Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ပာရင္ဂမသုတ္တံ
7. Pāraṅgamasuttaṃ
၁၉၈. ‘‘သတ္တိမေ, ဘိက္ခဝေ, ဗောဇ္ဈင္ဂာ ဘာဝိတာ ဗဟုလီကတာ အပာရာ ပာရံ ဂမနာယ သံဝတ္တန္တိ။ ကတမေ သတ္တ? သတိသမ္ဗောဇ္ဈင္ဂော။ပေ.။ ဥပေက္ခာသမ္ဗောဇ္ဈင္ဂော – ဣမေ ခော, ဘိက္ခဝေ, သတ္တ ဗောဇ္ဈင္ဂာ ဘာဝိတာ ဗဟုလီကတာ အပာရာ ပာရံ ဂမနာယ သံဝတ္တန္တီ’’တိ။
198. ‘‘Sattime, bhikkhave, bojjhaṅgā bhāvitā bahulīkatā apārā pāraṃ gamanāya saṃvattanti. Katame satta? Satisambojjhaṅgo…pe… upekkhāsambojjhaṅgo – ime kho, bhikkhave, satta bojjhaṅgā bhāvitā bahulīkatā apārā pāraṃ gamanāya saṃvattantī’’ti.
‘‘အပ္ပကာ တေ မနုသ္သေသု၊ ယေ ဇနာ ပာရဂာမိနော။
‘‘Appakā te manussesu, ye janā pāragāmino;
အထာယံ ဣတရာ ပဇာ၊ တီရမေဝာနုဓာဝတိ။
Athāyaṃ itarā pajā, tīramevānudhāvati.
‘‘ယေ စ ခော သမ္မဒက္ခာတေ၊ ဓမ္မေ ဓမ္မာနုဝတ္တိနော။
‘‘Ye ca kho sammadakkhāte, dhamme dhammānuvattino;
တေ ဇနာ ပာရမေသ္သန္တိ၊ မစ္စုဓေယ္ယံ သုဒုတ္တရံ။
Te janā pāramessanti, maccudheyyaṃ suduttaraṃ.
‘‘ကဏ္ဟံ ဓမ္မံ ဝိပ္ပဟာယ၊ သုက္ကံ ဘာဝေထ ပဏ္ဍိတော။
‘‘Kaṇhaṃ dhammaṃ vippahāya, sukkaṃ bhāvetha paṇḍito;
ဩကာ အနောကမာဂမ္မ၊ ဝိဝေကေ ယတ္ထ ဒူရမံ။
Okā anokamāgamma, viveke yattha dūramaṃ.
‘‘တတ္ရာဘိရတိမိစ္ဆေယ္ယ ၊ ဟိတ္ဝာ ကာမေ အကိဉ္စနော။
‘‘Tatrābhiratimiccheyya , hitvā kāme akiñcano;
ပရိယောဒပေယ္ယ အတ္တာနံ၊ စိတ္တက္လေသေဟိ ပဏ္ဍိတော။
Pariyodapeyya attānaṃ, cittaklesehi paṇḍito.
‘‘ယေသံ သမ္ဗောဓိယင္ဂေသု၊ သမ္မာ စိတ္တံ သုဘာဝိတံ။
‘‘Yesaṃ sambodhiyaṅgesu, sammā cittaṃ subhāvitaṃ;
အာဒာနပ္ပဋိနိသ္သဂ္ဂေ၊ အနုပာဒာယ ယေ ရတာ။
Ādānappaṭinissagge, anupādāya ye ratā;
ခီဏာသဝာ ဇုတိမန္တော၊ တေ လောကေ ပရိနိဗ္ဗုတာ’’တိ။ သတ္တမံ။
Khīṇāsavā jutimanto, te loke parinibbutā’’ti. sattamaṃ;
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၁၀. ပဌမဂိလာနသုတ္တာဒိဝဏ္ဏနာ • 4-10. Paṭhamagilānasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၁၀. ပဌမဂိလာနသုတ္တာဒိဝဏ္ဏနာ • 4-10. Paṭhamagilānasuttādivaṇṇanā