| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဂိလာနဝဂ္ဂော
2. Gilānavaggo
၁. ပာဏသုတ္တံ
1. Pāṇasuttaṃ
၁၉၂. ‘‘သေယ္ယထာပိ , ဘိက္ခဝေ, ယေ ကေစိ ပာဏာ စတ္တာရော ဣရိယာပထေ ကပ္ပေန္တိ – ကာလေန ဂမနံ, ကာလေန ဌာနံ, ကာလေန နိသဇ္ဇံ, ကာလေန သေယ္ယံ, သဗ္ဗေ တေ ပထဝိံ နိသ္သာယ ပထဝိယံ ပတိဋ္ဌာယ ဧဝမေတေ စတ္တာရော ဣရိယာပထေ ကပ္ပေန္တိ; ဧဝမေဝ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတိ။
192. ‘‘Seyyathāpi , bhikkhave, ye keci pāṇā cattāro iriyāpathe kappenti – kālena gamanaṃ, kālena ṭhānaṃ, kālena nisajjaṃ, kālena seyyaṃ, sabbe te pathaviṃ nissāya pathaviyaṃ patiṭṭhāya evamete cattāro iriyāpathe kappenti; evameva kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāveti, satta bojjhaṅge bahulīkaroti.
‘‘ကထဉ္စ , ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေတိ သတ္တ ဗောဇ္ဈင္ဂေ ဗဟုလီကရောတိ? ဣဓ, ဘိက္ခဝေ, ဘိက္ခု သတိသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ပေ.။ ဥပေက္ခာသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတီ’’တိ။ ပဌမံ။
‘‘Kathañca , bhikkhave, bhikkhu sīlaṃ nissāya sīle patiṭṭhāya satta bojjhaṅge bhāveti satta bojjhaṅge bahulīkaroti? Idha, bhikkhave, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāveti, satta bojjhaṅge bahulīkarotī’’ti. Paṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၃. ပာဏသုတ္တာဒိဝဏ္ဏနာ • 1-3. Pāṇasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၃. ပာဏသုတ္တာဒိဝဏ္ဏနာ • 1-3. Pāṇasuttādivaṇṇanā
