| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
පරිවාරවණ්‌ණනා
Parivāravaṇṇanā
මහාවග්‌ගො
Mahāvaggo
පඤ්‌ඤත්‌තිවාරවණ්‌ණනා
Paññattivāravaṇṇanā
1. විසුද්‌ධපරිවාරස්‌ස සීලක්‌ඛන්‌ධාදිධම්‌මක්‌ඛන්‌ධසරීරස්‌ස භගවතො විනයපරියත්‌තිසාසනෙ ඛන්‌ධකානං අනන්‌තරං පරිවාරොති යො විනයො සඞ්‌ගහං සමාරුළ්‌හො, තස්‌ස දානි අනුත්‌තානත්‌ථවණ්‌ණනං කරිස්‌සාමීති යොජනා.
1. Visuddhaparivārassa sīlakkhandhādidhammakkhandhasarīrassa bhagavato vinayapariyattisāsane khandhakānaṃ anantaraṃ parivāroti yo vinayo saṅgahaṃ samāruḷho, tassa dāni anuttānatthavaṇṇanaṃ karissāmīti yojanā.
සමන්‌තචක්‌ඛුනාති සබ්‌බඤ්‌ඤුතඤ්‌ඤාණෙන. අතිවිසුද්‌ධෙන මංසචක්‌ඛුනාති රත්‌තින්‌දිවං සමන්‌තා යොජනප්‌පමාණෙ අතිසුඛුමානිපි රූපානි පස්‌සනතො අතිවිය පරිසුද්‌ධෙන පසාදචක්‌ඛුනා. ‘‘අත්‌ථි තත්‌ථ පඤ්‌ඤත්‌තී’’තිආදීසු අත්‌ථි නු ඛො තත්‌ථ පඤ්‌ඤත්‌තීතිආදිනා අත්‌ථො ගහෙතබ්‌බොති ආහ ‘‘තත්‌ථ පඤ්‌ඤත්‌ති…පෙ.… කෙනාභතන්‌ති පුච්‌ඡා’’ති.
Samantacakkhunāti sabbaññutaññāṇena. Ativisuddhena maṃsacakkhunāti rattindivaṃ samantā yojanappamāṇe atisukhumānipi rūpāni passanato ativiya parisuddhena pasādacakkhunā. ‘‘Atthi tattha paññattī’’tiādīsu atthi nu kho tattha paññattītiādinā attho gahetabboti āha ‘‘tattha paññatti…pe… kenābhatanti pucchā’’ti.
2. පුච්‌ඡාවිස්‌සජ්‌ජනෙති පුච්‌ඡාය විස්‌සජ්‌ජනෙ. විනීතකථාති විනීතවත්‌ථුකථා, අයමෙව වා පාඨො.
2.Pucchāvissajjaneti pucchāya vissajjane. Vinītakathāti vinītavatthukathā, ayameva vā pāṭho.
ද්‌වඞ්‌ගිකෙන එකෙන සමුට්‌ඨානෙනාති අඞ්‌ගද්‌වයසමුදායභූතෙන එකෙන. අඞ්‌ගද්‌වයවිමුත්‌තස්‌ස සමුට්‌ඨානස්‌ස අභාවෙපි තෙසු එකෙනඞ්‌ගෙන විනා අයං ආපත්‌ති න හොතීති දස්‌සනත්‌ථමෙව ‘‘එකෙන සමුට්‌ඨානෙනා’’ති වුත්‌තං. ඉදානි තෙසු ද්‌වීසු අඞ්‌ගෙසු පධානඞ්‌ගං දස්‌සෙතුමාහ ‘‘එත්‌ථ හි චිත්‌තං අඞ්‌ගං හොතී’’තිආදි. යස්‌මා පන මග්‌ගෙනමග්‌ගප්‌පටිපත්‌තිසඞ්‌ඛාතාය කායවිඤ්‌ඤත්‌තියා සෙවනචිත්‌තෙනෙව සම්‌භවෙ සති අයං තං අඞ්‌ගද්‌වයං උපාදාය භගවතා පඤ්‌ඤත්‌තා ආපත්‌තිසම්‌මුති හොති, නාසති. තස්‌මා තං චිත්‌තං කායවිඤ්‌ඤත්‌තිසඞ්‌ඛාතස්‌ස කායස්‌ස අඞ්‌ගං කාරණං හොති, න ආපත්‌තියා. තස්‌ස පන තංසමුට්‌ඨිතකායො එව අඞ්‌ගං අබ්‍යවහිතකාරණං, චිත්‌තං පන කාරණකාරණන්‌ති අධිප්‌පායො. එවං උපරිපි සබ්‌බත්‌ථ චිත්‌තඞ්‌ගයුත්‌තසමුට්‌ඨානෙසු අධිප්‌පායො වෙදිතබ්‌බො. ‘‘එකෙන සමුට්‌ඨානෙන සමුට්‌ඨාතී’’තිආදිපරිවාරවචනෙනෙව ආපත්‌තියා අකුසලාදිපරමත්‌ථසභාවතා පාළිඅට්‌ඨකථාසු පරියායතොව වුත්‌තා, සම්‌මුතිසභාවා එව ආපත්‌තීති සිජ්‌ඣති සමුට්‌ඨානසමුට්‌ඨිතානං භෙදසිද්‌ධිතොති ගහෙතබ්‌බං. ඉමමත්‌ථං සන්‌ධායාති ආපන්‌නාය පාරාජිකාපත්‌තියා කෙහිචිපි සමථෙහි අනාපත්‌තිභාවාපාදනස්‌ස අසක්‌කුණෙය්‍යත්‌තසඞ්‌ඛාතමත්‌ථං සන්‌ධාය.
