| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ပဌမနောစေအသ္သာဒသုတ္တံ
5. Paṭhamanoceassādasuttaṃ
၁၇. ‘‘နော စေဒံ, ဘိက္ခဝေ, စက္ခုသ္သ အသ္သာဒော အဘဝိသ္သ, နယိဒံ သတ္တာ စက္ခုသ္မိံ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ စက္ခုသ္သ အသ္သာဒော တသ္မာ သတ္တာ စက္ခုသ္မိံ သာရဇ္ဇန္တိ။ နော စေဒံ, ဘိက္ခဝေ, စက္ခုသ္သ အာဒီနဝော အဘဝိသ္သ, နယိဒံ သတ္တာ စက္ခုသ္မိံ နိဗ္ဗိန္ဒေယ္ယုံ။ ယသ္မာ စ ခော, ဘိက္ခဝေ, အတ္ထိ စက္ခုသ္သ အာဒီနဝော တသ္မာ သတ္တာ စက္ခုသ္မိံ နိဗ္ဗိန္ဒန္တိ။ နော စေဒံ, ဘိက္ခဝေ, စက္ခုသ္သ နိသ္သရဏံ အဘဝိသ္သ, နယိဒံ သတ္တာ စက္ခုသ္မာ နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ စက္ခုသ္သ နိသ္သရဏံ တသ္မာ သတ္တာ စက္ခုသ္မာ နိသ္သရန္တိ။ နော စေဒံ, ဘိက္ခဝေ, သောတသ္သ အသ္သာဒော အဘဝိသ္သ။ နော စေဒံ, ဘိက္ခဝေ, ဃာနသ္သ အသ္သာဒော အဘဝိသ္သ။ နော စေဒံ, ဘိက္ခဝေ, ဇိဝ္ဟာယ အသ္သာဒော အဘဝိသ္သ, နယိဒံ သတ္တာ ဇိဝ္ဟာယ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ ဇိဝ္ဟာယ အသ္သာဒော, တသ္မာ သတ္တာ ဇိဝ္ဟာယ သာရဇ္ဇန္တိ။ နော စေဒံ, ဘိက္ခဝေ, ဇိဝ္ဟာယ အာဒီနဝော အဘဝိသ္သ, နယိဒံ သတ္တာ ဇိဝ္ဟာယ နိဗ္ဗိန္ဒေယ္ယုံ။ ယသ္မာ စ ခော, ဘိက္ခဝေ, အတ္ထိ ဇိဝ္ဟာယ အာဒီနဝော, တသ္မာ သတ္တာ ဇိဝ္ဟာယ နိဗ္ဗိန္ဒန္တိ။ နော စေဒံ, ဘိက္ခဝေ, ဇိဝ္ဟာယ နိသ္သရဏံ အဘဝိသ္သ, နယိဒံ သတ္တာ ဇိဝ္ဟာယ နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ ဇိဝ္ဟာယ နိသ္သရဏံ, တသ္မာ သတ္တာ ဇိဝ္ဟာယ နိသ္သရန္တိ။ နော စေဒံ, ဘိက္ခဝေ, ကာယသ္သ အသ္သာဒော အဘဝိသ္သ။ နော စေဒံ, ဘိက္ခဝေ, မနသ္သ အသ္သာဒော အဘဝိသ္သ, နယိဒံ သတ္တာ မနသ္မိံ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ မနသ္သ အသ္သာဒော, တသ္မာ သတ္တာ မနသ္မိံ သာရဇ္ဇန္တိ။ နော စေဒံ, ဘိက္ခဝေ, မနသ္သ အာဒီနဝော အဘဝိသ္သ, နယိဒံ သတ္တာ မနသ္မိံ နိဗ္ဗိန္ဒေယ္ယုံ ။ ယသ္မာ စ ခော, ဘိက္ခဝေ, အတ္ထိ မနသ္သ အာဒီနဝော, တသ္မာ သတ္တာ မနသ္မိံ နိဗ္ဗိန္ဒန္တိ။ နော စေဒံ, ဘိက္ခဝေ, မနသ္သ နိသ္သရဏံ အဘဝိသ္သ, နယိဒံ သတ္တာ မနသ္မာ နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ မနသ္သ နိသ္သရဏံ, တသ္မာ သတ္တာ မနသ္မာ နိသ္သရန္တိ။
17. ‘‘No cedaṃ, bhikkhave, cakkhussa assādo abhavissa, nayidaṃ sattā cakkhusmiṃ sārajjeyyuṃ. Yasmā ca kho, bhikkhave, atthi cakkhussa assādo tasmā sattā cakkhusmiṃ sārajjanti. No cedaṃ, bhikkhave, cakkhussa ādīnavo abhavissa, nayidaṃ sattā cakkhusmiṃ nibbindeyyuṃ. Yasmā ca kho, bhikkhave, atthi cakkhussa ādīnavo tasmā sattā cakkhusmiṃ nibbindanti. No cedaṃ, bhikkhave, cakkhussa nissaraṇaṃ abhavissa, nayidaṃ sattā cakkhusmā nissareyyuṃ. Yasmā ca kho, bhikkhave, atthi cakkhussa nissaraṇaṃ tasmā sattā cakkhusmā nissaranti. No cedaṃ, bhikkhave, sotassa assādo abhavissa… no