| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. ပာဏသုတ္တံ
6. Pāṇasuttaṃ
၁၁၀၆. ‘‘သေယ္ယထာပိ, ဘိက္ခဝေ, ပုရိသော ယံ ဣမသ္မိံ ဇမ္ဗုဒီပေ တိဏကဋ္ဌသာခာပလာသံ တစ္ဆေတ္ဝာ ဧကဇ္ဈံ သံဟရေယ္ယ; ဧကဇ္ဈံ သံဟရိတ္ဝာ သူလံ ကရေယ္ယ။ သူလံ ကရိတ္ဝာ ယေ မဟာသမုဒ္ဒေ မဟန္တကာ ပာဏာ တေ မဟန္တကေသု သူလေသု အာဝုနေယ္ယ, ယေ မဟာသမုဒ္ဒေ မဇ္ဈိမကာ ပာဏာ တေ မဇ္ဈိမကေသု သူလေသု အာဝုနေယ္ယ, ယေ မဟာသမုဒ္ဒေ သုခုမကာ ပာဏာ တေ သုခုမကေသု သူလေသု အာဝုနေယ္ယ။ အပရိယာဒိန္နာ စ, ဘိက္ခဝေ, မဟာသမုဒ္ဒေ ဩဠာရိကာ ပာဏာ အသ္သု။
1106. ‘‘Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ tacchetvā ekajjhaṃ saṃhareyya; ekajjhaṃ saṃharitvā sūlaṃ kareyya. Sūlaṃ karitvā ye mahāsamudde mahantakā pāṇā te mahantakesu sūlesu āvuneyya, ye mahāsamudde majjhimakā pāṇā te majjhimakesu sūlesu āvuneyya, ye mahāsamudde sukhumakā pāṇā te sukhumakesu sūlesu āvuneyya. Apariyādinnā ca, bhikkhave, mahāsamudde oḷārikā pāṇā assu.
‘‘အထ ဣမသ္မိံ ဇမ္ဗုဒီပေ တိဏကဋ္ဌသာခာပလာသံ ပရိက္ခယံ ပရိယာဒာနံ ဂစ္ဆေယ္ယ။ ဣတော ဗဟုတရာ ခော, ဘိက္ခဝေ, မဟာသမုဒ္ဒေ သုခုမကာ ပာဏာ, ယေ န သုကရာ သူလေသု အာဝုနိတုံ။ တံ ကိသ္သ ဟေတု? သုခုမတ္တာ , ဘိက္ခဝေ, အတ္တဘာဝသ္သ။ ဧဝံ မဟာ ခော, ဘိက္ခဝေ, အပာယော။ ဧဝံ မဟန္တသ္မာ ခော, ဘိက္ခဝေ, အပာယသ္မာ ပရိမုတ္တော ဒိဋ္ဌိသမ္ပန္နော ပုဂ္ဂလော ‘ဣဒံ ဒုက္ခ’န္တိ ယထာဘူတံ ပဇာနာတိ။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယထာဘူတံ ပဇာနာတိ။
‘‘Atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Ito bahutarā kho, bhikkhave, mahāsamudde sukhumakā pāṇā, ye na sukarā sūlesu āvunituṃ. Taṃ kissa hetu? Sukhumattā , bhikkhave, attabhāvassa. Evaṃ mahā kho, bhikkhave, apāyo. Evaṃ mahantasmā kho, bhikkhave, apāyasmā parimutto diṭṭhisampanno puggalo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti.
‘‘တသ္မာတိဟ, ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ ဆဋ္ဌံ။
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
