| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. පවනඞ්‌ගපඤ්‌හො
4. Pavanaṅgapañho
4. ‘‘භන්‌තෙ නාගසෙන, ‘පවනස්‌ස පඤ්‌ච අඞ්‌ගානි ගහෙතබ්‌බානී’ති යං වදෙසි, කතමානි තානි පඤ්‌ච අඞ්‌ගානි ගහෙතබ්‌බානී’’ති? ‘‘යථා, මහාරාජ, පවනං නාම අසුචිජනං පටිච්‌ඡාදෙති, එවමෙව ඛො, මහාරාජ, යොගිනා යොගාවචරෙන පරෙසං අපරද්‌ධං ඛලිතං පටිච්‌ඡාදෙතබ්‌බං න විවරිතබ්‌බං. ඉදං, මහාරාජ, පවනස්‌ස පඨමං අඞ්‌ගං ගහෙතබ්‌බං.
4. ‘‘Bhante nāgasena, ‘pavanassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, pavanaṃ nāma asucijanaṃ paṭicchādeti, evameva kho, mahārāja, yoginā yogāvacarena paresaṃ aparaddhaṃ khalitaṃ paṭicchādetabbaṃ na vivaritabbaṃ. Idaṃ, mahārāja, pavanassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, පවනං සුඤ්‌ඤං පචුරජනෙහි, එවමෙව ඛො, මහාරාජ, යොගිනා යොගාවචරෙන රාගදොසමොහමානදිට්‌ඨිජාලෙහි සබ්‌බෙහි ච කිලෙසෙහි සුඤ්‌ඤෙන භවිතබ්‌බං. ඉදං, මහාරාජ, පවනස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, pavanaṃ suññaṃ pacurajanehi, evameva kho, mahārāja, yoginā yogāvacarena rāgadosamohamānadiṭṭhijālehi sabbehi ca kilesehi suññena bhavitabbaṃ. Idaṃ, mahārāja, pavanassa dutiyaṃ aṅgaṃ gahetabbaṃ.
‘‘පුන චපරං, මහාරාජ, පවනං විවිත්‌තං ජනසම්‌බාධරහිතං, එවමෙව ඛො, මහාරාජ, යොගිනා යොගාවචරෙන පාපකෙහි අකුසලෙහි ධම්‌මෙහි අනරියෙහි පවිවිත්‌තෙන භවිතබ්‌බං. ඉදං, මහාරාජ, පවනස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, pavanaṃ vivittaṃ janasambādharahitaṃ, evameva kho, mahārāja, yoginā yogāvacarena pāpakehi akusalehi dhammehi anariyehi pavivittena bhavitabbaṃ. Idaṃ, mahārāja, pavanassa tatiyaṃ aṅgaṃ gahetabbaṃ.
‘‘පුන චපරං, මහාරාජ, පවනං සන්‌තං පරිසුද්‌ධං, එවමෙව ඛො, මහාරාජ, යොගිනා යොගාවචරෙන සන්‌තෙන පරිසුද්‌ධෙන භවිතබ්‌බං, නිබ්‌බුතෙන පහීනමානෙන පහීනමක්‌ඛෙන භවිතබ්‌බං. ඉදං, මහාරාජ, පවනස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, pavanaṃ santaṃ parisuddhaṃ, evameva kho, mahārāja, yoginā yogāvacarena santena parisuddhena bhavitabbaṃ, nibbutena pahīnamānena pahīnamakkhena bhavitabbaṃ. Idaṃ, mahārāja, pavanassa catutthaṃ aṅgaṃ gahetabbaṃ.
‘‘පුන චපරං, මහාරාජ, පවනං අරියජනසංසෙවිතං, එවමෙව ඛො, මහාරාජ, යොගිනා යොගාවචරෙන අරියජනසංසෙවිතෙන භවිතබ්‌බං. ඉදං, මහාරාජ, පවනස්‌ස පඤ්‌චමං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සංයුත්‌තනිකායවරෙ –
‘‘Puna caparaṃ, mahārāja, pavanaṃ ariyajanasaṃsevitaṃ, evameva kho, mahārāja, yoginā yogāvacarena ariyajanasaṃsevitena bhavitabbaṃ. Idaṃ, mahārāja, pavanassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘පවිවිත්‌තෙහි අරියෙහි, පහිතත්‌තෙහි ඣායිභි;
‘‘‘Pavivittehi ariyehi, pahitattehi jhāyibhi;
නිච්‌චං ආරද්‌ධවීරියෙහි, පණ්‌ඩිතෙහි සහාවසෙ’’’ති.
Niccaṃ āraddhavīriyehi, paṇḍitehi sahāvase’’’ti.
පවනඞ්‌ගපඤ්‌හො චතුත්‌ථො.
Pavanaṅgapañho catuttho.
