| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. နိသ္သာရဏီယသုတ္တဝဏ္ဏနာ
10. Nissāraṇīyasuttavaṇṇanā
၂၀၀. ဒသမေ နိသ္သာရဏီယာတိ နိသ္သဋာ ဝိသညုတ္တာ။ ဓာတုယောတိ အတ္တသုညသဘာဝာ။ ကာမံ မနသိကရောတောတိ ကာမံ မနသိကရောန္တသ္သ, အသုဘဇ္ဈာနတော ဝုဋ္ဌာယ အဂဒံ ဂဟေတ္ဝာ ဝိသံ ဝီမံသန္တော ဝိယ ဝီမံသနတ္ထံ ကာမာဘိမုခံ စိတ္တံ ပေသေန္တသ္သာတိ အတ္ထော။ န ပက္ခန္ဒတီတိ နပ္ပဝိသတိ။ နပ္ပသီဒတီတိ ပသာဒံ နာပဇ္ဇတိ။ န သန္တိဋ္ဌတီတိ နပ္ပတိဋ္ဌဟတိ။ န ဝိမုစ္စတီတိ န အဓိမုစ္စတိ။ ယထာ ပန ကုက္ကုဋပတ္တံ ဝာ န္ဟာရုဒဒ္ဒုလံ ဝာ အဂ္ဂိမ္ဟိ ပက္ခိတ္တံ ပဋိလီယတိ ပတိကုဋတိ ပတိဝဋ္ဋတိ န သံပသာရီယတိ, ဧဝံ ပဋိလီယတိ န သံပသာရီယတိ။ နေက္ခမ္မံ ခော ပနာတိ ဣဓ နေက္ခမ္မံ နာမ အသုဘေသု ပဌမဇ္ဈာနံ, တဒသ္သ မနသိကရောတော စိတ္တံ ပက္ခန္ဒတိ။ တသ္သ တံ စိတ္တန္တိ တသ္သ တံ အသုဘဇ္ဈာနစိတ္တံ။ သုဂတန္တိ ဂောစရေ ဂတတ္တာ သုဋ္ဌု ဂတံ။ သုဘာဝိတန္တိ အဟာနဘာဂိယတ္တာ သုဋ္ဌု ဘာဝိတံ။ သုဝုဋ္ဌိတန္တိ ကာမတော ဝုဋ္ဌိတံ။ သုဝိမုတ္တန္တိ ကာမေဟိ သုဋ္ဌု ဝိမုတ္တံ။ ကာမပစ္စယာ အာသဝာ နာမ ကာမဟေတုကာ စတ္တာရော အာသဝာ။ ဝိဃာတာတိ ဒုက္ခာ။ ပရိဠာဟာတိ ကာမရာဂပရိဠာဟာ။ န သော တံ ဝေဒနံ ဝေဒိယတီတိ သော တံ ကာမဝေဒနံ ဝိဃာတပရိဠာဟဝေဒနဉ္စ န ဝေဒိယတိ။ ဣဒမက္ခာတံ ကာမာနံ နိသ္သရဏန္တိ ဣဒံ အသုဘဇ္ဈာနံ ကာမေဟိ နိသ္သဋတ္တာ ကာမာနံ နိသ္သရဏန္တိ အက္ခာတံ။ ယော ပန တံ ဈာနံ ပာဒကံ ကတ္ဝာ သင္ခာရေ သမ္မသန္တော တတိယမဂ္ဂံ ပတ္ဝာ အနာဂာမိဖလေန နိဗ္ဗာနံ ဒိသ္ဝာ ‘‘ပုန ကာမာ နာမ နတ္ထီ’’တိ ဇာနာတိ။ တသ္သ စိတ္တံ အစ္စန္တနိသ္သရဏမေဝ။ သေသပဒေသုပိ ဧသေဝ နယော။
200. Dasame nissāraṇīyāti nissaṭā visaññuttā. Dhātuyoti attasuññasabhāvā. Kāmaṃ manasikarototi kāmaṃ manasikarontassa, asubhajjhānato vuṭṭhāya agadaṃ gahetvā visaṃ vīmaṃsanto viya vīmaṃsanatthaṃ kāmābhimukhaṃ cittaṃ pesentassāti attho. Na pakkhandatīti nappavisati. Nappasīdatīti pasādaṃ nāpajjati. Na santiṭṭhatīti nappatiṭṭhahati. Na vimuccatīti na adhimuccati. Yathā pana kukkuṭapattaṃ vā nhārudaddulaṃ vā aggimhi pakkhittaṃ paṭilīyati patikuṭati pativaṭṭati na saṃpasārīyati, evaṃ paṭilīyati na saṃpasārīyati. Nekkhammaṃ kho panāti idha nekkhammaṃ nāma asubhesu paṭhamajjhānaṃ, tadassa manasikaroto cittaṃ pakkhandati. Tassa taṃ cittanti tassa taṃ asubhajjhānacittaṃ. Sugatanti gocare gatattā suṭṭhu gataṃ. Subhāvitanti ahānabhāgiyattā suṭṭhu bhāvitaṃ. Suvuṭṭhitanti kāmato vuṭṭhitaṃ. Suvimuttanti kāmehi suṭṭhu vimuttaṃ. Kāmapaccayā āsavā nāma kāmahetukā cattāro āsavā. Vighātāti dukkhā. Pariḷāhāti kāmarāgapariḷāhā. Na so taṃ vedanaṃ vediyatīti so taṃ kāmavedanaṃ vighātapariḷāhavedanañca na vediyati. Idamakkhātaṃ kāmānaṃ nissaraṇanti idaṃ asubhajjhānaṃ kāmehi nissaṭattā kāmānaṃ nissaraṇanti akkhātaṃ. Yo pana taṃ jhānaṃ pādakaṃ katvā saṅkhāre sammasanto tatiyamaggaṃ patvā anāgāmiphalena nibbānaṃ disvā ‘‘puna kāmā nāma natthī’’ti jānāti. Tassa cittaṃ accantanissaraṇameva. Sesapadesupi eseva nayo.
