Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၁. ပဘင္ဂုသုတ္တံ
11. Pabhaṅgusuttaṃ
၃၂. သာဝတ္ထိနိဒာနံ။ ‘‘ပဘင္ဂုဉ္စ, ဘိက္ခဝေ, ဒေသေသ္သာမိ အပ္ပဘင္ဂုဉ္စ။ တံ သုဏာထ။ ကိဉ္စ, ဘိက္ခဝေ, ပဘင္ဂု, ကိံ အပ္ပဘင္ဂု? ရူပံ , ဘိက္ခဝေ, ပဘင္ဂု။ ယော တသ္သ နိရောဓော ဝူပသမော အတ္ထင္ဂမော, ဣဒံ အပ္ပဘင္ဂု။ ဝေဒနာ ပဘင္ဂု။ ယော တသ္သာ နိရောဓော ဝူပသမော အတ္ထင္ဂမော, ဣဒံ အပ္ပဘင္ဂု။ သညာ ပဘင္ဂု။ သင္ခာရာ ပဘင္ဂု။ ယော တေသံ နိရောဓော ဝူပသမော အတ္ထင္ဂမော, ဣဒံ အပ္ပဘင္ဂု။ ဝိညာဏံ ပဘင္ဂု။ ယော တသ္သ နိရောဓော ဝူပသမော အတ္ထင္ဂမော, ဣဒံ အပ္ပဘင္ဂူ’’တိ။ ဧကာဒသမံ။
32. Sāvatthinidānaṃ. ‘‘Pabhaṅguñca, bhikkhave, desessāmi appabhaṅguñca. Taṃ suṇātha. Kiñca, bhikkhave, pabhaṅgu, kiṃ appabhaṅgu? Rūpaṃ , bhikkhave, pabhaṅgu. Yo tassa nirodho vūpasamo atthaṅgamo, idaṃ appabhaṅgu. Vedanā pabhaṅgu. Yo tassā nirodho vūpasamo atthaṅgamo, idaṃ appabhaṅgu. Saññā pabhaṅgu… saṅkhārā pabhaṅgu. Yo tesaṃ nirodho vūpasamo atthaṅgamo, idaṃ appabhaṅgu. Viññāṇaṃ pabhaṅgu. Yo tassa nirodho vūpasamo atthaṅgamo, idaṃ appabhaṅgū’’ti. Ekādasamaṃ.
ဘာရဝဂ္ဂော တတိယော။
Bhāravaggo tatiyo.
တသ္သုဒ္ဒာနံ –
Tassuddānaṃ –
ဘာရံ ပရိညံ အဘိဇာနံ၊ ဆန္ဒရာဂံ စတုတ္ထကံ။
Bhāraṃ pariññaṃ abhijānaṃ, chandarāgaṃ catutthakaṃ;
အသ္သာဒာ စ တယော ဝုတ္တာ၊ အဘိနန္ဒနမဋ္ဌမံ။
Assādā ca tayo vuttā, abhinandanamaṭṭhamaṃ;
ဥပ္ပာဒံ အဃမူလဉ္စ၊ ဧကာဒသမော ပဘင္ဂူတိ။
Uppādaṃ aghamūlañca, ekādasamo pabhaṅgūti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၁. ပဘင္ဂုသုတ္တဝဏ္ဏနာ • 11. Pabhaṅgusuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၁. ပဘင္ဂုသုတ္တဝဏ္ဏနာ • 11. Pabhaṅgusuttavaṇṇanā