| Library / Tipiṭaka / တိပိဋက • Tipiṭaka / သုတ္တနိပာတ-အဋ္ဌကထာ • Suttanipāta-aṭṭhakathā |
၁၅. မောဃရာဇသုတ္တဝဏ္ဏနာ
15. Mogharājasuttavaṇṇanā
၁၁၂၃. ဒ္ဝာဟံ သက္ကန္တိ မောဃရာဇသုတ္တံ။ တတ္ထ ဒ္ဝာဟန္တိ ဒ္ဝေ ဝာရေ အဟံ။ သော ဟိ ပုဗ္ဗေ အဇိတသုတ္တသ္သ စ တိသ္သမေတ္တေယ္ယသုတ္တသ္သ စ အဝသာနေ ဒ္ဝိက္ခတ္တုံ ဘဂဝန္တံ ပုစ္ဆိ။ ဘဂဝာ ပနသ္သ ဣန္ဒ္ရိယပရိပာကံ အာဂမယမာနော န ဗ္ယာကာသိ။ တေနာဟ – ‘‘ဒ္ဝာဟံ သက္ကံ အပုစ္ဆိသ္သ’’န္တိ။ ယာဝတတိယဉ္စ ဒေဝီသိ, ဗ္ယာကရောတီတိ မေ သုတန္တိ ယာဝတတိယဉ္စ သဟဓမ္မိကံ ပုဋ္ဌော ဝိသုဒ္ဓိဒေဝဘူတော ဣသိ ဘဂဝာ သမ္မာသမ္ဗုဒ္ဓော ဗ္ယာကရောတီတိ ဧဝံ မေ သုတံ။ ဂောဓာဝရီတီရေယေဝ ကိရ သော ဧဝမသ္သောသိ။ တေနာဟ – ‘‘ဗ္ယာကရောတီတိ မေ သုတ’’န္တိ။
1123.Dvāhaṃsakkanti mogharājasuttaṃ. Tattha dvāhanti dve vāre ahaṃ. So hi pubbe ajitasuttassa ca tissametteyyasuttassa ca avasāne dvikkhattuṃ bhagavantaṃ pucchi. Bhagavā panassa indriyaparipākaṃ āgamayamāno na byākāsi. Tenāha – ‘‘dvāhaṃ sakkaṃ apucchissa’’nti. Yāvatatiyañca devīsi, byākarotīti me sutanti yāvatatiyañca sahadhammikaṃ puṭṭho visuddhidevabhūto isi bhagavā sammāsambuddho byākarotīti evaṃ me sutaṃ. Godhāvarītīreyeva kira so evamassosi. Tenāha – ‘‘byākarotīti me suta’’nti.
၁၁၂၄. အယံ လောကောတိ မနုသ္သလောကော။ ပရော လောကောတိ တံ ဌပေတ္ဝာ အဝသေသော။ သဒေဝကောတိ ဗ္ရဟ္မလောကံ ဌပေတ္ဝာ အဝသေသော ဥပပတ္တိဒေဝသမ္မုတိဒေဝယုတ္တော, ‘‘ဗ္ရဟ္မလောကော သဒေဝကော’’တိ ဧတံ ဝာ ‘‘သဒေဝကေ လောကေ’’တိအာဒိနယနိဒသ္သနမတ္တံ, တေန သဗ္ဗောပိ တထာဝုတ္တပ္ပကာရော လောကော ဝေဒိတဗ္ဗော။
1124.Ayaṃ lokoti manussaloko. Paro lokoti taṃ ṭhapetvā avaseso. Sadevakoti brahmalokaṃ ṭhapetvā avaseso upapattidevasammutidevayutto, ‘‘brahmaloko sadevako’’ti etaṃ vā ‘‘sadevake loke’’tiādinayanidassanamattaṃ, tena sabbopi tathāvuttappakāro loko veditabbo.
၁၁၂၅. ဧဝံ အဘိက္ကန္တဒသ္သာဝိန္တိ ဧဝံ အဂ္ဂဒသ္သာဝိံ, သဒေဝကသ္သ လောကသ္သ အဇ္ဈာသယာဓိမုတ္တိဂတိပရာယဏာဒီနိ ပသ္သိတုံ သမတ္ထန္တိ ဒသ္သေတိ။
1125. Evaṃ abhikkantadassāvinti evaṃ aggadassāviṃ, sadevakassa lokassa ajjhāsayādhimuttigatiparāyaṇādīni passituṃ samatthanti dasseti.
၁၁၂၆. သုညတော လောကံ အဝေက္ခသ္သူတိ အဝသိယပဝတ္တသလ္လက္ခဏဝသေန ဝာ တုစ္ဆသင္ခာရသမနုပသ္သနာဝသေန ဝာတိ ဒ္ဝီဟိ ကာရဏေဟိ သုညတော လောကံ ပသ္သ။ အတ္တာနုဒိဋ္ဌိံ ဦဟစ္စာတိ သက္ကာယဒိဋ္ဌိံ ဥဒ္ဓရိတ္ဝာ။ သေသံ သဗ္ဗတ္ထ ပာကဋမေဝ။
1126.Suññato lokaṃ avekkhassūti avasiyapavattasallakkhaṇavasena vā tucchasaṅkhārasamanupassanāvasena vāti dvīhi kāraṇehi suññato lokaṃ passa. Attānudiṭṭhiṃ ūhaccāti sakkāyadiṭṭhiṃ uddharitvā. Sesaṃ sabbattha pākaṭameva.
ဧဝံ ဘဂဝာ ဣမမ္ပိ သုတ္တံ အရဟတ္တနိကူဋေနေဝ ဒေသေသိ။ ဒေသနာပရိယောသာနေ စ ဝုတ္တသဒိသော ဧဝ ဓမ္မာဘိသမယော အဟောသီတိ။
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
ပရမတ္ထဇောတိကာယ ခုဒ္ဒက-အဋ္ဌကထာယ
Paramatthajotikāya khuddaka-aṭṭhakathāya
သုတ္တနိပာတ-အဋ္ဌကထာယ မောဃရာဇသုတ္တဝဏ္ဏနာ နိဋ္ဌိတာ။
Suttanipāta-aṭṭhakathāya mogharājasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / သုတ္တနိပာတပာဠိ • Suttanipātapāḷi / ၁၅. မောဃရာဇမာဏဝပုစ္ဆာ • 15. Mogharājamāṇavapucchā