cedaṃ, bhikkhave, ghānassa assādo abhavissa… no cedaṃ, bhikkhave, jivhāya assādo abhavissa, nayidaṃ sattā jivhāya sārajjeyyuṃ. Yasmā ca kho, bhikkhave, atthi jivhāya assādo, tasmā sattā jivhāya sārajjanti. No cedaṃ, bhikkhave, jivhāya ādīnavo abhavissa, nayidaṃ sattā jivhāya nibbindeyyuṃ. Yasmā ca kho, bhikkhave, atthi jivhāya ādīnavo, tasmā sattā jivhāya nibbindanti. No cedaṃ, bhikkhave, jivhāya nissaraṇaṃ abhavissa, nayidaṃ sattā jivhāya nissareyyuṃ. Yasmā ca kho, bhikkhave, atthi jivhāya nissaraṇaṃ, tasmā sattā jivhāya nissaranti. No cedaṃ, bhikkhave, kāyassa assādo abhavissa… no cedaṃ, bhikkhave, manassa assādo abhavissa, nayidaṃ sattā manasmiṃ sārajjeyyuṃ. Yasmā ca kho, bhikkhave, atthi manassa assādo, tasmā sattā manasmiṃ sārajjanti. No cedaṃ, bhikkhave, manassa ādīnavo abhavissa, nayidaṃ sattā manasmiṃ nibbindeyyuṃ . Yasmā ca kho, bhikkhave, atthi manassa ādīnavo, tasmā sattā manasmiṃ nibbindanti. No cedaṃ, bhikkhave, manassa nissaraṇaṃ abhavissa, nayidaṃ sattā manasmā nissareyyuṃ. Yasmā ca kho, bhikkhave, atthi manassa nissaraṇaṃ, tasmā sattā manasmā nissaranti.
‘‘ယာဝကီဝဉ္စ, ဘိက္ခဝေ, သတ္တာ ဣမေသံ ဆန္နံ အဇ္ဈတ္တိကာနံ အာယတနာနံ အသ္သာဒဉ္စ အသ္သာဒတော, အာဒီနဝဉ္စ အာဒီနဝတော, နိသ္သရဏဉ္စ နိသ္သရဏတော ယထာဘူတံ နာဗ္ဘညံသု, နေဝ တာဝ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသညုတ္တာ ဝိပ္ပမုတ္တာ ဝိမရိယာဒီကတေန 1 စေတသာ ဝိဟရိံသု။ ယတော စ ခော, ဘိက္ခဝေ, သတ္တာ ဣမေသံ ဆန္နံ အဇ္ဈတ္တိကာနံ အာယတနာနံ အသ္သာဒဉ္စ အသ္သာဒတော, အာဒီနဝဉ္စ အာဒီနဝတော, နိသ္သရဏဉ္စ နိသ္သရဏတော ယထာဘူတံ အဗ္ဘညံသု , အထ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသညုတ္တာ ဝိပ္ပမုတ္တာ ဝိမရိယာဒီကတေန စေတသာ ဝိဟရန္တီ’’တိ။ ပဉ္စမံ။
‘‘Yāvakīvañca, bhikkhave, sattā imesaṃ channaṃ ajjhattikānaṃ āyatanānaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ nābbhaññaṃsu, neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaññuttā vippamuttā vimariyādīkatena 2 cetasā vihariṃsu. Yato ca kho, bhikkhave, sattā imesaṃ channaṃ ajjhattikānaṃ āyatanānaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ abbhaññaṃsu , atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaññuttā vippamuttā vimariyādīkatena cetasā viharantī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅-၆. ပဌမနောစေအသ္သာဒသုတ္တာဒိဝဏ္ဏနာ • 5-6. Paṭhamanoceassādasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅-၆. ပဌမနောစေအသ္သာဒသုတ္တာဒိဝဏ္ဏနာ • 5-6. Paṭhamanoceassādasuttādivaṇṇanā
