| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
3-10. පඨමආනන්‌දසුත්‌තාදිවණ්‌ණනා
3-10. Paṭhamaānandasuttādivaṇṇanā
989-996. තතියෙ පවිචිනතීති අනිච්‌චාදිවසෙන පවිචිනති. ඉතරං පදද්‌වයං එතස්‌සෙව වෙවචනං. නිරාමිසාති නික්‌කිලෙසා කායිකචෙතසිකදරථපටිපස්‌සද්‌ධියා කායොපි චිත්‌තම්‌පි පස්‌සම්‌භති. සමාධියතීති සම්‌මා ඨපියති, අප්‌පනාචිත්‌තං විය හොති. අජ්‌ඣුපෙක්‌ඛිතා හොතීති සහජාතඅජ්‌ඣුපෙක්‌ඛනාය අජ්‌ඣුපෙක්‌ඛිතා හොති.
989-996. Tatiye pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā kāyikacetasikadarathapaṭipassaddhiyā kāyopi cittampi passambhati. Samādhiyatīti sammā ṭhapiyati, appanācittaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
එවං චුද්‌දසවිධෙන කායපරිග්‌ගාහකස්‌ස භික්‌ඛුනො තස්‌මිං කායෙ සති සතිසම්‌බොජ්‌ඣඞ්‌ගො, තාය සතියා සම්‌පයුත්‌තඤාණං ධම්‌මවිචයසම්‌බොජ්‌ඣඞ්‌ගො, තංසම්‌පයුත්‌තමෙව කායිකචෙතසිකවීරියං වීරියසම්‌බොජ්‌ඣඞ්‌ගො, පීතිපස්‌සද්‌ධිචිත්‌තෙකග්‌ගතා පීතිපස්‌සද්‌ධිසමාධිසම්‌බොජ්‌ඣඞ්‌ගා, ඉමෙසං ඡන්‌නං බොජ්‌ඣඞ්‌ගානං අනොසක්‌කනඅනතිවත්‌තනසඞ්‌ඛාතො මජ්‌ඣත්‌තාකාරො උපෙක්‌ඛාසම්‌බොජ්‌ඣඞ්‌ගො. යථෙව හි සමප්‌පවත්‌තෙසු අස්‌සෙසු සාරථිනො ‘‘අයං ඔලීයතී’’ති තුදනං වා, ‘‘අයං අතිධාවතී’’ති ආකඩ්‌ඪනං වා නත්‌ථි, කෙවලං එවං පස්‌සමානස්‌ස ඨිතාකාරොව හොති, එවමෙව ඉමෙසං ඡන්‌නං බොජ්‌ඣඞ්‌ගානං අනොසක්‌කනඅනතිවත්‌තනසඞ්‌ඛාතො මජ්‌ඣත්‌තාකාරො උපෙක්‌ඛාසම්‌බොජ්‌ඣඞ්‌ගො නාම හොති. එත්‌තාවතා කිං කථිතං? එකචිත්‌තක්‌ඛණිකා නානාසරසලක්‌ඛණා විපස්‌සනාබොජ්‌ඣඞ්‌ගා නාම කථිතා.
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, tāya satiyā sampayuttañāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pītipassaddhicittekaggatā pītipassaddhisamādhisambojjhaṅgā, imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānāsarasalakkhaṇā vipassanābojjhaṅgā nāma kathitā.
විවෙකනිස්‌සිතන්‌තිආදීනි වුත්‌තත්‌ථානෙව. එත්‌ථ පන සොළසක්‌ඛත්‌තුකා ආනාපානස්‌සති මිස්‌සකා කථිතා, ආනාපානමූලකා සතිපට්‌ඨානා පුබ්‌බභාගා , තෙසං මූලභූතා ආනාපානස්‌සති පුබ්‌බභාගා. බොජ්‌ඣඞ්‌ගමූලකා සතිපට්‌ඨානා පුබ්‌බභාගා, තෙපි බොජ්‌ඣඞ්‌ගා පුබ්‌බභාගාව. විජ්‌ජාවිමුත්‌තිපූරකා පන බොජ්‌ඣඞ්‌ගා නිබ්‌බත්‌තිතලොකුත්‌තරා, විජ්‌ජාවිමුත්‌තියො අරියඵලසම්‌පයුත්‌තා. විජ්‌ජා වා චතුත්‌ථමග්‌ගසම්‌පයුත්‌තා, විමුත්‌ති ඵලසම්‌පයුත්‌තාති. චතුත්‌ථපඤ්‌චමඡට්‌ඨානිපි ඉමිනාව සමානපරිච්‌ඡෙදානි. සෙසං සබ්‌බත්‌ථ උත්‌තානමෙවාති.
Vivekanissitantiādīni vuttatthāneva. Ettha pana soḷasakkhattukā ānāpānassati missakā kathitā, ānāpānamūlakā satipaṭṭhānā pubbabhāgā , tesaṃ mūlabhūtā ānāpānassati pubbabhāgā. Bojjhaṅgamūlakā satipaṭṭhānā pubbabhāgā, tepi bojjhaṅgā pubbabhāgāva. Vijjāvimuttipūrakā pana bojjhaṅgā nibbattitalokuttarā, vijjāvimuttiyo ariyaphalasampayuttā. Vijjā vā catutthamaggasampayuttā, vimutti phalasampayuttāti. Catutthapañcamachaṭṭhānipi imināva samānaparicchedāni. Sesaṃ sabbattha uttānamevāti.
ආනාපානසංයුත්‌තවණ්‌ණනා නිට්‌ඨිතා.
Ānāpānasaṃyuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
3. පඨමආනන්‌දසුත්‌තං • 3. Paṭhamaānandasuttaṃ
4. දුතියආනන්‌දසුත්‌තං • 4. Dutiyaānandasuttaṃ
5. පඨමභික්‌ඛුසුත්‌තං • 5. Paṭhamabhikkhusuttaṃ
6. දුතියභික්‌ඛුසුත්‌තං • 6. Dutiyabhikkhusuttaṃ
7. සංයොජනප්‌පහානසුත්‌තං • 7. Saṃyojanappahānasuttaṃ
8. අනුසයසමුග්‌ඝාතසුත්‌තං • 8. Anusayasamugghātasuttaṃ
9. අද්‌ධානපරිඤ්‌ඤාසුත්‌තං • 9. Addhānapariññāsuttaṃ
10. ආසවක්‌ඛයසුත්‌තං • 10. Āsavakkhayasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-10. පඨමආනන්‌දසුත්‌තාදිවණ්‌ණනා • 3-10. Paṭhamaānandasuttādivaṇṇanā
