| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. သာမဏ္ဍကသံယုတ္တံ
5. Sāmaṇḍakasaṃyuttaṃ
၁. သာမဏ္ဍကသုတ္တံ
1. Sāmaṇḍakasuttaṃ
၃၃၀. ဧကံ သမယံ အာယသ္မာ သာရိပုတ္တော ဝဇ္ဇီသု ဝိဟရတိ ဥက္ကစေလာယံ ဂင္ဂာယ နဒိယာ တီရေ။ အထ ခော သာမဏ္ဍကော 1 ပရိဗ္ဗာဇကော ယေနာယသ္မာ သာရိပုတ္တော တေနုပသင္ကမိ; ဥပသင္ကမိတ္ဝာ အာယသ္မတာ သာရိပုတ္တေန သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော သာမဏ္ဍကော ပရိဗ္ဗာဇကော အာယသ္မန္တံ သာရိပုတ္တံ ဧတဒဝောစ –
330. Ekaṃ samayaṃ āyasmā sāriputto vajjīsu viharati ukkacelāyaṃ gaṅgāya nadiyā tīre. Atha kho sāmaṇḍako 2 paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍako paribbājako āyasmantaṃ sāriputtaṃ etadavoca –
‘‘‘နိဗ္ဗာနံ, နိဗ္ဗာန’န္တိ, အာဝုသော သာရိပုတ္တ, ဝုစ္စတိ။ ကတမံ နု ခော, အာဝုသော, နိဗ္ဗာန’’န္တိ? ‘‘ယော ခော, အာဝုသော, ရာဂက္ခယော ဒောသက္ခယော မောဟက္ခယော – ဣဒံ ဝုစ္စတိ နိဗ္ဗာန’’န္တိ။ ‘‘အတ္ထိ ပနာဝုသော, မဂ္ဂော အတ္ထိ ပဋိပဒာ, ဧတသ္သ နိဗ္ဗာနသ္သ သစ္ဆိကိရိယာယာ’’တိ? ‘‘အတ္ထိ ခော, အာဝုသော, မဂ္ဂော အတ္ထိ ပဋိပဒာ, ဧတသ္သ နိဗ္ဗာနသ္သ သစ္ဆိကိရိယာယာ’’တိ။
‘‘‘Nibbānaṃ, nibbāna’nti, āvuso sāriputta, vuccati. Katamaṃ nu kho, āvuso, nibbāna’’nti? ‘‘Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti. ‘‘Atthi panāvuso, maggo atthi paṭipadā, etassa nibbānassa sacchikiriyāyā’’ti? ‘‘Atthi kho, āvuso, maggo atthi paṭipadā, etassa nibbānassa sacchikiriyāyā’’ti.
‘‘ကတမော ပနာဝုသော, မဂ္ဂော ကတမာ ပဋိပဒာ ဧတသ္သ နိဗ္ဗာနသ္သ သစ္ဆိကိရိယာယာ’’တိ? ‘‘အယမေဝ ခော, အာဝုသော, အရိယော အဋ္ဌင္ဂိကော မဂ္ဂော, ဧတသ္သ နိဗ္ဗာနသ္သ သစ္ဆိကိရိယာယ, သေယ္ယထိဒံ – သမ္မာဒိဋ္ဌိ သမ္မာသင္ကပ္ပော သမ္မာဝာစာ သမ္မာကမ္မန္တော သမ္မာအာဇီဝော သမ္မာဝာယာမော သမ္မာသတိ သမ္မာသမာဓိ။ အယံ ခော, အာဝုသော, မဂ္ဂော အယံ ပဋိပဒာ, ဧတသ္သ နိဗ္ဗာနသ္သ သစ္ဆိကိရိယာယာ’’တိ။ ‘‘ဘဒ္ဒကော, အာဝုသော, မဂ္ဂော ဘဒ္ဒိကာ ပဋိပဒာ, ဧတသ္သ နိဗ္ဗာနသ္သ သစ္ဆိကိရိယာယ။ အလဉ္စ ပနာဝုသော သာရိပုတ္တ, အပ္ပမာဒာယာ’’တိ။ ပဌမံ။
‘‘Katamo panāvuso, maggo katamā paṭipadā etassa nibbānassa sacchikiriyāyā’’ti? ‘‘Ayameva kho, āvuso, ariyo aṭṭhaṅgiko maggo, etassa nibbānassa sacchikiriyāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etassa nibbānassa sacchikiriyāyā’’ti. ‘‘Bhaddako, āvuso, maggo bhaddikā paṭipadā, etassa nibbānassa sacchikiriyāya. Alañca panāvuso sāriputta, appamādāyā’’ti. Paṭhamaṃ.
(ယထာ ဇမ္ဗုခာဒကသံယုတ္တံ, တထာ ဝိတ္ထာရေတဗ္ဗံ)။
(Yathā jambukhādakasaṃyuttaṃ, tathā vitthāretabbaṃ).
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. သာမဏ္ဍကသံယုတ္တဝဏ္ဏနာ • 5. Sāmaṇḍakasaṃyuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. သာမဏ္ဍကသံယုတ္တဝဏ္ဏနာ • 5. Sāmaṇḍakasaṃyuttavaṇṇanā
