Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. ပညတ္တိသုတ္တံ
5. Paññattisuttaṃ
၁၅. ‘‘စတသ္သော ဣမာ, ဘိက္ခဝေ, အဂ္ဂပညတ္တိယော။ ကတမာ စတသ္သော? ဧတဒဂ္ဂံ, ဘိက္ခဝေ, အတ္တဘာဝီနံ ယဒိဒံ – ရာဟု အသုရိန္ဒော။ ဧတဒဂ္ဂံ, ဘိက္ခဝေ, ကာမဘောဂီနံ ယဒိဒံ – ရာဇာ မန္ဓာတာ။ ဧတဒဂ္ဂံ, ဘိက္ခဝေ, အာဓိပတေယ္ယာနံ ယဒိဒံ – မာရော ပာပိမာ။ သဒေဝကေ, ဘိက္ခဝေ, လောကေ သမာရကေ သဗ္ရဟ္မကေ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ တထာဂတော အဂ္ဂမက္ခာယတိ အရဟံ သမ္မာသမ္ဗုဒ္ဓော။ ဣမာ ခော, ဘိက္ခဝေ, စတသ္သော အဂ္ဂပညတ္တိယော’’တိ။
15. ‘‘Catasso imā, bhikkhave, aggapaññattiyo. Katamā catasso? Etadaggaṃ, bhikkhave, attabhāvīnaṃ yadidaṃ – rāhu asurindo. Etadaggaṃ, bhikkhave, kāmabhogīnaṃ yadidaṃ – rājā mandhātā. Etadaggaṃ, bhikkhave, ādhipateyyānaṃ yadidaṃ – māro pāpimā. Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato aggamakkhāyati arahaṃ sammāsambuddho. Imā kho, bhikkhave, catasso aggapaññattiyo’’ti.
‘‘ရာဟုဂ္ဂံ အတ္တဘာဝီနံ၊ မန္ဓာတာ ကာမဘောဂိနံ။
‘‘Rāhuggaṃ attabhāvīnaṃ, mandhātā kāmabhoginaṃ;
မာရော အာဓိပတေယ္ယာနံ၊ ဣဒ္ဓိယာ ယသသာ ဇလံ။
Māro ādhipateyyānaṃ, iddhiyā yasasā jalaṃ.
‘‘ဥဒ္ဓံ တိရိယံ အပာစီနံ၊ ယာဝတာ ဇဂတော ဂတိ။
‘‘Uddhaṃ tiriyaṃ apācīnaṃ, yāvatā jagato gati;
သဒေဝကသ္သ လောကသ္သ၊ ဗုဒ္ဓော အဂ္ဂော ပဝုစ္စတီ’’တိ။ ပဉ္စမံ။
Sadevakassa lokassa, buddho aggo pavuccatī’’ti. pañcamaṃ;
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ပညတ္တိသုတ္တဝဏ္ဏနာ • 5. Paññattisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. ပညတ္တိသုတ္တဝဏ္ဏနာ • 5. Paññattisuttavaṇṇanā