| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
3. පෙසුඤ්‌ඤසික්‌ඛාපදවණ්‌ණනා
3. Pesuññasikkhāpadavaṇṇanā
36. තතියසික්‌ඛාපදෙ – භණ්‌ඩනජාතානන්‌ති සඤ්‌ජාතභණ්‌ඩනානං. භණ්‌ඩනන්‌ති කලහස්‌ස පුබ්‌බභාගො, ‘‘ඉමිනා ච ඉමිනා ච ඉදං කතං; එවං වුත්‌තෙ එවං වක්‌ඛාමා’’තිආදිකං සකසකපක්‌ඛෙ සම්‌මන්‌තනං. කලහොති ආපත්‌තිගාමිකො කායවාචාවීතික්‌කමො. විවාදොති විග්‌ගාහිකකථා. තං විවාදං ආපන්‌නානං විවාදාපන්‌නානං. පෙසුඤ්‌ඤන්‌ති පිසුණවාචං, පියභාවස්‌ස සුඤ්‌ඤකරණවාචන්‌ති වුත්‌තං හොති.
36. Tatiyasikkhāpade – bhaṇḍanajātānanti sañjātabhaṇḍanānaṃ. Bhaṇḍananti kalahassa pubbabhāgo, ‘‘iminā ca iminā ca idaṃ kataṃ; evaṃ vutte evaṃ vakkhāmā’’tiādikaṃ sakasakapakkhe sammantanaṃ. Kalahoti āpattigāmiko kāyavācāvītikkamo. Vivādoti viggāhikakathā. Taṃ vivādaṃ āpannānaṃ vivādāpannānaṃ. Pesuññanti pisuṇavācaṃ, piyabhāvassa suññakaraṇavācanti vuttaṃ hoti.
37. භික්‌ඛුපෙසුඤ්‌ඤෙති භික්‌ඛූනං පෙසුඤ්‌ඤෙ; භික්‌ඛුතො සුත්‌වා භික්‌ඛුනා භික්‌ඛුස්‌ස උපසංහටපෙසුඤ්‌ඤෙති අත්‌ථො.
37.Bhikkhupesuññeti bhikkhūnaṃ pesuññe; bhikkhuto sutvā bhikkhunā bhikkhussa upasaṃhaṭapesuññeti attho.
38. ද්‌වීහාකාරෙහීති ද්‌වීහි කාරණෙහි. පියකම්‍යස්‌ස වාති ‘‘එවං අහං එතස්‌ස පියො භවිස්‌සාමී’’ති අත්‌තනො පියභාවං පත්‌ථයමානස්‌ස වා. භෙදාධිප්‌පායස්‌ස වාති ‘‘එවමයං එතෙන සද්‌ධිං භිජ්‌ජිස්‌සතී’’ති පරස්‌ස පරෙන භෙදං ඉච්‌ඡන්‌තස්‌ස වා. ජාතිතොපීතිආදි සබ්‌බං පුරිමසික්‌ඛාපදෙ වුත්‌තනයමෙව. ඉධාපි භික්‌ඛුනිං ආදිං කත්‌වා සබ්‌බෙ අනුපසම්‌පන්‌නා නාම.
38.Dvīhākārehīti dvīhi kāraṇehi. Piyakamyassa vāti ‘‘evaṃ ahaṃ etassa piyo bhavissāmī’’ti attano piyabhāvaṃ patthayamānassa vā. Bhedādhippāyassa vāti ‘‘evamayaṃ etena saddhiṃ bhijjissatī’’ti parassa parena bhedaṃ icchantassa vā. Jātitopītiādi sabbaṃ purimasikkhāpade vuttanayameva. Idhāpi bhikkhuniṃ ādiṃ katvā sabbe anupasampannā nāma.
න පියකම්‍යස්‌ස න භෙදාධිප්‌පායස්‌සාති එකං අක්‌කොසන්‌තං එකඤ්‌ච ඛමන්‌තං දිස්‌වා ‘‘අහො නිල්‌ලජ්‌ජො, ඊදිසම්‌පි නාම භවන්‌තං පුන වත්‌තබ්‌බං මඤ්‌ඤිස්‌සතී’’ති එවං කෙවලං පාපගරහිතාය භණන්‌තස්‌ස අනාපත්‌ති. සෙසං උත්‌තානත්‌ථමෙව. තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති , කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, වචීකම්‌මං, අකුසලචිත්‌තං, තිවෙදනන්‌ති.
Na piyakamyassa na bhedādhippāyassāti ekaṃ akkosantaṃ ekañca khamantaṃ disvā ‘‘aho nillajjo, īdisampi nāma bhavantaṃ puna vattabbaṃ maññissatī’’ti evaṃ kevalaṃ pāpagarahitāya bhaṇantassa anāpatti. Sesaṃ uttānatthameva. Tisamuṭṭhānaṃ – kāyacittato vācācittato kāyavācācittato ca samuṭṭhāti , kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
පෙසුඤ්‌ඤසික්‌ඛාපදං තතියං.
Pesuññasikkhāpadaṃ tatiyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 1. මුසාවාදවග්‌ගො • 1. Musāvādavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. පෙසුඤ්‌ඤසික්‌ඛාපදවණ්‌ණනා • 3. Pesuññasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. පෙසුඤ්‌ඤසික්‌ඛාපදවණ්‌ණනා • 3. Pesuññasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 3. පෙසුඤ්‌ඤසික්‌ඛාපදවණ්‌ණනා • 3. Pesuññasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. පෙසුඤ්‌ඤසික්‌ඛාපදං • 3. Pesuññasikkhāpadaṃ
