Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. သဂာထကသုတ္တံ
10. Sagāthakasuttaṃ
၁၆၆. သာဝတ္ထိယံ ဝိဟရတိ။ပေ.။ ‘‘ဒာရုဏော, ဘိက္ခဝေ, လာဘသက္ကာရသိလောကော။ပေ.။ အဓိဂမာယ။ ဣဓာဟံ, ဘိက္ခဝေ, ဧကစ္စံ ပုဂ္ဂလံ ပသ္သာမိ သက္ကာရေန အဘိဘူတံ ပရိယာဒိဏ္ဏစိတ္တံ, ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပန္နံ။ ဣဓ ပနာဟံ, ဘိက္ခဝေ , ဧကစ္စံ ပုဂ္ဂလံ ပသ္သာမိ အသက္ကာရေန အဘိဘူတံ ပရိယာဒိဏ္ဏစိတ္တံ, ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပန္နံ။ ဣဓ ပနာဟံ, ဘိက္ခဝေ, ဧကစ္စံ ပုဂ္ဂလံ ပသ္သာမိ သက္ကာရေန စ အသက္ကာရေန စ တဒုဘယေန အဘိဘူတံ ပရိယာဒိဏ္ဏစိတ္တံ, ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပန္နံ။ ဧဝံ ဒာရုဏော ခော, ဘိက္ခဝေ, လာဘသက္ကာရသိလောကော။ပေ.။ ဧဝဉ္ဟိ ဝော, ဘိက္ခဝေ, သိက္ခိတဗ္ဗ’’န္တိ။
166. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko…pe… adhigamāya. Idhāhaṃ, bhikkhave, ekaccaṃ puggalaṃ passāmi sakkārena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ, bhikkhave , ekaccaṃ puggalaṃ passāmi asakkārena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ, bhikkhave, ekaccaṃ puggalaṃ passāmi sakkārena ca asakkārena ca tadubhayena abhibhūtaṃ pariyādiṇṇacittaṃ, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti.
ဣဒမဝောစ ဘဂဝာ။ ဣဒံ ဝတ္ဝာန သုဂတော အထာပရံ ဧတဒဝောစ သတ္ထာ –
Idamavoca bhagavā. Idaṃ vatvāna sugato athāparaṃ etadavoca satthā –
‘‘ယသ္သ သက္ကရိယမာနသ္သ၊ အသက္ကာရေန စူဘယံ။
‘‘Yassa sakkariyamānassa, asakkārena cūbhayaṃ;
‘‘တံ ဈာယိနံ သာတတိကံ၊ သုခုမံ ဒိဋ္ဌိဝိပသ္သကံ။
‘‘Taṃ jhāyinaṃ sātatikaṃ, sukhumaṃ diṭṭhivipassakaṃ;
ဥပာဒာနက္ခယာရာမံ၊ အာဟု သပ္ပုရိသော ဣတီ’’တိ။ ဒသမံ။
Upādānakkhayārāmaṃ, āhu sappuriso itī’’ti. dasamaṃ;
ပဌမော ဝဂ္ဂော။
Paṭhamo vaggo.
တသ္သုဒ္ဒာနံ –
Tassuddānaṃ –
ဒာရုဏော ဗဠိသံ ကုမ္မံ၊ ဒီဃလောမိ စ မီဠ္ဟကံ။
Dāruṇo baḷisaṃ kummaṃ, dīghalomi ca mīḷhakaṃ;
အသနိ ဒိဒ္ဓံ သိင္ဂာလံ၊ ဝေရမ္ဘေန သဂာထကန္တိ။
Asani diddhaṃ siṅgālaṃ, verambhena sagāthakanti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. သဂာထကသုတ္တဝဏ္ဏနာ • 10. Sagāthakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. သဂာထကသုတ္တဝဏ္ဏနာ • 10. Sagāthakasuttavaṇṇanā