အယံ ပန ဝိသေသော – ဒုတိယဝာရေ မေတ္တာဈာနာနိ ဗ္ယာပာဒသ္သ နိသ္သရဏံ နာမ။ တတိယဝာရေ ကရုဏာဈာနာနိ ဝိဟိံသာယ နိသ္သရဏံ နာမ။ စတုတ္ထဝာရေ အရူပဇ္ဈာနာနိ ရူပာနံ နိသ္သရဏံ နာမ။ အစ္စန္တနိသ္သရဏဉ္စေတ္ထ အရဟတ္တဖလံ ယောဇေတဗ္ဗံ။ ပဉ္စမဝာရေ သက္ကာယံ မနသိကရောတောတိ သုဒ္ဓသင္ခာရေ ပရိဂ္ဂဏ္ဟိတ္ဝာ အရဟတ္တံ ပတ္တသ္သ သုက္ခဝိပသ္သကသ္သ ဖလသမာပတ္တိတော ဝုဋ္ဌာယ ဝီမံသနတ္ထံ ပဉ္စုပာဒာနက္ခန္ဓာဘိမုခံ စိတ္တံ ပေသေန္တသ္သ။ ဣဒမက္ခာတံ သက္ကာယသ္သ နိသ္သရဏန္တိ ဣဒံ အရဟတ္တမဂ္ဂေန စ ဖလေန စ နိဗ္ဗာနံ ဒိသ္ဝာ ဌိတသ္သ ဘိက္ခုနော ‘‘ပုန သက္ကာယော နတ္ထီ’’တိ ဥပ္ပန္နံ အရဟတ္တဖလသမာပတ္တိစိတ္တံ သက္ကာယသ္သ နိသ္သရဏန္တိ အက္ခာတံ။ ဣဒာနိ ဧဝံ သက္ကာယနိသ္သရဏံ နိရောဓံ ပတ္ဝာ ဌိတသ္သ ခီဏာသဝသ္သ ဝဏ္ဏံ ကထေန္တော တသ္သ ကာမနန္ဒီပိ နာနုသေတီတိအာဒိမာဟ။ တတ္ထ နာနုသေတီတိ န နိဗ္ဗတ္တတိ။ အနနုသယာတိ အနိဗ္ဗတ္တိယာ။ သေသမေတ္ထ ဥတ္တာနတ္ထမေဝာတိ။
Ayaṃ pana viseso – dutiyavāre mettājhānāni byāpādassa nissaraṇaṃ nāma. Tatiyavāre karuṇājhānāni vihiṃsāya nissaraṇaṃ nāma. Catutthavāre arūpajjhānāni rūpānaṃ nissaraṇaṃ nāma. Accantanissaraṇañcettha arahattaphalaṃ yojetabbaṃ. Pañcamavāre sakkāyaṃ manasikarototi suddhasaṅkhāre pariggaṇhitvā arahattaṃ pattassa sukkhavipassakassa phalasamāpattito vuṭṭhāya vīmaṃsanatthaṃ pañcupādānakkhandhābhimukhaṃ cittaṃ pesentassa. Idamakkhātaṃ sakkāyassa nissaraṇanti idaṃ arahattamaggena ca phalena ca nibbānaṃ disvā ṭhitassa bhikkhuno ‘‘puna sakkāyo natthī’’ti uppannaṃ arahattaphalasamāpatticittaṃ sakkāyassa nissaraṇanti akkhātaṃ. Idāni evaṃ sakkāyanissaraṇaṃ nirodhaṃ patvā ṭhitassa khīṇāsavassa vaṇṇaṃ kathento tassa kāmanandīpi nānusetītiādimāha. Tattha nānusetīti na nibbattati. Ananusayāti anibbattiyā. Sesamettha uttānatthamevāti.
ဗ္ရာဟ္မဏဝဂ္ဂော ပဉ္စမော။
Brāhmaṇavaggo pañcamo.
စတုတ္ထပဏ္ဏာသကံ နိဋ္ဌိတံ။
Catutthapaṇṇāsakaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. နိသ္သာရဏီယသုတ္တံ • 10. Nissāraṇīyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. နိသ္သာရဏီယသုတ္တဝဏ္ဏနာ • 10. Nissāraṇīyasuttavaṇṇanā
