| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
7. සබ්‍රහ්‌මකසුත්‌තං
7. Sabrahmakasuttaṃ
106. වුත්‌තඤ්‌හෙතං භගවතා, වුත්‌තමරහතාති මෙ සුතං –
106. Vuttañhetaṃ bhagavatā, vuttamarahatāti me sutaṃ –
‘‘සබ්‍රහ්‌මකානි, භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සපුබ්‌බදෙවතානි , භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සපුබ්‌බාචරියකානි, භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සාහුනෙය්‍යකානි, භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති.
‘‘Sabrahmakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbadevatāni , bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbācariyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sāhuneyyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti.
‘‘‘බ්‍රහ්‌මා’ති, භික්‌ඛවෙ, මාතාපිතූනං එතං අධිවචනං. ‘පුබ්‌බදෙවතා’ති, භික්‌ඛවෙ, මාතාපිතූනං එතං අධිවචනං. ‘පුබ්‌බාචරියා’ති, භික්‌ඛවෙ, මාතාපිතූනං එතං අධිවචනං. ‘ආහුනෙය්‍යා’ති, භික්‌ඛවෙ, මාතාපිතූනං එතං අධිවචනං. තං කිස්‌ස හෙතු? බහුකාරා, භික්‌ඛවෙ, මාතාපිතරො පුත්‌තානං ආපාදකා පොසකා ඉමස්‌ස ලොකස්‌ස දස්‌සෙතාරො’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘‘Brahmā’ti, bhikkhave, mātāpitūnaṃ etaṃ adhivacanaṃ. ‘Pubbadevatā’ti, bhikkhave, mātāpitūnaṃ etaṃ adhivacanaṃ. ‘Pubbācariyā’ti, bhikkhave, mātāpitūnaṃ etaṃ adhivacanaṃ. ‘Āhuneyyā’ti, bhikkhave, mātāpitūnaṃ etaṃ adhivacanaṃ. Taṃ kissa hetu? Bahukārā, bhikkhave, mātāpitaro puttānaṃ āpādakā posakā imassa lokassa dassetāro’’ti. Etamatthaṃ bhagavā avoca. Tatthetaṃ iti vuccati –
‘‘බ්‍රහ්‌මාති මාතාපිතරො, පුබ්‌බාචරියාති වුච්‌චරෙ;
‘‘Brahmāti mātāpitaro, pubbācariyāti vuccare;
ආහුනෙය්‍යා ච පුත්‌තානං, පජාය අනුකම්‌පකා.
Āhuneyyā ca puttānaṃ, pajāya anukampakā.
‘‘තස්‌මා හි නෙ නමස්‌සෙය්‍ය, සක්‌කරෙය්‍ය ච පණ්‌ඩිතො;
‘‘Tasmā hi ne namasseyya, sakkareyya ca paṇḍito;
අන්‌නෙන අථ පානෙන, වත්‌ථෙන සයනෙන ච;
Annena atha pānena, vatthena sayanena ca;
‘‘තාය නං පාරිචරියාය, මාතාපිතූසු පණ්‌ඩිතා;
‘‘Tāya naṃ pāricariyāya, mātāpitūsu paṇḍitā;
ඉධෙව නං පසංසන්‌ති, පෙච්‌ච සග්‌ගෙ පමොදතී’’ති.
Idheva naṃ pasaṃsanti, pecca sagge pamodatī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. සත්‌තමං.
Ayampi attho vutto bhagavatā, iti me sutanti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 7. සබ්‍රහ්‌මකසුත්‌තවණ්‌ණනා • 7. Sabrahmakasuttavaṇṇanā
