| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. တတိယပဏ္ဏာသကံ
3. Tatiyapaṇṇāsakaṃ
(၁၁) ၁. သမ္ဗောဓဝဂ္ဂော
(11) 1. Sambodhavaggo
၁. ပုဗ္ဗေဝသမ္ဗောဓသုတ္တဝဏ္ဏနာ
1. Pubbevasambodhasuttavaṇṇanā
၁၀၄. တတိယသ္သ ပဌမေ ပုဗ္ဗေဝ သမ္ဗောဓာတိ သမ္ဗောဓိတော ပုဗ္ဗေဝ, အရိယမဂ္ဂပ္ပတ္တိတော အပရဘာဂေယေဝာတိ ဝုတ္တံ ဟောတိ။ အနဘိသမ္ဗုဒ္ဓသ္သာတိ အပ္ပဋိဝိဒ္ဓစတုသစ္စသ္သ။ ဗောဓိသတ္တသ္သေဝ သတောတိ ဗုဇ္ဈနကသတ္တသ္သေဝ သတော, သမ္မာသမ္ဗောဓိံ အဓိဂန္တုံ အာရဘန္တသ္သေဝ သတော, သမ္ဗောဓိယာ ဝာ သတ္တသ္သေဝ လဂ္ဂသ္သေဝ သတော။ ဒီပင္ကရသ္သ ဟိ ဘဂဝတော ပာဒမူလေ အဋ္ဌဓမ္မသမောဓာနေန အဘိနီဟာရသမိဒ္ဓိတော ပဘုတိ တထာဂတော သမ္မာသမ္ဗောဓိံ သတ္တော လဂ္ဂော ‘‘ပတ္တဗ္ဗာ မယာ ဧသာ’’တိ တဒဓိဂမာယ ပရက္ကမံ အမုဉ္စန္တောယေဝ အာဂတော, တသ္မာ ဗောဓိသတ္တောတိ ဝုစ္စတိ။ ကော နု ခောတိ ကတမော နု ခော။ လောကောတိ သင္ခာရလောကော။ အသ္သာဒောတိ မဓုရာကာရော။ အာဒီနဝောတိ အနဘိနန္ဒိတဗ္ဗာကာရော။ တသ္သ မယ္ဟန္တိ တသ္သ ဧဝံ ဗောဓိသတ္တသ္သေဝ သတော မယ္ဟံ။ ဆန္ဒရာဂဝိနယော ဆန္ဒရာဂပ္ပဟာနန္တိ နိဗ္ဗာနံ အာဂမ္မ အာရဗ္ဘ ပဋိစ္စ ဆန္ဒရာဂော ဝိနယံ ဂစ္ဆတိ ပဟီယတိ, တသ္မာ နိဗ္ဗာနံ ‘‘ဆန္ဒရာဂဝိနယော ဆန္ဒရာဂပ္ပဟာန’’န္တိ ဝုစ္စတိ။ ဣဒံ လောကနိသ္သရဏန္တိ ဣဒံ နိဗ္ဗာနံ လောကတော နိသ္သဋတ္တာ လောကနိသ္သရဏန္တိ ဝုစ္စတိ။ ယာဝကီဝန္တိ ယတ္တကံ ပမာဏံ ကာလံ။ အဗ္ဘညာသိန္တိ အဘိဝိသိဋ္ဌေန အရိယမဂ္ဂဉာဏေန အညာသိံ။ ဉာဏဉ္စ ပန မေ ဒသ္သနန္တိ ဒ္ဝီဟိပိ ပဒေဟိ ပစ္စဝေက္ခဏဉာဏံ ဝုတ္တံ။ သေသမေတ္ထ ဥတ္တာနမေဝာတိ။
104. Tatiyassa paṭhame pubbeva sambodhāti sambodhito pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sato, sammāsambodhiṃ adhigantuṃ ārabhantasseva sato, sambodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato sammāsambodhiṃ satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Ko nu khoti katamo nu kho. Lokoti saṅkhāraloko. Assādoti madhurākāro. Ādīnavoti anabhinanditabbākāro. Tassa mayhanti tassa evaṃ bodhisattasseva sato mayhaṃ. Chandarāgavinayo chandarāgappahānanti nibbānaṃ āgamma ārabbha paṭicca chandarāgo vinayaṃ gacchati pahīyati, tasmā nibbānaṃ ‘‘chandarāgavinayo chandarāgappahāna’’nti vuccati. Idaṃ lokanissaraṇanti idaṃ nibbānaṃ lokato nissaṭattā lokanissaraṇanti vuccati. Yāvakīvanti yattakaṃ pamāṇaṃ kālaṃ. Abbhaññāsinti abhivisiṭṭhena ariyamaggañāṇena aññāsiṃ. Ñāṇañca pana me dassananti dvīhipi padehi paccavekkhaṇañāṇaṃ vuttaṃ. Sesamettha uttānamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ပုဗ္ဗေဝသမ္ဗောဓသုတ္တံ • 1. Pubbevasambodhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၃. ပုဗ္ဗေဝသမ္ဗောဓသုတ္တာဒိဝဏ္ဏနာ • 1-3. Pubbevasambodhasuttādivaṇṇanā
