| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. නදුබ්‌භියසුත්‌තවණ්‌ණනා
7. Nadubbhiyasuttavaṇṇanā
253. සත්‌තමෙ උපසඞ්‌කමීති ‘‘අයං සක්‌කො ‘යොපි මෙ අස්‌ස සුපච්‌චත්‌ථිකො, තස්‌ස පාහං න දුබ්‌භෙය්‍ය’න්‌ති චින්‌තෙති, මයා තස්‌ස පච්‌චත්‌ථිකතරො නාම නත්‌ථි, වීමංසිස්‌සාමි තාව නං, කිං නු ඛො මං පස්‌සිත්‌වා දුබ්‌භති, න දුබ්‌භතී’’ති චින්‌තෙත්‌වා උපසඞ්‌කමි. තිට්‌ඨ වෙපචිත්‌ති ගහිතොසීති වෙපචිත්‌ති, එත්‌ථෙව තිට්‌ඨ, ගහිතො ත්‌වං මයාති වදති. සහ වචනෙනෙවස්‌ස සො කණ්‌ඨපඤ්‌චමෙහි බන්‌ධනෙහි බද්‌ධොව අහොසි. සපස්‌සු ච මෙති මයි අදුබ්‌භත්‌ථාය සපථං කරොහීති වදති. යං මුසාභණතො පාපන්‌ති ඉමස්‌මිං කප්‌පෙ පඨමකප්‌පිකෙසු චෙතියරඤ්‌ඤො පාපං සන්‌ධායාහ. අරියූපවාදිනොති කොකලිකස්‌ස විය පාපං. මිත්‌තද්‌දුනො ච යං පාපන්‌ති මහාකපිජාතකෙ මහාසත්‌තෙ දුට්‌ඨචිත්‌තස්‌ස පාපං. අකතඤ්‌ඤුනොති දෙවදත්‌තසදිසස්‌ස අකතඤ්‌ඤුනො පාපං. ඉමානි කිර ඉමස්‌මිං කප්‌පෙ චත්‌තාරි මහාපාපානි. සත්‌තමං.
253. Sattame upasaṅkamīti ‘‘ayaṃ sakko ‘yopi me assa supaccatthiko, tassa pāhaṃ na dubbheyya’nti cinteti, mayā tassa paccatthikataro nāma natthi, vīmaṃsissāmi tāva naṃ, kiṃ nu kho maṃ passitvā dubbhati, na dubbhatī’’ti cintetvā upasaṅkami. Tiṭṭha vepacitti gahitosīti vepacitti, ettheva tiṭṭha, gahito tvaṃ mayāti vadati. Saha vacanenevassa so kaṇṭhapañcamehi bandhanehi baddhova ahosi. Sapassu ca meti mayi adubbhatthāya sapathaṃ karohīti vadati. Yaṃ musābhaṇato pāpanti imasmiṃ kappe paṭhamakappikesu cetiyarañño pāpaṃ sandhāyāha. Ariyūpavādinoti kokalikassa viya pāpaṃ. Mittadduno ca yaṃ pāpanti mahākapijātake mahāsatte duṭṭhacittassa pāpaṃ. Akataññunoti devadattasadisassa akataññuno pāpaṃ. Imāni kira imasmiṃ kappe cattāri mahāpāpāni. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. නදුබ්‌භියසුත්‌තං • 7. Nadubbhiyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. නදුබ්‌භියසුත්‌තවණ්‌ණනා • 7. Nadubbhiyasuttavaṇṇanā
