| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. တတိယပဏ္ဏာသကံ
3. Tatiyapaṇṇāsakaṃ
(၁၁) ၁. ဝလာဟကဝဂ္ဂော
(11) 1. Valāhakavaggo
၁. ပဌမဝလာဟကသုတ္တံ
1. Paṭhamavalāhakasuttaṃ
၁၀၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တတ္ရ ခော ဘဂဝာ ဘိက္ခူ အာမန္တေသိ – ‘‘ဘိက္ခဝော’’တိ။ ‘‘ဘဒန္တေ’’တိ တေ ဘိက္ခူ ဘဂဝတော ပစ္စသ္သောသုံ။ ဘဂဝာ ဧတဒဝောစ –
101. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘စတ္တာရောမေ, ဘိက္ခဝေ, ဝလာဟကာ။ ကတမေ စတ္တာရော? ဂဇ္ဇိတာ နော ဝသ္သိတာ, ဝသ္သိတာ နော ဂဇ္ဇိတာ, နေဝ ဂဇ္ဇိတာ နော ဝသ္သိတာ, ဂဇ္ဇိတာ စ ဝသ္သိတာ စ။ ဣမေ ခော, ဘိက္ခဝေ, စတ္တာရော ဝလာဟကာ။ ဧဝမေဝံ ခော, ဘိက္ခဝေ, စတ္တာရော ဝလာဟကူပမာ 1 ပုဂ္ဂလာ သန္တော သံဝိဇ္ဇမာနာ လောကသ္မိံ။ ကတမေ စတ္တာရော? ဂဇ္ဇိတာ နော ဝသ္သိတာ, ဝသ္သိတာ နော ဂဇ္ဇိတာ, နေဝ ဂဇ္ဇိတာ နော ဝသ္သိတာ, ဂဇ္ဇိတာ စ ဝသ္သိတာ စ။
‘‘Cattārome, bhikkhave, valāhakā. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca. Ime kho, bhikkhave, cattāro valāhakā. Evamevaṃ kho, bhikkhave, cattāro valāhakūpamā 2 puggalā santo saṃvijjamānā lokasmiṃ. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca.
‘‘ကထဉ္စ, ဘိက္ခဝေ, ပုဂ္ဂလော ဂဇ္ဇိတာ ဟောတိ နော ဝသ္သိတာ? ဣဓ, ဘိက္ခဝေ, ဧကစ္စော ပုဂ္ဂလော ဘာသိတာ ဟောတိ, နော ကတ္တာ။ ဧဝံ ခော, ဘိက္ခဝေ, ပုဂ္ဂလော ဂဇ္ဇိတာ ဟောတိ, နော ဝသ္သိတာ။ သေယ္ယထာပိ သော, ဘိက္ခဝေ, ဝလာဟကော ဂဇ္ဇိတာ, နော ဝသ္သိတာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘Kathañca, bhikkhave, puggalo gajjitā hoti no vassitā? Idha, bhikkhave, ekacco puggalo bhāsitā hoti, no kattā. Evaṃ kho, bhikkhave, puggalo gajjitā hoti, no vassitā. Seyyathāpi so, bhikkhave, valāhako gajjitā, no vassitā; tathūpamāhaṃ, bhikkhave, imaṃ puggalaṃ vadāmi.
‘‘ကထဉ္စ, ဘိက္ခဝေ, ပုဂ္ဂလော ဝသ္သိတာ ဟောတိ, နော ဂဇ္ဇိတာ? ဣဓ, ဘိက္ခဝေ, ဧကစ္စော ပုဂ္ဂလော ကတ္တာ ဟောတိ, နော ဘာသိတာ။ ဧဝံ ခော, ဘိက္ခဝေ, ပုဂ္ဂလော ဝသ္သိတာ ဟောတိ, နော ဂဇ္ဇိတာ။ သေယ္ယထာပိ သော, ဘိက္ခဝေ, ဝလာဟကော ဝသ္သိတာ, နော ဂဇ္ဇိတာ; တထူပမာဟံ, ဘိက္ခဝေ , ဣမံ ပုဂ္ဂလံ ဝဒာမိ။
‘‘Kathañca, bhikkhave, puggalo vassitā hoti, no gajjitā? Idha, bhikkhave, ekacco puggalo kattā hoti, no bhāsitā. Evaṃ kho, bhikkhave, puggalo vassitā hoti, no gajjitā. Seyyathāpi so, bhikkhave, valāhako vassitā, no gajjitā; tathūpamāhaṃ, bhikkhave , imaṃ puggalaṃ vadāmi.
‘‘ကထဉ္စ , ဘိက္ခဝေ, ပုဂ္ဂလော နေဝ ဂဇ္ဇိတာ ဟောတိ, နော ဝသ္သိတာ? ဣဓ, ဘိက္ခဝေ, ဧကစ္စော ပုဂ္ဂလော နေဝ ဘာသိတာ ဟောတိ, နော ကတ္တာ။ ဧဝံ ခော, ဘိက္ခဝေ, ပုဂ္ဂလော နေဝ ဂဇ္ဇိတာ ဟောတိ, နော ဝသ္သိတာ။ သေယ္ယထာပိ သော, ဘိက္ခဝေ, ဝလာဟကော နေဝ ဂဇ္ဇိတာ 3, နော ဝသ္သိတာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘Kathañca , bhikkhave, puggalo neva gajjitā hoti, no vassitā? Idha, bhikkhave, ekacco puggalo neva bhāsitā hoti, no kattā. Evaṃ kho, bhikkhave, puggalo neva gajjitā hoti, no vassitā. Seyyathāpi so, bhikkhave, valāhako neva gajjitā 4, no vassitā; tathūpamāhaṃ, bhikkhave, imaṃ puggalaṃ vadāmi.
‘‘ကထဉ္စ, ဘိက္ခဝေ, ပုဂ္ဂလော ဂဇ္ဇိတာ စ ဟောတိ ဝသ္သိတာ စ? ဣဓ, ဘိက္ခဝေ, ဧကစ္စော ပုဂ္ဂလော ဘာသိတာ စ ဟောတိ ကတ္တာ စ။ ဧဝံ ခော, ဘိက္ခဝေ, ပုဂ္ဂလော ဂဇ္ဇိတာ စ ဟောတိ ဝသ္သိတာ စ။ သေယ္ယထာပိ သော, ဘိက္ခဝေ, ဝလာဟကော ဂဇ္ဇိတာ စ 5 ဝသ္သိတာ စ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။ ဣမေ ခော, ဘိက္ခဝေ, စတ္တာရော ဝလာဟကူပမာ ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ။ ပဌမံ။
‘‘Kathañca, bhikkhave, puggalo gajjitā ca hoti vassitā ca? Idha, bhikkhave, ekacco puggalo bhāsitā ca hoti kattā ca. Evaṃ kho, bhikkhave, puggalo gajjitā ca hoti vassitā ca. Seyyathāpi so, bhikkhave, valāhako gajjitā ca 6 vassitā ca; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, cattāro valāhakūpamā puggalā santo saṃvijjamānā lokasmi’’nti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁-၂. ဝလာဟကသုတ္တဒ္ဝယဝဏ္ဏနာ • 1-2. Valāhakasuttadvayavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၂. ဝလာဟကသုတ္တဒ္ဝယဝဏ္ဏနာ • 1-2. Valāhakasuttadvayavaṇṇanā
