| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
නවගුය්‌හමන්‌තවිධංසකං
Navaguyhamantavidhaṃsakaṃ
‘‘භන්‌තෙ නාගසෙන, නවිමෙ පුග්‌ගලා මන්‌තිතං ගුය්‌හං විවරන්‌ති න ධාරෙන්‌ති. කතමෙ නව? රාගචරිතො දොසචරිතො මොහචරිතො භීරුකො ආමිසගරුකො ඉත්‌ථී සොණ්‌ඩො පණ්‌ඩකො දාරකො’’ති.
‘‘Bhante nāgasena, navime puggalā mantitaṃ guyhaṃ vivaranti na dhārenti. Katame nava? Rāgacarito dosacarito mohacarito bhīruko āmisagaruko itthī soṇḍo paṇḍako dārako’’ti.
ථෙරො ආහ ‘‘තෙසං කො දොසො’’ති? ‘‘රාගචරිතො, භන්‌තෙ නාගසෙන, රාගවසෙන මන්‌තිතං ගුය්‌හං විවරති න ධාරෙති, දොසචරිතො, භන්‌තෙ , දොසවසෙන මන්‌තිතං ගුය්‌හං විවරති න ධාරෙති, මූළ්‌හො මොහවසෙන මන්‌තිතං ගුය්‌හං විවරති න ධාරෙති, භීරුකො භයවසෙන මන්‌තිතං ගුය්‌හං විවරති න ධාරෙති, ආමිසගරුකො ආමිසහෙතු මන්‌තිතං ගුය්‌හං විවරති න ධාරෙති, ඉත්‌ථී පඤ්‌ඤාය ඉත්‌තරතාය මන්‌තිතං ගුය්‌හං විවරති න ධාරෙති, සොණ්‌ඩිකො සුරාලොලතාය මන්‌තිතං ගුය්‌හං විවරති න ධාරෙති, පණ්‌ඩකො අනෙකංසිකතාය මන්‌තිතං ගුය්‌හං විවරති න ධාරෙති, දාරකො චපලතාය මන්‌තිතං ගුය්‌හං විවරති න ධාරෙති. භවතීහ –
Thero āha ‘‘tesaṃ ko doso’’ti? ‘‘Rāgacarito, bhante nāgasena, rāgavasena mantitaṃ guyhaṃ vivarati na dhāreti, dosacarito, bhante , dosavasena mantitaṃ guyhaṃ vivarati na dhāreti, mūḷho mohavasena mantitaṃ guyhaṃ vivarati na dhāreti, bhīruko bhayavasena mantitaṃ guyhaṃ vivarati na dhāreti, āmisagaruko āmisahetu mantitaṃ guyhaṃ vivarati na dhāreti, itthī paññāya ittaratāya mantitaṃ guyhaṃ vivarati na dhāreti, soṇḍiko surālolatāya mantitaṃ guyhaṃ vivarati na dhāreti, paṇḍako anekaṃsikatāya mantitaṃ guyhaṃ vivarati na dhāreti, dārako capalatāya mantitaṃ guyhaṃ vivarati na dhāreti. Bhavatīha –
ඉත්‌ථී සොණ්‌ඩො පණ්‌ඩකො ච, නවමො භවති දාරකො.
Itthī soṇḍo paṇḍako ca, navamo bhavati dārako.
‘‘නවෙතෙ පුග්‌ගලා ලොකෙ, ඉත්‌තරා චලිතා චලා;
‘‘Navete puggalā loke, ittarā calitā calā;
එතෙහි මන්‌තිතං ගුය්‌හං, ඛිප්‌පං භවති පාකට’’’න්‌ති.
Etehi mantitaṃ guyhaṃ, khippaṃ bhavati pākaṭa’’’nti.
නව ගුය්‌හමන්‌තවිධංසකා පුග්‌ගලා.
Nava guyhamantavidhaṃsakā puggalā.
Footnotes:
