Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. ပာရင္ဂမသုတ္တံ
4. Pāraṅgamasuttaṃ
၃၄. သာဝတ္ထိနိဒာနံ။ ‘‘အဋ္ဌိမေ, ဘိက္ခဝေ, ဓမ္မာ ဘာဝိတာ ဗဟုလီကတာ အပာရာ ပာရံ ဂမနာယ သံဝတ္တန္တိ။ ကတမေ အဋ္ဌ? သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓိ။ ဣမေ ခော, ဘိက္ခဝေ, အဋ္ဌ ဓမ္မာ ဘာဝိတာ ဗဟုလီကတာ အပာရာ ပာရံ ဂမနာယ သံဝတ္တန္တီ’’တိ။
34. Sāvatthinidānaṃ. ‘‘Aṭṭhime, bhikkhave, dhammā bhāvitā bahulīkatā apārā pāraṃ gamanāya saṃvattanti. Katame aṭṭha? Seyyathidaṃ – sammādiṭṭhi…pe… sammāsamādhi. Ime kho, bhikkhave, aṭṭha dhammā bhāvitā bahulīkatā apārā pāraṃ gamanāya saṃvattantī’’ti.
ဣဒမဝောစ ဘဂဝာ။ ဣဒံ ဝတ္ဝာန သုဂတော အထာပရံ ဧတဒဝောစ သတ္ထာ –
Idamavoca bhagavā. Idaṃ vatvāna sugato athāparaṃ etadavoca satthā –
‘‘အပ္ပကာ တေ မနုသ္သေသု၊ ယေ ဇနာ ပာရဂာမိနော။
‘‘Appakā te manussesu, ye janā pāragāmino;
အထာယံ ဣတရာ ပဇာ၊ တီရမေဝာနုဓာဝတိ။
Athāyaṃ itarā pajā, tīramevānudhāvati.
‘‘ယေ စ ခော သမ္မဒက္ခာတေ၊ ဓမ္မေ ဓမ္မာနုဝတ္တိနော။
‘‘Ye ca kho sammadakkhāte, dhamme dhammānuvattino;
တေ ဇနာ ပာရမေသ္သန္တိ၊ မစ္စုဓေယ္ယံ သုဒုတ္တရံ။
Te janā pāramessanti, maccudheyyaṃ suduttaraṃ.
‘‘ကဏ္ဟံ ဓမ္မံ ဝိပ္ပဟာယ၊ သုက္ကံ ဘာဝေထ ပဏ္ဍိတော။
‘‘Kaṇhaṃ dhammaṃ vippahāya, sukkaṃ bhāvetha paṇḍito;
ဩကာ အနောကမာဂမ္မ၊ ဝိဝေကေ ယတ္ထ ဒူရမံ။
Okā anokamāgamma, viveke yattha dūramaṃ.
‘‘တတ္ရာဘိရတိမိစ္ဆေယ္ယ၊ ဟိတ္ဝာ ကာမေ အကိဉ္စနော။
‘‘Tatrābhiratimiccheyya, hitvā kāme akiñcano;
ပရိယောဒပေယ္ယ အတ္တာနံ၊ စိတ္တက္လေသေဟိ ပဏ္ဍိတော။
Pariyodapeyya attānaṃ, cittaklesehi paṇḍito.
‘‘ယေသံ သမ္ဗောဓိယင္ဂေသု၊ သမ္မာ စိတ္တံ သုဘာဝိတံ။
‘‘Yesaṃ sambodhiyaṅgesu, sammā cittaṃ subhāvitaṃ;
အာဒာနပဋိနိသ္သဂ္ဂေ၊ အနုပာဒာယ ယေ ရတာ။
Ādānapaṭinissagge, anupādāya ye ratā;
ခီဏာသဝာ ဇုတိမန္တော၊ တေ လောကေ ပရိနိဗ္ဗုတာ’’တိ။ စတုတ္ထံ။
Khīṇāsavā jutimanto, te loke parinibbutā’’ti. catutthaṃ;
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ပဋိပတ္တိဝဂ္ဂဝဏ္ဏနာ • 4. Paṭipattivaggavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ပဋိပတ္တိဝဂ္ဂဝဏ္ဏနာ • 4. Paṭipattivaggavaṇṇanā