Dvaṅgikena ekena samuṭṭhānenāti aṅgadvayasamudāyabhūtena ekena. Aṅgadvayavimuttassa samuṭṭhānassa abhāvepi tesu ekenaṅgena vinā ayaṃ āpatti na hotīti dassanatthameva ‘‘ekena samuṭṭhānenā’’ti vuttaṃ. Idāni tesu dvīsu aṅgesu padhānaṅgaṃ dassetumāha ‘‘ettha hi cittaṃ aṅgaṃ hotī’’tiādi. Yasmā pana maggenamaggappaṭipattisaṅkhātāya kāyaviññattiyā sevanacitteneva sambhave sati ayaṃ taṃ aṅgadvayaṃ upādāya bhagavatā paññattā āpattisammuti hoti, nāsati. Tasmā taṃ cittaṃ kāyaviññattisaṅkhātassa kāyassa aṅgaṃ kāraṇaṃ hoti, na āpattiyā. Tassa pana taṃsamuṭṭhitakāyo eva aṅgaṃ abyavahitakāraṇaṃ, cittaṃ pana kāraṇakāraṇanti adhippāyo. Evaṃ uparipi sabbattha cittaṅgayuttasamuṭṭhānesu adhippāyo veditabbo. ‘‘Ekena samuṭṭhānena samuṭṭhātī’’tiādiparivāravacaneneva āpattiyā akusalādiparamatthasabhāvatā pāḷiaṭṭhakathāsu pariyāyatova vuttā, sammutisabhāvā eva āpattīti sijjhati samuṭṭhānasamuṭṭhitānaṃ bhedasiddhitoti gahetabbaṃ. Imamatthaṃ sandhāyāti āpannāya pārājikāpattiyā kehicipi samathehi anāpattibhāvāpādanassa asakkuṇeyyattasaṅkhātamatthaṃ sandhāya.
3. පොරාණකෙහි මහාථෙරෙහීති සඞ්‌ගීතිත්‌තයතො පච්‌ඡා පොත්‌ථකසඞ්‌ගීතිකාරකෙහි ඡළභිඤ්‌ඤාපඅසම්‌භිදාදිගුණසමුජ්‌ජලෙහි මහාථෙරෙහි. චතුත්‌ථසඞ්‌ගීතිසදිසා හි පොත්‌ථකාරොහසඞ්‌ගීති.
3.Porāṇakehi mahātherehīti saṅgītittayato pacchā potthakasaṅgītikārakehi chaḷabhiññāpaasambhidādiguṇasamujjalehi mahātherehi. Catutthasaṅgītisadisā hi potthakārohasaṅgīti.
188. මහාවිභඞ්‌ගෙති භික්‌ඛුවිභඞ්‌ගෙ. සොළස වාරා දස්‌සිතාති යෙහි වාරෙහි ආදිභූතෙහි උපලක්‌ඛිතත්‌තා අයං සකලොපි පරිවාරො සොළසපරිවාරොති වොහරීයති, තෙ සන්‌ධාය වදති.
188.Mahāvibhaṅgeti bhikkhuvibhaṅge. Soḷasa vārā dassitāti yehi vārehi ādibhūtehi upalakkhitattā ayaṃ sakalopi parivāro soḷasaparivāroti voharīyati, te sandhāya vadati.
පඤ්‌ඤත්‌තිවාරවණ්‌ණනා නිට්‌ඨිතා.
Paññattivāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
1. පාරාජිකකණ්‌ඩං • 1. Pārājikakaṇḍaṃ
1. පාරාජිකකණ්‌ඩං • 1. Pārājikakaṇḍaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā
පඤ්‌ඤත්‌තිවාරවණ්‌ණනා • Paññattivāravaṇṇanā
කතාපත්‌තිවාරාදිවණ්‌ණනා • Katāpattivārādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පඤ්‌ඤත්‌තිවාරවණ්‌ණනා • Paññattivāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පඤ්‌ඤත්‌තිවාරවණ්‌ණනා • Paññattivāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / කතාපත්‌තිවාරාදිවණ්‌ණනා • Katāpattivārādivaṇṇanā
