Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. ပဌမသောဝစသ္သတာသုတ္တံ
3. Paṭhamasovacassatāsuttaṃ
၃၄. ‘‘ဣမံ , ဘိက္ခဝေ, ရတ္တိံ အညတရာ ဒေဝတာ။ပေ.။ မံ ဧတဒဝောစ – ‘သတ္တိမေ, ဘန္တေ, ဓမ္မာ ဘိက္ခုနော အပရိဟာနာယ သံဝတ္တန္တိ။ ကတမေ သတ္တ? သတ္ထုဂာရဝတာ, ဓမ္မဂာရဝတာ, သင္ဃဂာရဝတာ, သိက္ခာဂာရဝတာ, သမာဓိဂာရဝတာ, သောဝစသ္သတာ, ကလ္ယာဏမိတ္တတာ။ ဣမေ ခော, ဘန္တေ, သတ္တ ဓမ္မာ ဘိက္ခုနော အပရိဟာနာယ သံဝတ္တန္တီ’တိ။ ဣဒမဝောစ, ဘိက္ခဝေ , သာ ဒေဝတာ။ ဣဒံ ဝတ္ဝာ မံ အဘိဝာဒေတ္ဝာ ပဒက္ခိဏံ ကတ္ဝာ တတ္ထေဝန္တရဓာယီ’’တိ။
34. ‘‘Imaṃ , bhikkhave, rattiṃ aññatarā devatā…pe… maṃ etadavoca – ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā. Ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave , sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
‘‘သတ္ထုဂရု ဓမ္မဂရု၊ သင္ဃေ စ တိဗ္ဗဂာရဝော။
‘‘Satthugaru dhammagaru, saṅghe ca tibbagāravo;
သမာဓိဂရု အာတာပီ၊ သိက္ခာယ တိဗ္ဗဂာရဝော။
Samādhigaru ātāpī, sikkhāya tibbagāravo.
‘‘ကလ္ယာဏမိတ္တော သုဝစော၊ သပ္ပတိသ္သော သဂာရဝော။
‘‘Kalyāṇamitto suvaco, sappatisso sagāravo;
အဘဗ္ဗော ပရိဟာနာယ၊ နိဗ္ဗာနသ္သေဝ သန္တိကေ’’တိ။ တတိယံ။
Abhabbo parihānāya, nibbānasseva santike’’ti. tatiyaṃ;