| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
5. පඨමසීලසුත්‌තං
5. Paṭhamasīlasuttaṃ
32. වුත්‌තඤ්‌හෙතං භගවතා, වුත්‌තමරහතාති මෙ සුතං –
32. Vuttañhetaṃ bhagavatā, vuttamarahatāti me sutaṃ –
‘‘ද්‌වීහි, භික්‌ඛවෙ, ධම්‌මෙහි සමන්‌නාගතො පුග්‌ගලො යථාභතං නික්‌ඛිත්‌තො එවං නිරයෙ. කතමෙහි ද්‌වීහි? පාපකෙන ච සීලෙන, පාපිකාය ච දිට්‌ඨියා. ඉමෙහි ඛො, භික්‌ඛවෙ, ද්‌වීහි ධම්‌මෙහි සමන්‌නාගතො පුග්‌ගලො යථාභතං නික්‌ඛිත්‌තො එවං නිරයෙ’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Dvīhi, bhikkhave, dhammehi samannāgato puggalo yathābhataṃ nikkhitto evaṃ niraye. Katamehi dvīhi? Pāpakena ca sīlena, pāpikāya ca diṭṭhiyā. Imehi kho, bhikkhave, dvīhi dhammehi samannāgato puggalo yathābhataṃ nikkhitto evaṃ niraye’’ti. Etamatthaṃ bhagavā avoca. Tatthetaṃ iti vuccati –
‘‘පාපකෙන ච සීලෙන, පාපිකාය ච දිට්‌ඨියා;
‘‘Pāpakena ca sīlena, pāpikāya ca diṭṭhiyā;
එතෙහි ද්‌වීහි ධම්‌මෙහි, යො සමන්‌නාගතො නරො;
Etehi dvīhi dhammehi, yo samannāgato naro;
කායස්‌ස භෙදා දුප්‌පඤ්‌ඤො, නිරයං සොපපජ්‌ජතී’’ති.
Kāyassa bhedā duppañño, nirayaṃ sopapajjatī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. පඤ්‌චමං.
Ayampi attho vutto bhagavatā, iti me sutanti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 5. පඨමසීලසුත්‌තවණ්‌ණනා • 5. Paṭhamasīlasuttavaṇṇanā
