| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
7. මූසිකසුත්‌තවණ්‌ණනා
7. Mūsikasuttavaṇṇanā
107. සත්‌තමෙ ආවාටං ඛනතීති අත්‌තනො ආසයං බිලකූපං ඛනති. න ච තත්‌ථ වසතීති තත්‌ථ අවසිත්‌වා කිස්‌මිඤ්‌චිදෙව ඨානෙ වසති, එවං බිළාරාදිඅමිත්‌තවසං ගච්‌ඡති. වසිතා නො ගාධං කත්‌තාති සයං න ඛනති, පරෙන කතෙ බිලෙ වසති, එවං ජීවිතං රක්‌ඛති. තතියා ද්‌වෙපි කරොන්‌තී ජීවිතං රක්‌ඛති. චතුත්‌ථී ද්‌වෙපි අකරොන්‌තී අමිත්‌තවසං ගච්‌ඡති. ඉමාය පන උපමාය උපමිතෙසු පුග්‌ගලෙසු පඨමො යථා සා මූසිකා ගාධං ඛනති, එවං නවඞ්‌ගං සත්‌ථුසාසනං උග්‌ගණ්‌හාති. යථා පන සා තත්‌ථ න වසති, කිස්‌මිඤ්‌චිදෙව ඨානෙ වසන්‌තී අමිත්‌තවසං ගච්‌ඡති, තථා අයම්‌පි පරියත්‌තිවසෙන ඤාණං පෙසෙත්‌වා චතුසච්‌චධම්‌මං න පටිවිජ්‌ඣති, ලොකාමිසට්‌ඨානෙසු විචරන්‌තො මච්‌චුමාරකිලෙසමාරදෙවපුත්‌තමාරසඞ්‌ඛාතානං වසං ගච්‌ඡති. දුතියො යථා මූසිකා ගාධං න ඛනති, එවං නවඞ්‌ගං සත්‌ථුසාසනං න උග්‌ගණ්‌හාති. යථා පන පරෙන ඛනිතෙ බිලෙ වසන්‌තී ජීවිතං රක්‌ඛති, එවං පරස්‌ස කථං සුත්‌වා චතුසච්‌චධම්‌මං පටිවිජ්‌ඣිත්‌වා තිණ්‌ණං මාරානං වසං අතික්‌කමති. ඉමිනා නයෙන තතියචතුත්‌ථෙසුපි ඔපම්‌මසංසන්‌දනං වෙදිතබ්‌බං.
107. Sattame āvāṭaṃ khanatīti attano āsayaṃ bilakūpaṃ khanati. Na ca tattha vasatīti tattha avasitvā kismiñcideva ṭhāne vasati, evaṃ biḷārādiamittavasaṃ gacchati. Vasitā no gādhaṃ kattāti sayaṃ na khanati, parena kate bile vasati, evaṃ jīvitaṃ rakkhati. Tatiyā dvepi karontī jīvitaṃ rakkhati. Catutthī dvepi akarontī amittavasaṃ gacchati. Imāya pana upamāya upamitesu puggalesu paṭhamo yathā sā mūsikā gādhaṃ khanati, evaṃ navaṅgaṃ satthusāsanaṃ uggaṇhāti. Yathā pana sā tattha na vasati, kismiñcideva ṭhāne vasantī amittavasaṃ gacchati, tathā ayampi pariyattivasena ñāṇaṃ pesetvā catusaccadhammaṃ na paṭivijjhati, lokāmisaṭṭhānesu vicaranto maccumārakilesamāradevaputtamārasaṅkhātānaṃ vasaṃ gacchati. Dutiyo yathā mūsikā gādhaṃ na khanati, evaṃ navaṅgaṃ satthusāsanaṃ na uggaṇhāti. Yathā pana parena khanite bile vasantī jīvitaṃ rakkhati, evaṃ parassa kathaṃ sutvā catusaccadhammaṃ paṭivijjhitvā tiṇṇaṃ mārānaṃ vasaṃ atikkamati. Iminā nayena tatiyacatutthesupi opammasaṃsandanaṃ veditabbaṃ.
මූසිකසුත්‌තවණ්‌ණනා නිට්‌ඨිතා.
Mūsikasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. මූසිකසුත්‌තං • 7. Mūsikasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. මූසිකසුත්‌තවණ්‌ණනා • 7. Mūsikasuttavaṇṇanā
