| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
10. නන්‌දමාතාසුත්‌තවණ්‌ණනා
10. Nandamātāsuttavaṇṇanā
53. දසමෙ ‘‘වුත්‌ථවස්‌සො පවාරෙත්‌වා…පෙ.… නික්‌ඛමී’’ති අඞ්‌ගුත්‌තරභාණකානං මතෙනෙතං වුත්‌තං. මජ්‌ඣිමභාණකා පන වදන්‌ති ‘‘භගවා උපකට්‌ඨාය වස්‌සූපනායිකාය ජෙතවනතො භික්‌ඛුසඞ්‌ඝපරිවුතො චාරිකං නික්‌ඛමි. තෙනෙව ච අකාලෙ නික්‌ඛන්‌තත්‌තා කොසලරාජාදයො වාරෙතුං ආරභිංසු. පවාරෙත්‌වා හි චරණං බුද්‌ධාචිණ්‌ණ’’න්‌ති. පුණ්‌ණාය සම්‌මාපටිපත්‌තිං පච්‌චාසීසන්‌තො භගවා ‘‘මම නිවත්‌තනපච්‌චයා ත්‌වං කිං කරිස්‌සසී’’ති ආහ. පුණ්‌ණාපි…පෙ.… පබ්‌බජීති එත්‌ථ සෙට්‌ඨි ‘‘පුණ්‌ණාය භගවා නිවත්‌තිතො’’ති සුත්‌වා තං භුජිස්‌සං කත්‌වා ධීතුට්‌ඨානෙ ඨපෙසි. සා පබ්‌බජ්‌ජං යාචිත්‌වා පබ්‌බජි, පබ්‌බජිත්‌වා විපස්‌සනං ආරභි. අථස්‌සා සත්‌ථා ආරද්‌ධවිපස්‌සකභාවං ඤත්‌වා ඉමං ඔභාසගාථං විස්‌සජ්‌ජෙසි –
53. Dasame ‘‘vutthavasso pavāretvā…pe… nikkhamī’’ti aṅguttarabhāṇakānaṃ matenetaṃ vuttaṃ. Majjhimabhāṇakā pana vadanti ‘‘bhagavā upakaṭṭhāya vassūpanāyikāya jetavanato bhikkhusaṅghaparivuto cārikaṃ nikkhami. Teneva ca akāle nikkhantattā kosalarājādayo vāretuṃ ārabhiṃsu. Pavāretvā hi caraṇaṃ buddhāciṇṇa’’nti. Puṇṇāya sammāpaṭipattiṃ paccāsīsanto bhagavā ‘‘mama nivattanapaccayā tvaṃ kiṃ karissasī’’ti āha. Puṇṇāpi…pe… pabbajīti ettha seṭṭhi ‘‘puṇṇāya bhagavā nivattito’’ti sutvā taṃ bhujissaṃ katvā dhītuṭṭhāne ṭhapesi. Sā pabbajjaṃ yācitvā pabbaji, pabbajitvā vipassanaṃ ārabhi. Athassā satthā āraddhavipassakabhāvaṃ ñatvā imaṃ obhāsagāthaṃ vissajjesi –
‘‘පුණ්‌ණෙ පූරස්‌සු සද්‌ධම්‌මං, චන්‌දො පන්‌නරසො යථා;
‘‘Puṇṇe pūrassu saddhammaṃ, cando pannaraso yathā;
පරිපුණ්‌ණාය පඤ්‌ඤාය, දුක්‌ඛස්‌සන්‌තං කරිස්‌සසී’’ති. (ථෙරීගා. 3);
Paripuṇṇāya paññāya, dukkhassantaṃ karissasī’’ti. (therīgā. 3);
සා ගාථාපරියොසානෙ අරහත්‌තං පත්‌වා අභිඤ්‌ඤාතා සාවිකා අහොසි. සෙසමෙත්‌ථ සුවිඤ්‌ඤෙය්‍යමෙව.
Sā gāthāpariyosāne arahattaṃ patvā abhiññātā sāvikā ahosi. Sesamettha suviññeyyameva.
නන්‌දමාතාසුත්‌තවණ්‌ණනා නිට්‌ඨිතා.
Nandamātāsuttavaṇṇanā niṭṭhitā.
මහායඤ්‌ඤවග්‌ගවණ්‌ණනා නිට්‌ඨිතා.
Mahāyaññavaggavaṇṇanā niṭṭhitā.
පඨමපණ්‌ණාසකං නිට්‌ඨිතං.
Paṭhamapaṇṇāsakaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. නන්‌දමාතාසුත්‌තං • 10. Nandamātāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. නන්‌දමාතාසුත්‌තවණ්‌ණනා • 10. Nandamātāsuttavaṇṇanā
