| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
(9) 4. සමණවග්‌ගො
(9) 4. Samaṇavaggo
1-5. සමණසුත්‌තාදිවණ්‌ණනා
1-5. Samaṇasuttādivaṇṇanā
82-86. චතුත්‌ථස්‌ස පඨමෙ සම්‌මා ආදානං ගහණං සමාදානන්‌ති ආහ ‘‘සමාදානං වුච්‌චති ගහණ’’න්‌ති. අධිකං විසිට්‌ඨං සීලන්‌ති අධිසීලං. ලොකියසීලස්‌ස අධිසීලභාවො පරියායෙනාති නිප්‌පරියායමෙව තං දස්‌සෙතුං ‘‘අපිච සබ්‌බම්‌පි ලොකියසීල’’න්‌තිආදි වුත්‌තං. සික්‌ඛිතබ්‌බතොති ආසෙවිතබ්‌බතො. පඤ්‌චපි දසපි වා සීලානි සීලං නාම, පාතිමොක්‌ඛසංවරො අධිසීලං නාම අනවසෙසකායිකචෙතසිකසංවරභාවතො මග්‌ගසීලස්‌ස පදට්‌ඨානභාවතො ච. අට්‌ඨ සමාපත්‌තියො චිත්‌තං, විපස්‌සනාපාදකජ්‌ඣානං අධිචිත්‌තං මග්‌ගසමාධිස්‌ස අධිට්‌ඨානභාවතො. කම්‌මස්‌සකතඤාණං පඤ්‌ඤා, විපස්‌සනා අධිපඤ්‌ඤා මග්‌ගපඤ්‌ඤාය අධිට්‌ඨානභාවතො. අපිච නිබ්‌බානං පත්‌ථයන්‌තෙන සමාදින්‌නං පඤ්‌චසීලං දසසීලම්‌පි අධිසීලමෙව නිබ්‌බානාධිගමස්‌ස පච්‌චයභාවතො. නිබ්‌බානං පත්‌ථයන්‌තෙන සමාපන්‌නා අට්‌ඨ සමාපත්‌තියොපි අධිචිත්‌තමෙව.
82-86. Catutthassa paṭhame sammā ādānaṃ gahaṇaṃ samādānanti āha ‘‘samādānaṃ vuccati gahaṇa’’nti. Adhikaṃ visiṭṭhaṃ sīlanti adhisīlaṃ. Lokiyasīlassa adhisīlabhāvo pariyāyenāti nippariyāyameva taṃ dassetuṃ ‘‘apica sabbampi lokiyasīla’’ntiādi vuttaṃ. Sikkhitabbatoti āsevitabbato. Pañcapi dasapi vā sīlāni sīlaṃ nāma, pātimokkhasaṃvaro adhisīlaṃ nāma anavasesakāyikacetasikasaṃvarabhāvato maggasīlassa padaṭṭhānabhāvato ca. Aṭṭha samāpattiyo cittaṃ, vipassanāpādakajjhānaṃ adhicittaṃ maggasamādhissa adhiṭṭhānabhāvato. Kammassakatañāṇaṃ paññā, vipassanā adhipaññā maggapaññāya adhiṭṭhānabhāvato. Apica nibbānaṃ patthayantena samādinnaṃ pañcasīlaṃ dasasīlampi adhisīlameva nibbānādhigamassa paccayabhāvato. Nibbānaṃ patthayantena samāpannā aṭṭha samāpattiyopi adhicittameva.
‘‘කල්‍යාණකාරී කල්‍යාණං, පාපකාරී ච පාපකං;
‘‘Kalyāṇakārī kalyāṇaṃ, pāpakārī ca pāpakaṃ;
අනුභොති ද්‌වයමෙතං, අනුබන්‌ධඤ්‌හි කාරණ’’න්‌ති. –
Anubhoti dvayametaṃ, anubandhañhi kāraṇa’’nti. –
එවං අතීතෙ අනාගතෙ ච වට්‌ටමූලකදුක්‌ඛසල්‌ලක්‌ඛණවසෙන සංවෙගවත්‌ථුතාය විමුත්‌තිආකඞ්‌ඛාය පච්‌චයභූතා කම්‌මස්‌සකතපඤ්‌ඤාපි අධිපඤ්‌ඤාති වදන්‌ති. දුතියතතියචතුත්‌ථපඤ්‌චමානි උත්‌තානත්‌ථානෙව.
Evaṃ atīte anāgate ca vaṭṭamūlakadukkhasallakkhaṇavasena saṃvegavatthutāya vimuttiākaṅkhāya paccayabhūtā kammassakatapaññāpi adhipaññāti vadanti. Dutiyatatiyacatutthapañcamāni uttānatthāneva.
සමණසුත්‌තාදිවණ්‌ණනා නිට්‌ඨිතා.
Samaṇasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. සමණසුත්‌තං • 1. Samaṇasuttaṃ
2. ගද්‍රභසුත්‌තං • 2. Gadrabhasuttaṃ
3. ඛෙත්‌තසුත්‌තං • 3. Khettasuttaṃ
4. වජ්‌ජිපුත්‌තසුත්‌තං • 4. Vajjiputtasuttaṃ
5. සෙක්‌ඛසුත්‌තං • 5. Sekkhasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
1. සමණසුත්‌තවණ්‌ණනා • 1. Samaṇasuttavaṇṇanā
2. ගද්‍රභසුත්‌තවණ්‌ණනා • 2. Gadrabhasuttavaṇṇanā
3. ඛෙත්‌තසුත්‌තවණ්‌ණනා • 3. Khettasuttavaṇṇanā
4. වජ්‌ජිපුත්‌තසුත්‌තවණ්‌ණනා • 4. Vajjiputtasuttavaṇṇanā
5. සෙක්‌ඛසුත්‌තවණ්‌ණනා • 5. Sekkhasuttavaṇṇanā
