| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. နာသေန္တိသုတ္တံ
6. Nāsentisuttaṃ
၃၀၉. ‘‘ပဉ္စိမာနိ, ဘိက္ခဝေ, မာတုဂာမသ္သ ဗလာနိ။ ကတမာနိ ပဉ္စ? ရူပဗလံ, ဘောဂဗလံ, ဉာတိဗလံ, ပုတ္တဗလံ, သီလဗလံ။ ရူပဗလေန စ, ဘိက္ခဝေ, မာတုဂာမော သမန္နာဂတော ဟောတိ, န စ သီလဗလေန, နာသေန္တေဝ နံ, ကုလေ န ဝာသေန္တိ။ ရူပဗလေန စ, ဘိက္ခဝေ, မာတုဂာမော သမန္နာဂတော ဟောတိ, ဘောဂဗလေန စ, န စ သီလဗလေန, နာသေန္တေဝ နံ, ကုလေ န ဝာသေန္တိ။ ရူပဗလေန စ, ဘိက္ခဝေ, မာတုဂာမော သမန္နာဂတော ဟောတိ, ဘောဂဗလေန စ, ဉာတိဗလေန စ, န စ သီလဗလေန, နာသေန္တေဝ နံ, ကုလေ န ဝာသေန္တိ။ ရူပဗလေန စ, ဘိက္ခဝေ, မာတုဂာမော သမန္နာဂတော ဟောတိ, ဘောဂဗလေန စ, ဉာတိဗလေန စ , ပုတ္တဗလေန စ, န စ သီလဗလေန, နာသေန္တေဝ နံ, ကုလေ န ဝာသေန္တိ။ သီလဗလေန စ, ဘိက္ခဝေ, မာတုဂာမော သမန္နာဂတော ဟောတိ, န စ ရူပဗလေန, ဝာသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂာမော သမန္နာဂတော ဟောတိ, န စ ဘောဂဗလေန, ဝာသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂာမော သမန္နာဂတော ဟောတိ, န စ ဉာတိဗလေန, ဝာသေန္တေဝ နံ, ကုလေ န နာသေန္တိ။ သီလဗလေန စ, ဘိက္ခဝေ, မာတုဂာမော သမန္နာဂတော ဟောတိ, န စ ပုတ္တဗလေန, ဝာသေန္တေဝ နံ, ကုလေ န နာသေန္တိ။ ဣမာနိ ခော, ဘိက္ခဝေ, ပဉ္စ မာတုဂာမသ္သ ဗလာနီ’’တိ။ ဆဋ္ဌံ။
309. ‘‘Pañcimāni, bhikkhave, mātugāmassa balāni. Katamāni pañca? Rūpabalaṃ, bhogabalaṃ, ñātibalaṃ, puttabalaṃ, sīlabalaṃ. Rūpabalena ca, bhikkhave, mātugāmo samannāgato hoti, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, na ca sīlabalena, nāsenteva naṃ, kule na vāsenti. Rūpabalena ca, bhikkhave, mātugāmo samannāgato hoti, bhogabalena ca, ñātibalena ca , puttabalena ca, na ca sīlabalena, nāsenteva naṃ, kule na vāsenti. Sīlabalena ca, bhikkhave, mātugāmo samannāgato hoti, na ca rūpabalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca bhogabalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca ñātibalena, vāsenteva naṃ, kule na nāsenti. Sīlabalena ca, bhikkhave, mātugāmo samannāgato hoti, na ca puttabalena, vāsenteva naṃ, kule na nāsenti. Imāni kho, bhikkhave, pañca mātugāmassa balānī’’ti. Chaṭṭhaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၁၀. ပသယ္ဟသုတ္တာဒိဝဏ္ဏနာ • 2-10. Pasayhasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၁၀. ပသယ္ဟသုတ္တာဒိဝဏ္ဏနာ • 2-10. Pasayhasuttādivaṇṇanā
