| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၉. ပရိက္ကမနသုတ္တံ
9. Parikkamanasuttaṃ
၁၇၅. ‘‘သပရိက္ကမနော အယံ, ဘိက္ခဝေ, ဓမ္မော, နာယံ ဓမ္မော အပရိက္ကမနော။ ကထဉ္စ, ဘိက္ခဝေ, သပရိက္ကမနော အယံ ဓမ္မော, နာယံ ဓမ္မော အပရိက္ကမနော? ပာဏာတိပာတိသ္သ, ဘိက္ခဝေ, ပာဏာတိပာတာ ဝေရမဏီ ပရိက္ကမနံ ဟောတိ။ အဒိန္နာဒာယိသ္သ, ဘိက္ခဝေ, အဒိန္နာဒာနာ ဝေရမဏီ ပရိက္ကမနံ ဟောတိ။ ကာမေသုမိစ္ဆာစာရိသ္သ, ဘိက္ခဝေ, ကာမေသုမိစ္ဆာစာရာ ဝေရမဏီ ပရိက္ကမနံ ဟောတိ။ မုသာဝာဒိသ္သ, ဘိက္ခဝေ, မုသာဝာဒာ ဝေရမဏီ ပရိက္ကမနံ ဟောတိ။ ပိသုဏဝာစသ္သ , ဘိက္ခဝေ, ပိသုဏာယ ဝာစာယ ဝေရမဏီ ပရိက္ကမနံ ဟောတိ။ ဖရုသဝာစသ္သ, ဘိက္ခဝေ, ဖရုသာယ ဝာစာယ ဝေရမဏီ ပရိက္ကမနံ ဟောတိ။ သမ္ဖပ္ပလာပိသ္သ, ဘိက္ခဝေ, သမ္ဖပ္ပလာပာ ဝေရမဏီ ပရိက္ကမနံ ဟောတိ။ အဘိဇ္ဈာလုသ္သ, ဘိက္ခဝေ, အနဘိဇ္ဈာ ပရိက္ကမနံ ဟောတိ။ ဗ္ယာပန္နစိတ္တသ္သ 1, ဘိက္ခဝေ, အဗ္ယာပာဒော ပရိက္ကမနံ ဟောတိ။ မိစ္ဆာဒိဋ္ဌိသ္သ, ဘိက္ခဝေ, သမ္မာဒိဋ္ဌိ ပရိက္ကမနံ ဟောတိ။ ဧဝံ ခော, ဘိက္ခဝေ, သပရိက္ကမနော အယံ ဓမ္မော, နာယံ ဓမ္မော အပရိက္ကမနော’’တိ။ နဝမံ။
175. ‘‘Saparikkamano ayaṃ, bhikkhave, dhammo, nāyaṃ dhammo aparikkamano. Kathañca, bhikkhave, saparikkamano ayaṃ dhammo, nāyaṃ dhammo aparikkamano? Pāṇātipātissa, bhikkhave, pāṇātipātā veramaṇī parikkamanaṃ hoti. Adinnādāyissa, bhikkhave, adinnādānā veramaṇī parikkamanaṃ hoti. Kāmesumicchācārissa, bhikkhave, kāmesumicchācārā veramaṇī parikkamanaṃ hoti. Musāvādissa, bhikkhave, musāvādā veramaṇī parikkamanaṃ hoti. Pisuṇavācassa , bhikkhave, pisuṇāya vācāya veramaṇī parikkamanaṃ hoti. Pharusavācassa, bhikkhave, pharusāya vācāya veramaṇī parikkamanaṃ hoti. Samphappalāpissa, bhikkhave, samphappalāpā veramaṇī parikkamanaṃ hoti. Abhijjhālussa, bhikkhave, anabhijjhā parikkamanaṃ hoti. Byāpannacittassa 2, bhikkhave, abyāpādo parikkamanaṃ hoti. Micchādiṭṭhissa, bhikkhave, sammādiṭṭhi parikkamanaṃ hoti. Evaṃ kho, bhikkhave, saparikkamano ayaṃ dhammo, nāyaṃ dhammo aparikkamano’’ti. Navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. ပရိက္ကမနသုတ္တဝဏ္ဏနာ • 9. Parikkamanasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄၄. ဗ္ရာဟ္မဏပစ္စောရောဟဏီသုတ္တာဒိဝဏ္ဏနာ • 1-44. Brāhmaṇapaccorohaṇīsuttādivaṇṇanā
