| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
පකාසනීයකම්‌මාදිකථා
Pakāsanīyakammādikathā
336. ඛෙළාසකස්‌සාති එත්‌ථ මිච්‌ඡාජීවෙන උප්‌පන්‌නපච්‌චයා අරියෙහි වන්‌තබ්‌බා ඛෙළසදිසා, තථාරූපෙ පච්‌චයෙ අයං අජ්‌ඣොහරතීති කත්‌වා ඛෙළාසකොති භගවතා වුත්‌තො.
336.Kheḷāsakassāti ettha micchājīvena uppannapaccayā ariyehi vantabbā kheḷasadisā, tathārūpe paccaye ayaṃ ajjhoharatīti katvā kheḷāsakoti bhagavatā vutto.
340. පත්‌ථද්‌ධෙන කායෙනාති පොත්‌ථකරූපසදිසෙන නිච්‌චලෙන කායෙන.
340.Patthaddhena kāyenāti potthakarūpasadisena niccalena kāyena.
342. මයං ඛො භණෙ රාජඤාතකා නාමාති රාජා අම්‌හෙ ජානාතීති රාජඤාතකස්‌ස භාවෙන අත්‌තානං උක්‌කංසන්‌තො ආහ. පහට්‌ඨකණ්‌ණවාලොති බන්‌ධනෙ නිච්‌චලෙ කත්‌වා.
342.Mayaṃ kho bhaṇe rājañātakā nāmāti rājā amhe jānātīti rājañātakassa bhāvena attānaṃ ukkaṃsanto āha. Pahaṭṭhakaṇṇavāloti bandhane niccale katvā.
දුක්‌ඛඤ්‌හි කුඤ්‌ජර නාගමාසදොති භො කුඤ්‌ජර බුද්‌ධනාගං ආසාදනං වධකචිත්‌තෙන උපගමනං නාම දුක්‌ඛං. නාගහතස්‌සාති බුද්‌ධනාගං ඝාතකස්‌ස.
Dukkhañhi kuñjara nāgamāsadoti bho kuñjara buddhanāgaṃ āsādanaṃ vadhakacittena upagamanaṃ nāma dukkhaṃ. Nāgahatassāti buddhanāgaṃ ghātakassa.
පටිකුටියොව ඔසක්‌කීති තථාගතාභිමුඛොයෙව පිට්‌ඨිමෙහි පාදෙහි අවසක්‌කි. අලක්‌ඛිකොති එත්‌ථ න ලක්‌ඛෙතීති අලක්‌ඛිකො; න ජානාතීති අත්‌ථො , අහං පාපකම්‌මං කරොමීති න ජානාති. න ලක්‌ඛිතබ්‌බොති වා අලක්‌ඛිකො; න පස්‌සිතබ්‌බොති අත්‌ථො.
Paṭikuṭiyova osakkīti tathāgatābhimukhoyeva piṭṭhimehi pādehi avasakki. Alakkhikoti ettha na lakkhetīti alakkhiko; na jānātīti attho , ahaṃ pāpakammaṃ karomīti na jānāti. Na lakkhitabboti vā alakkhiko; na passitabboti attho.
343. තිකභොජනන්‌ති එත්‌ථ තීහි ජනෙහි භුඤ්‌ජිතබ්‌බභොජනං. තං පඤ්‌ඤාපෙස්‌සාමීති තං අනුජානිස්‌සාමි . ගණභොජනෙ පන යථාධම්‌මො කාරෙතබ්‌බොති. පඤ්‌චවත්‌ථුයාචනකථා සඞ්‌ඝාදිසෙසවණ්‌ණනායං වුත්‌තා. කප්‌පන්‌ති ආයුකප්‌පං. බ්‍රහ්‌මං පුඤ්‌ඤන්‌ති සෙට්‌ඨං පුඤ්‌ඤං. කප්‌පං සග්‌ගම්‌හීති ආයුකප්‌පමෙව.
343.Tikabhojananti ettha tīhi janehi bhuñjitabbabhojanaṃ. Taṃ paññāpessāmīti taṃ anujānissāmi . Gaṇabhojane pana yathādhammo kāretabboti. Pañcavatthuyācanakathā saṅghādisesavaṇṇanāyaṃ vuttā. Kappanti āyukappaṃ. Brahmaṃ puññanti seṭṭhaṃ puññaṃ. Kappaṃ saggamhīti āyukappameva.
පකාසනීයකම්‌මාදිකථා නිට්‌ඨිතා.
Pakāsanīyakammādikathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
පකාසනීයකම්‌මං • Pakāsanīyakammaṃ
අභිමාරපෙසනං • Abhimārapesanaṃ
නාළාගිරිපෙසනං • Nāḷāgiripesanaṃ
පඤ්‌චවත්‌ථුයාචනකථා • Pañcavatthuyācanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
නාළාගිරිපෙසනකථාවණ්‌ණනා • Nāḷāgiripesanakathāvaṇṇanā
පඤ්‌චවත්‌ථුයාචනකථාවණ්‌ණනා • Pañcavatthuyācanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡසක්‍යපබ්‌බජ්‌ජාකථාවණ්‌ණනා • Chasakyapabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡසක්‍යපබ්‌බජ්‌ජාකථාදිවණ්‌ණනා • Chasakyapabbajjākathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / පකාසනීයකම්‌මාදිකථා • Pakāsanīyakammādikathā
