| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
11. නිරාමිසසුත්‌තවණ්‌ණනා
11. Nirāmisasuttavaṇṇanā
279. එකාදසමෙ සාමිසාති කිලෙසාමිසෙන සාමිසා. නිරාමිසතරාති නිරාමිසායපි ඣානපීතියා නිරාමිසතරාව. නනු ච ද්‌වීසු ඣානෙසු පීති මහග්‌ගතාපි හොති ලොකුත්‌තරාපි, පච්‌චවෙක්‌ඛණපීති ලොකියාව, සා කස්‌මා නිරාමිසතරා ජාතාති? සන්‌තපණීතධම්‌මපච්‌චවෙක්‌ඛණවසෙන උප්‌පන්‌නත්‌තා. යථා හි රාජවල්‌ලභො චූළුපට්‌ඨාකො අප්‌පටිහාරිකං යථාසුඛං රාජකුලං පවිසන්‌තො සෙට්‌ඨිසෙනාපතිආදයො පාදෙන පහරන්‌තොපි න ගණෙති. කස්‌මා? රඤ්‌ඤො ආසන්‌නපරිචාරකත්‌තා. ඉති සො තෙහි උත්‌තරිතරො හොති, එවමයම්‌පි සන්‌තපණීතධම්‌මපච්‌චවෙක්‌ඛණවසෙන උප්‌පන්‌නත්‌තා ලොකුත්‌තරපීතිතොපි උත්‌තරිතරාති වෙදිතබ්‌බා. සෙසවාරෙසුපි එසෙව නයො.
279. Ekādasame sāmisāti kilesāmisena sāmisā. Nirāmisatarāti nirāmisāyapi jhānapītiyā nirāmisatarāva. Nanu ca dvīsu jhānesu pīti mahaggatāpi hoti lokuttarāpi, paccavekkhaṇapīti lokiyāva, sā kasmā nirāmisatarā jātāti? Santapaṇītadhammapaccavekkhaṇavasena uppannattā. Yathā hi rājavallabho cūḷupaṭṭhāko appaṭihārikaṃ yathāsukhaṃ rājakulaṃ pavisanto seṭṭhisenāpatiādayo pādena paharantopi na gaṇeti. Kasmā? Rañño āsannaparicārakattā. Iti so tehi uttaritaro hoti, evamayampi santapaṇītadhammapaccavekkhaṇavasena uppannattā lokuttarapītitopi uttaritarāti veditabbā. Sesavāresupi eseva nayo.
විමොක්‌ඛවාරෙ පන රූපපටිසංයුත්‌තො විමොක්‌ඛො අත්‌තනො ආරම්‌මණභූතෙන රූපාමිසවසෙනෙව සාමිසො නාම, අරූපපටිසංයුත්‌තො රූපාමිසාභාවෙන නිරාමිසො නාමාති.
Vimokkhavāre pana rūpapaṭisaṃyutto vimokkho attano ārammaṇabhūtena rūpāmisavaseneva sāmiso nāma, arūpapaṭisaṃyutto rūpāmisābhāvena nirāmiso nāmāti.
වෙදනාසංයුත්‌තවණ්‌ණනා නිට්‌ඨිතා.
Vedanāsaṃyuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 11. නිරාමිසසුත්‌තං • 11. Nirāmisasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 11. නිරාමිසසුත්‌තවණ්‌ණනා • 11. Nirāmisasuttavaṇṇanā
