙන ච ඡධා විභජිත්‌වා කථෙතබ්‌බං. සෙය්‍යථීදං – පුබ්‌බයොගො මිලින්‌දපඤ්‌හං ලක්‌ඛණපඤ්‌හං මෙණ්‌ඩකපඤ්‌හං අනුමානපඤ්‌හං ඔපම්‌මකථාපඤ්‌හන්‌ති.
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
තත්‌ථ මිලින්‌දපඤ්‌හො ලක්‌ඛණපඤ්‌හො, විමතිච්‌ඡෙදනපඤ්‌හොති දුවිධො. මෙණ්‌ඩකපඤ්‌හොපි මහාවග්‌ගො, යොගිකථාපඤ්‌හොති දුවිධො.
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
පුබ්‌බයොගොති තෙසං පුබ්‌බකම්‌මං.
Pubbayogoti tesaṃ pubbakammaṃ.
Footnotes:
