| Library / Tipiṭaka / තිපිටක • Tipiṭaka / නෙත්‌තිප්‌පකරණපාළි • Nettippakaraṇapāḷi |
12. ඔතරණහාරසම්‌පාතො
12. Otaraṇahārasampāto
74. තත්‌ථ කතමො ඔතරණො හාරසම්‌පාතො?
74. Tattha katamo otaraṇo hārasampāto?
‘‘තස්‌මා රක්‌ඛිතචිත්‌තස්‌ස, සම්‌මාසඞ්‌කප්‌පගොචරො’’ති ගාථා. ‘‘තස්‌මා රක්‌ඛිතචිත්‌තස්‌ස, සම්‌මාසඞ්‌කප්‌පගොචරො’’ . ‘‘සම්‌මාදිට්‌ඨිපුරෙක්‌ඛාරො’’ති සම්‌මාදිට්‌ඨියා ගහිතාය ගහිතානි භවන්‌ති පඤ්‌චින්‌ද්‍රියානි, අයං ඉන්‌ද්‍රියෙහි ඔතරණා.
‘‘Tasmā rakkhitacittassa, sammāsaṅkappagocaro’’ti gāthā. ‘‘Tasmā rakkhitacittassa, sammāsaṅkappagocaro’’ . ‘‘Sammādiṭṭhipurekkhāro’’ti sammādiṭṭhiyā gahitāya gahitāni bhavanti pañcindriyāni, ayaṃ indriyehi otaraṇā.
තානියෙව ඉන්‌ද්‍රියානි විජ්‌ජා, විජ්‌ජුප්‌පාදා අවිජ්‌ජානිරොධො, අවිජ්‌ජානිරොධා සඞ්‌ඛාරනිරොධො, සඞ්‌ඛාරනිරොධා විඤ්‌ඤාණනිරොධො, එවං සබ්‌බං, අයං පටිච්‌චසමුප්‌පාදෙන ඔතරණා.
Tāniyeva indriyāni vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, evaṃ sabbaṃ, ayaṃ paṭiccasamuppādena otaraṇā.
තානියෙව පඤ්‌චින්‌ද්‍රියානි තීහි ඛන්‌ධෙහි සඞ්‌ගහිතානි – සීලක්‌ඛන්‌ධෙන සමාධික්‌ඛන්‌ධෙන පඤ්‌ඤාක්‌ඛන්‌ධෙන. අයං ඛන්‌ධෙහි ඔතරණා.
Tāniyeva pañcindriyāni tīhi khandhehi saṅgahitāni – sīlakkhandhena samādhikkhandhena paññākkhandhena. Ayaṃ khandhehi otaraṇā.
තානි යෙව පඤ්‌චින්‌ද්‍රියානි සඞ්‌ඛාරපරියාපන්‌නානි. යෙ සඞ්‌ඛාරා අනාසවා නො ච භවඞ්‌ගා, තෙ සඞ්‌ඛාරා ධම්‌මධාතුසඞ්‌ගහිතා, අයං ධාතූහි ඔතරණා.
Tāni yeva pañcindriyāni saṅkhārapariyāpannāni. Ye saṅkhārā anāsavā no ca bhavaṅgā, te saṅkhārā dhammadhātusaṅgahitā, ayaṃ dhātūhi otaraṇā.
සා ධම්‌මධාතු ධම්‌මායතනපරියාපන්‌නා, යං ආයතනං අනාසවං නො ච භවඞ්‌ගං, අයං ආයතනෙහි ඔතරණා.
Sā dhammadhātu dhammāyatanapariyāpannā, yaṃ āyatanaṃ anāsavaṃ no ca bhavaṅgaṃ, ayaṃ āyatanehi otaraṇā.
නියුත්‌තො ඔතරණො හාරසම්‌පාතො.
Niyutto otaraṇo hārasampāto.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / ඛුද්‌දකනිකාය (ටීකා) • Khuddakanikāya (ṭīkā) / නෙත්‌තිවිභාවිනී • Nettivibhāvinī / 12. ඔතරණහාරසම්‌පාතවිභාවනා • 12. Otaraṇahārasampātavibhāvanā
