| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. නාගසුත්‌තවණ්‌ණනා
9. Nāgasuttavaṇṇanā
231. නවමෙ අතිවෙලන්‌ති අතික්‌කන්‌තවෙලං කාලං අතික්‌කන්‌තප්‌පමාණං කාලං. කිමඞ්‌ගං පනාහන්‌ති අහං පන කිංකාරණා න උපසඞ්‌කමිස්‌සාමි? භිසමුළාලන්‌ති භිසඤ්‌චෙව මුළාලඤ්‌ච. අබ්‌බුහෙත්‌වාති උද්‌ධරිත්‌වා. භිඞ්‌කච්‌ඡාපාති හත්‌ථිපොතකා. තෙ කිර අභිණ්‌හං භිඞ්‌කාරසද්‌දං කරොන්‌ති, තස්‌මා භිඞ්‌කච්‌ඡාපාති වුච්‌චන්‌ති. පසන්‌නාකාරං කරොන්‌තීති පසන්‌නෙහි කත්‌තබ්‌බාකාරං කරොන්‌ති, චත්‌තාරො පච්‌චයෙ දෙන්‌ති. ධම්‌මං භාසන්‌තීති එකං ද්‌වෙ ජාතකානි වා සුත්‌තන්‌තෙ වා උග්‌ගණ්‌හිත්‌වා අසම්‌භින්‌නෙන සරෙන ධම්‌මං දෙසෙන්‌ති. පසන්‌නාකාරං කරොන්‌තීති තෙසං තාය දෙසනාය පසන්‌නා ගිහී පච්‌චයෙ දෙන්‌ති. නෙව වණ්‌ණාය හොති න බලායාති නෙව ගුණවණ්‌ණාය, න ඤාණබලාය හොති, ගුණවණ්‌ණෙ පන පරිහායන්‌තෙ සරීරවණ්‌ණොපි සරීරබලම්‌පි පරිහායති, තස්‌මා සරීරස්‌ස නෙව වණ්‌ණාය න බලාය හොති. නවමං.
231. Navame ativelanti atikkantavelaṃ kālaṃ atikkantappamāṇaṃ kālaṃ. Kimaṅgaṃ panāhanti ahaṃ pana kiṃkāraṇā na upasaṅkamissāmi? Bhisamuḷālanti bhisañceva muḷālañca. Abbuhetvāti uddharitvā. Bhiṅkacchāpāti hatthipotakā. Te kira abhiṇhaṃ bhiṅkārasaddaṃ karonti, tasmā bhiṅkacchāpāti vuccanti. Pasannākāraṃ karontīti pasannehi kattabbākāraṃ karonti, cattāro paccaye denti. Dhammaṃ bhāsantīti ekaṃ dve jātakāni vā suttante vā uggaṇhitvā asambhinnena sarena dhammaṃ desenti. Pasannākāraṃ karontīti tesaṃ tāya desanāya pasannā gihī paccaye denti. Neva vaṇṇāya hoti na balāyāti neva guṇavaṇṇāya, na ñāṇabalāya hoti, guṇavaṇṇe pana parihāyante sarīravaṇṇopi sarīrabalampi parihāyati, tasmā sarīrassa neva vaṇṇāya na balāya hoti. Navamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. නාගසුත්‌තං • 9. Nāgasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. නාගසුත්‌තවණ්‌ණනා • 9. Nāgasuttavaṇṇanā
