| Library / Tipiṭaka / තිපිටක • Tipiṭaka / චූළනිද්‌දෙස-අට්‌ඨකථා • Cūḷaniddesa-aṭṭhakathā |
7. නන්‌දමාණවසුත්‌තනිද්‌දෙසවණ්‌ණනා
7. Nandamāṇavasuttaniddesavaṇṇanā
46. සත්‌තමෙ නන්‌දසුත්‌තෙ – පඨමගාථායත්‌ථො – ලොකෙ ඛත්‌තියාදයොජනා ආජීවකනිගණ්‌ඨාදිකෙ සන්‌ධාය ‘‘සන්‌ති ලොකෙ මුනයො’’ති වදන්‌ති. තයිදං කථංසූති කිං නු ඛො තෙ සමාපත්‌තිඤාණාදිනා ඤාණෙන උපපන්‌නත්‌තා ඤාණූපපන්‌නං මුනි නො වදන්‌ති, එවංවිධං නු වදන්‌ති, උදාහු වෙ නානප්‌පකාරකෙන ලූඛජීවිතසඞ්‌ඛාතෙන ජීවිතෙනූපපන්‌නන්‌ති.
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
නිද්‌දෙසෙ අට්‌ඨසමාපත්‌තිඤාණෙන වාති පඨමජ්‌ඣානාදිඅට්‌ඨසමාපත්‌තිසම්‌පයුත්‌තඤාණෙන වා. පඤ්‌චාභිඤ්‌ඤාඤාණෙන වාති පුබ්‌බෙනිවාසාදිජානනඤාණෙන වා.
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
47. අථස්‌ස භගවා තදුභයම්‌පි පටික්‌ඛිපිත්‌වා මුනිං දස්‌සෙන්‌තො ‘‘න දිට්‌ඨියා’’ති ගාථමාහ.
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
48. ඉදානි ‘‘දිට්‌ඨාදීහි සුද්‌ධී’’ති වදන්‌තානං වාදෙ කඞ්‌ඛාපහානත්‌ථං ‘‘යෙ කෙචිමෙ’’ති පුච්‌ඡති. තත්‌ථ අනෙකරූපෙනාති කොතූහලමඞ්‌ගලාදිනාපි. තත්‌ථ යතා චරන්‌තාති තත්‌ථ සක්‌කායදිට්‌ඨියා ගුත්‌තා විහරන්‌තා.
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
49. අථස්‌ස තථා සුද්‌ධිඅභාවං දීපෙන්‌තො භගවා චතුත්‌ථං ගාථමාහ.
49. Athassa tathā suddhiabhāvaṃ dīpento bhagavā catutthaṃ gāthamāha.
50. එවං ‘‘නාතරිංසූ’’ති සුත්‌වා ඉදානි යො අතරි, තං සොතුකාමො ‘‘යෙ කෙචිමෙ’’ති පුච්‌ඡති. අථස්‌ස භගවා ඔඝතිණ්‌ණමුඛෙන ජාතිජරාතිණ්‌ණෙ දස්‌සෙන්‌තො ඡට්‌ඨං ගාථමාහ.
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
51. තත්‌ථ නිවුතාති ඔවුටා පරියොනද්‌ධා. යෙ සීධාති යෙ සු ඉධ, එත්‌ථ ච සු-ඉති නිපාතමත්‌තං. තණ්‌හං පරිඤ්‌ඤායාති තීහි පරිඤ්‌ඤාහි තණ්‌හං පරිජානිත්‌වා. සෙසං සබ්‌බත්‌ථ පුබ්‌බෙ වුත්‌තනයත්‌තා පාකටමෙව.
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
52. එවං භගවා අරහත්‌තනිකූටෙනෙව දෙසනං නිට්‌ඨාපෙසි, දෙසනාපරියොසානෙ පන නන්‌දො භගවතො භාසිතං අභිනන්‌දමානො එතාභිනන්‌දාමීති ගාථමාහ. ඉධාපි ච පුබ්‌බෙ වුත්‌තසදිසො එව ධම්‌මාභිසමයො අහොසීති.
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
සද්‌ධම්‌මප්‌පජ්‌ජොතිකාය චූළනිද්‌දෙස-අට්‌ඨකථාය
Saddhammappajjotikāya cūḷaniddesa-aṭṭhakathāya
නන්‌දමාණවසුත්‌තනිද්‌දෙසවණ්‌ණනා නිට්‌ඨිතා.
Nandamāṇavasuttaniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / චූළනිද්‌දෙසපාළි • Cūḷaniddesapāḷi
7. නන්‌දමාණවපුච්‌ඡා • 7. Nandamāṇavapucchā
7. නන්‌දමාණවපුච්‌ඡානිද්‌දෙසො • 7. Nandamāṇavapucchāniddeso
