| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. နိဒ္ဓမနီယသုတ္တံ
10. Niddhamanīyasuttaṃ
၁၁၀. ‘‘ဒသယိမေ, ဘိက္ခဝေ, နိဒ္ဓမနီယာ ဓမ္မာ။ ကတမေ ဒသ? သမ္မာဒိဋ္ဌိကသ္သ, ဘိက္ခဝေ, မိစ္ဆာဒိဋ္ဌိ နိဒ္ဓန္တာ ဟောတိ; ယေ စ မိစ္ဆာဒိဋ္ဌိပစ္စယာ အနေကေ ပာပကာ အကုသလာ ဓမ္မာ သမ္ဘဝန္တိ တေ စသ္သ နိဒ္ဓန္တာ ဟောန္တိ; သမ္မာဒိဋ္ဌိပစ္စယာ စ အနေကေ ကုသလာ ဓမ္မာ ဘာဝနာပာရိပူရိံ ဂစ္ဆန္တိ ။
110. ‘‘Dasayime, bhikkhave, niddhamanīyā dhammā. Katame dasa? Sammādiṭṭhikassa, bhikkhave, micchādiṭṭhi niddhantā hoti; ye ca micchādiṭṭhipaccayā aneke pāpakā akusalā dhammā sambhavanti te cassa niddhantā honti; sammādiṭṭhipaccayā ca aneke kusalā dhammā bhāvanāpāripūriṃ gacchanti .
‘‘သမ္မာသင္ကပ္ပသ္သ, ဘိက္ခဝေ, မိစ္ဆာသင္ကပ္ပော နိဒ္ဓန္တော ဟောတိ။ပေ.။ သမ္မာဝာစသ္သ ဘိက္ခဝေ, မိစ္ဆာဝာစာ နိဒ္ဓန္တာ ဟောတိ။ သမ္မာကမ္မန္တသ္သ, ဘိက္ခဝေ, မိစ္ဆာကမ္မန္တော နိဒ္ဓန္တော ဟောတိ။ သမ္မာအာဇီဝသ္သ, ဘိက္ခဝေ, မိစ္ဆာအာဇီဝော နိဒ္ဓန္တော ဟောတိ။ သမ္မာဝာယာမသ္သ, ဘိက္ခဝေ, မိစ္ဆာဝာယာမော နိဒ္ဓန္တော ဟောတိ။ သမ္မာသတိသ္သ, ဘိက္ခဝေ, မိစ္ဆာသတိ နိဒ္ဓန္တာ ဟောတိ။ သမ္မာသမာဓိသ္သ, ဘိက္ခဝေ, မိစ္ဆာသမာဓိ နိဒ္ဓန္တော ဟောတိ။ သမ္မာဉာဏိသ္သ, ဘိက္ခဝေ, မိစ္ဆာဉာဏံ နိဒ္ဓန္တံ ဟောတိ။။
‘‘Sammāsaṅkappassa, bhikkhave, micchāsaṅkappo niddhanto hoti…pe… sammāvācassa bhikkhave, micchāvācā niddhantā hoti… sammākammantassa, bhikkhave, micchākammanto niddhanto hoti… sammāājīvassa, bhikkhave, micchāājīvo niddhanto hoti… sammāvāyāmassa, bhikkhave, micchāvāyāmo niddhanto hoti… sammāsatissa, bhikkhave, micchāsati niddhantā hoti… sammāsamādhissa, bhikkhave, micchāsamādhi niddhanto hoti… sammāñāṇissa, bhikkhave, micchāñāṇaṃ niddhantaṃ hoti….
‘‘သမ္မာဝိမုတ္တိသ္သ , ဘိက္ခဝေ, မိစ္ဆာဝိမုတ္တိ နိဒ္ဓန္တာ ဟောတိ; ယေ စ မိစ္ဆာဝိမုတ္တိပစ္စယာ အနေကေ ပာပကာ အကုသလာ ဓမ္မာ သမ္ဘဝန္တိ တေ စသ္သ နိဒ္ဓန္တာ ဟောန္တိ; သမ္မာဝိမုတ္တိပစ္စယာ စ အနေကေ ကုသလာ ဓမ္မာ ဘာဝနာပာရိပူရိံ ဂစ္ဆန္တိ။ ဣမေ ခော, ဘိက္ခဝေ, ဒသ နိဒ္ဓမနီယာ ဓမ္မာ’’တိ။ ဒသမံ။
‘‘Sammāvimuttissa , bhikkhave, micchāvimutti niddhantā hoti; ye ca micchāvimuttipaccayā aneke pāpakā akusalā dhammā sambhavanti te cassa niddhantā honti; sammāvimuttipaccayā ca aneke kusalā dhammā bhāvanāpāripūriṃ gacchanti. Ime kho, bhikkhave, dasa niddhamanīyā dhammā’’ti. Dasamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈-၁၀. တိကိစ္ဆကသုတ္တာဒိဝဏ္ဏနာ • 8-10. Tikicchakasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၂. သမဏသညာသုတ္တာဒိဝဏ္ဏနာ • 1-12. Samaṇasaññāsuttādivaṇṇanā
