| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5-7. පඨමවිත්‌ථාරසුත්‌තාදිවණ්‌ණනා
5-7. Paṭhamavitthārasuttādivaṇṇanā
485-487. පඤ්‌චමෙ තතො මුදුතරෙහීති විපස්‌සනාවසෙන නිස්‌සක්‌කං වෙදිතබ්‌බං. පරිපුණ්‌ණානි හි පඤ්‌චින්‌ද්‍රියානි අරහත්‌තමග්‌ගස්‌ස විපස්‌සනින්‌ද්‍රියානි හොන්‌ති, තතො මුදුතරානි අන්‌තරාපරිනිබ්‌බායිස්‌ස විපස්‌සනින්‌ද්‍රියානි, තතො මුදුතරානි උපහච්‌චපරිනිබ්‌බායිස්‌ස, තතො මුදුතරානි අසඞ්‌ඛාරපරිනිබ්‌බායිස්‌ස, තතො මුදුතරානි සසඞ්‌ඛාරපරිනිබ්‌බායිස්‌ස, තතො මුදුතරානි උද්‌ධංසොතඅකනිට්‌ඨගාමිස්‌ස විපස්‌සනින්‌ද්‍රියානි නාම හොන්‌ති.
485-487. Pañcame tato mudutarehīti vipassanāvasena nissakkaṃ veditabbaṃ. Paripuṇṇāni hi pañcindriyāni arahattamaggassa vipassanindriyāni honti, tato mudutarāni antarāparinibbāyissa vipassanindriyāni, tato mudutarāni upahaccaparinibbāyissa, tato mudutarāni asaṅkhāraparinibbāyissa, tato mudutarāni sasaṅkhāraparinibbāyissa, tato mudutarāni uddhaṃsotaakaniṭṭhagāmissa vipassanindriyāni nāma honti.
ඉමස්‌මිං පන ඨානෙ අරහත්‌තමග්‌ගෙයෙව ඨත්‌වා පඤ්‌ච නිස්‌සක්‌කානි නීහරිතබ්‌බානි. අරහත්‌තමග්‌ගස්‌ස හි විපස්‌සනින්‌ද්‍රියෙහි මුදුතරානි පඨමඅන්‌තරාපරිනිබ්‌බායිස්‌ස විපස්‌සනින්‌ද්‍රියානි, තතො මුදුතරානි දුතියඅන්‌තරාපරිනිබ්‌බායිස්‌ස, තතො මුදුතරානි තතියඅන්‌තරාපරිනිබ්‌බායිස්‌ස, තතො මුදුතරානි උපහච්‌චපරිනිබ්‌බායිස්‌ස, තතො මුදුතරානි උද්‌ධංසොතඅකනිට්‌ඨගාමිස්‌ස විපස්‌සනින්‌ද්‍රියානි. අසඞ්‌ඛාරපරිනිබ්‌බායිස්‌ස සසඞ්‌ඛාරපරිනිබ්‌බායිනොපි එතෙව පඤ්‌ච ජනා.
Imasmiṃ pana ṭhāne arahattamaggeyeva ṭhatvā pañca nissakkāni nīharitabbāni. Arahattamaggassa hi vipassanindriyehi mudutarāni paṭhamaantarāparinibbāyissa vipassanindriyāni, tato mudutarāni dutiyaantarāparinibbāyissa, tato mudutarāni tatiyaantarāparinibbāyissa, tato mudutarāni upahaccaparinibbāyissa, tato mudutarāni uddhaṃsotaakaniṭṭhagāmissa vipassanindriyāni. Asaṅkhāraparinibbāyissa sasaṅkhāraparinibbāyinopi eteva pañca janā.
ඉදානි තීණි නිස්‌සක්‌කානි. සකදාගාමිමග්‌ගස්‌ස හි ඉන්‌ද්‍රියෙහි මුදුතරානි සොතාපත්‌තිමග්‌ගින්‌ද්‍රියානි, සොතාපත්‌තිමග්‌ගෙයෙව ඉන්‌ද්‍රියෙහි මුදුතරානි ධම්‌මානුසාරිමග්‌ගින්‌ද්‍රියානි. තෙහිපි මුදුතරානි සද්‌ධානුසාරිමග්‌ගින්‌ද්‍රියානි. ඡට්‌ඨසත්‌තමානි වුත්‌තනයානෙව. ඉමෙසු පන තීසුපි සුත්‌තෙසු පුබ්‌බභාගවිපස්‌සනින්‌ද්‍රියානෙව කථිතානි.
Idāni tīṇi nissakkāni. Sakadāgāmimaggassa hi indriyehi mudutarāni sotāpattimaggindriyāni, sotāpattimaggeyeva indriyehi mudutarāni dhammānusārimaggindriyāni. Tehipi mudutarāni saddhānusārimaggindriyāni. Chaṭṭhasattamāni vuttanayāneva. Imesu pana tīsupi suttesu pubbabhāgavipassanindriyāneva kathitāni.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
5. පඨමවිත්‌ථාරසුත්‌තං • 5. Paṭhamavitthārasuttaṃ
6. දුතියවිත්‌ථාරසුත්‌තං • 6. Dutiyavitthārasuttaṃ
7. තතියවිත්‌ථාරසුත්‌තං • 7. Tatiyavitthārasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5-7. පඨමවිත්‌ථාරසුත්‌තාදිවණ්‌ණනා • 5-7. Paṭhamavitthārasuttādivaṇṇanā
