| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
3-4. පඨමඛතසුත්‌තාදිවණ්‌ණනා
3-4. Paṭhamakhatasuttādivaṇṇanā
3-4. තතියෙ කලින්‌ති අපරාධං. විචිනාතීති ආචිනොති පසවති. තෙන ච කලිනා සුඛං න පටිලභතීති තෙන අපරාධෙන සුඛං න වින්‌දති. නින්‌දියප්‌පසංසාය හි පසංසියනින්‌දාය ච සමකොව විපාකො. පසංසියනින්‌දාති ච සම්‌පන්‌නගුණපරිධංසනවසෙන පවත්‌තියා මහාසාවජ්‌ජතාය කටුකතරවිපාකා. නින්‌දියප්‌පසංසා පන කථං තාය සමවිපාකාති චෙ? තස්‌මිං අවිජ්‌ජමානගුණසමාරොපනෙන අත්‌තනො පරෙසඤ්‌ච මිච්‌ඡාපටිපත්‌තිහෙතුභාවතො පසංසියෙන තස්‌ස සබ්‌භාවකරණතො ච. ලොකෙපි හි අසූරං සූරෙන සමං කරොන්‌තො ගාරය්‌හො හොති, පගෙව දුප්‌පටිපන්‌නං සුප්‌පටිපන්‌නෙන සමං කරොන්‌තොති. සකෙන ධනෙනාති අත්‌තනො සාපතෙය්‍යෙන. අප්‌පමත්‌තකොව කලීති දිට්‌ඨධම්‌මිකත්‌තා සප්‌පටිකාරත්‌තා ච අප්‌පමත්‌තකො අපරාධො. අයං…පෙ.… මහන්‌තතරො කලි කතූපචිතත්‌තා සම්‌පරායිකත්‌තා අප්‌පටිකාරත්‌තා ච.
3-4. Tatiye kalinti aparādhaṃ. Vicinātīti ācinoti pasavati. Tena ca kalinā sukhaṃ na paṭilabhatīti tena aparādhena sukhaṃ na vindati. Nindiyappasaṃsāya hi pasaṃsiyanindāya ca samakova vipāko. Pasaṃsiyanindāti ca sampannaguṇaparidhaṃsanavasena pavattiyā mahāsāvajjatāya kaṭukataravipākā. Nindiyappasaṃsā pana kathaṃ tāya samavipākāti ce? Tasmiṃ avijjamānaguṇasamāropanena attano paresañca micchāpaṭipattihetubhāvato pasaṃsiyena tassa sabbhāvakaraṇato ca. Lokepi hi asūraṃ sūrena samaṃ karonto gārayho hoti, pageva duppaṭipannaṃ suppaṭipannena samaṃ karontoti. Sakena dhanenāti attano sāpateyyena. Appamattakova kalīti diṭṭhadhammikattā sappaṭikārattā ca appamattako aparādho. Ayaṃ…pe… mahantataro kali katūpacitattā samparāyikattā appaṭikārattā ca.
නිරබ්‌බුදොති ගණනාවිසෙසො එසොති ආහ ‘‘නිරබ්‌බුදගණනායා’’ති, සතසහස්‌සං නිරබ්‌බුදාති අත්‌ථො. නිරබ්‌බුදපරිමාණං පන වස්‌සගණනාය එවං වෙදිතබ්‌බං. යථෙව හි සතං සතසහස්‌සානං කොටි හොති, එවං සතං සතසහස්‌සානං කොටියො පකොටි නාම හොති, සතං සතසහස්‌සානං පකොටියො කොටිපකොටි, සතං සතසහස්‌සකොටිපකොටියො නහුතං, සතං සතසහස්‌සනහුතානි නින්‌නහුතං, සතං සතසහස්‌සනින්‌නහුතානි එකං අබ්‌බුදං, තතො වීසතිගුණිතං නිරබ්‌බුදං. යං අරියෙ ගරහන්‌තො නිරයං උපපජ්‌ජතීති අරියෙ ගරහන්‌තො යං නිරබ්‌බුදසඞ්‌ඛාතං නිරයං උපපජ්‌ජති, නිරබ්‌බුදොති ච පාටියෙක්‌කො නිරයො නත්‌ථි, අවීචිම්‌හියෙව පන නිරබ්‌බුදගණනාය පච්‌චිතබ්‌බට්‌ඨානස්‌සෙතං නාමං. චතුත්‌ථං උත්‌තානමෙව.
Nirabbudoti gaṇanāviseso esoti āha ‘‘nirabbudagaṇanāyā’’ti, satasahassaṃ nirabbudāti attho. Nirabbudaparimāṇaṃ pana vassagaṇanāya evaṃ veditabbaṃ. Yatheva hi sataṃ satasahassānaṃ koṭi hoti, evaṃ sataṃ satasahassānaṃ koṭiyo pakoṭi nāma hoti, sataṃ satasahassānaṃ pakoṭiyo koṭipakoṭi, sataṃ satasahassakoṭipakoṭiyo nahutaṃ, sataṃ satasahassanahutāni ninnahutaṃ, sataṃ satasahassaninnahutāni ekaṃ abbudaṃ, tato vīsatiguṇitaṃ nirabbudaṃ. Yaṃ ariye garahanto nirayaṃ upapajjatīti ariye garahanto yaṃ nirabbudasaṅkhātaṃ nirayaṃ upapajjati, nirabbudoti ca pāṭiyekko nirayo natthi, avīcimhiyeva pana nirabbudagaṇanāya paccitabbaṭṭhānassetaṃ nāmaṃ. Catutthaṃ uttānameva.
පඨමඛතසුත්‌තාදිවණ්‌ණනා නිට්‌ඨිතා.
Paṭhamakhatasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
3. පඨමඛතසුත්‌තං • 3. Paṭhamakhatasuttaṃ
4. දුතියඛතසුත්‌තං • 4. Dutiyakhatasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
3. පඨමඛතසුත්‌තවණ්‌ණනා • 3. Paṭhamakhatasuttavaṇṇanā
4. දුතියඛතසුත්‌තවණ්‌ණනා • 4. Dutiyakhatasuttavaṇṇanā
