| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဒေဝပုတ္တသံယုတ္တံ
2. Devaputtasaṃyuttaṃ
၁. ပဌမဝဂ္ဂော
1. Paṭhamavaggo
၁. ပဌမကသ္သပသုတ္တံ
1. Paṭhamakassapasuttaṃ
၈၂. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော ကသ္သပော ဒေဝပုတ္တော အဘိက္ကန္တာယ ရတ္တိယာ အဘိက္ကန္တဝဏ္ဏော ကေဝလကပ္ပံ ဇေတဝနံ ဩဘာသေတ္ဝာ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ အဋ္ဌာသိ။ ဧကမန္တံ ဌိတော ခော ကသ္သပော ဒေဝပုတ္တော ဘဂဝန္တံ ဧတဒဝောစ – ‘‘ဘိက္ခုံ ဘဂဝာ ပကာသေသိ, နော စ ဘိက္ခုနော အနုသာသ’’န္တိ။ ‘‘တေန ဟိ ကသ္သပ, တညေဝေတ္ထ ပဋိဘာတူ’’တိ။
82. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho kassapo devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho kassapo devaputto bhagavantaṃ etadavoca – ‘‘bhikkhuṃ bhagavā pakāsesi, no ca bhikkhuno anusāsa’’nti. ‘‘Tena hi kassapa, taññevettha paṭibhātū’’ti.
‘‘သုဘာသိတသ္သ သိက္ခေထ၊ သမဏူပာသနသ္သ စ။
‘‘Subhāsitassa sikkhetha, samaṇūpāsanassa ca;
ဧကာသနသ္သ စ ရဟော၊ စိတ္တဝူပသမသ္သ စာ’’တိ။
Ekāsanassa ca raho, cittavūpasamassa cā’’ti.
ဣဒမဝောစ ကသ္သပော ဒေဝပုတ္တော; သမနုညော သတ္ထာ အဟောသိ။ အထ ခော ကသ္သပော ဒေဝပုတ္တော ‘‘သမနုညော မေ သတ္ထာ’’တိ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ တတ္ထေဝန္တရဓာယီတိ။
Idamavoca kassapo devaputto; samanuñño satthā ahosi. Atha kho kassapo devaputto ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyīti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ပဌမကသ္သပသုတ္တဝဏ္ဏနာ • 1. Paṭhamakassapasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ပဌမကသ္သပသုတ္တဝဏ္ဏနာ • 1. Paṭhamakassapasuttavaṇṇanā
