Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya |
౮. సద్ధసుత్తం
8. Saddhasuttaṃ
౩౮. ‘‘పఞ్చిమే , భిక్ఖవే, సద్ధే కులపుత్తే ఆనిసంసా. కతమే పఞ్చ? యే తే, భిక్ఖవే, లోకే సన్తో సప్పురిసా తే సద్ధఞ్ఞేవ పఠమం అనుకమ్పన్తా అనుకమ్పన్తి, నో తథా అస్సద్ధం; సద్ధఞ్ఞేవ పఠమం ఉపసఙ్కమన్తా ఉపసఙ్కమన్తి, నో తథా అస్సద్ధం; సద్ధఞ్ఞేవ పఠమం పటిగ్గణ్హన్తా పటిగ్గణ్హన్తి, నో తథా అస్సద్ధం; సద్ధఞ్ఞేవ పఠమం ధమ్మం దేసేన్తా దేసేన్తి, నో తథా అస్సద్ధం; సద్ధో కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ సద్ధే కులపుత్తే ఆనిసంసా.
38. ‘‘Pañcime , bhikkhave, saddhe kulaputte ānisaṃsā. Katame pañca? Ye te, bhikkhave, loke santo sappurisā te saddhaññeva paṭhamaṃ anukampantā anukampanti, no tathā assaddhaṃ; saddhaññeva paṭhamaṃ upasaṅkamantā upasaṅkamanti, no tathā assaddhaṃ; saddhaññeva paṭhamaṃ paṭiggaṇhantā paṭiggaṇhanti, no tathā assaddhaṃ; saddhaññeva paṭhamaṃ dhammaṃ desentā desenti, no tathā assaddhaṃ; saddho kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca saddhe kulaputte ānisaṃsā.
‘‘సేయ్యథాపి, భిక్ఖవే, సుభూమియం చతుమహాపథే మహానిగ్రోధో సమన్తా పక్ఖీనం పటిసరణం హోతి; ఏవమేవం ఖో, భిక్ఖవే, సద్ధో కులపుత్తో బహునో జనస్స పటిసరణం హోతి భిక్ఖూనం భిక్ఖునీనం ఉపాసకానం ఉపాసికాన’’న్తి.
‘‘Seyyathāpi, bhikkhave, subhūmiyaṃ catumahāpathe mahānigrodho samantā pakkhīnaṃ paṭisaraṇaṃ hoti; evamevaṃ kho, bhikkhave, saddho kulaputto bahuno janassa paṭisaraṇaṃ hoti bhikkhūnaṃ bhikkhunīnaṃ upāsakānaṃ upāsikāna’’nti.
మూలవా ఫలసమ్పన్నో, పతిట్ఠా హోతి పక్ఖినం.
Mūlavā phalasampanno, patiṭṭhā hoti pakkhinaṃ.
‘‘మనోరమే ఆయతనే, సేవన్తి నం విహఙ్గమా;
‘‘Manorame āyatane, sevanti naṃ vihaṅgamā;
‘‘తథేవ సీలసమ్పన్నం, సద్ధం పురిసపుగ్గలం;
‘‘Tatheva sīlasampannaṃ, saddhaṃ purisapuggalaṃ;
నివాతవుత్తిం అత్థద్ధం, సోరతం సఖిలం ముదుం.
Nivātavuttiṃ atthaddhaṃ, sorataṃ sakhilaṃ muduṃ.
‘‘వీతరాగా వీతదోసా, వీతమోహా అనాసవా;
‘‘Vītarāgā vītadosā, vītamohā anāsavā;
పుఞ్ఞక్ఖేత్తాని లోకస్మిం, సేవన్తి తాదిసం నరం.
Puññakkhettāni lokasmiṃ, sevanti tādisaṃ naraṃ.
‘‘తే తస్స ధమ్మం దేసేన్తి, సబ్బదుక్ఖాపనూదనం;
‘‘Te tassa dhammaṃ desenti, sabbadukkhāpanūdanaṃ;
యం సో ధమ్మం ఇధఞ్ఞాయ, పరినిబ్బాతి అనాసవో’’తి. అట్ఠమం;
Yaṃ so dhammaṃ idhaññāya, parinibbāti anāsavo’’ti. aṭṭhamaṃ;
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౮. సద్ధసుత్తవణ్ణనా • 8. Saddhasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౮. సద్ధసుత్తవణ్ణనా • 8. Saddhasuttavaṇṇanā