| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. သမိဒ္ဓိသုတ္တံ
2. Samiddhisuttaṃ
၁၅၈. ဧကံ သမယံ ဘဂဝာ သက္ကေသု ဝိဟရတိ သိလာဝတိယံ။ တေန ခော ပန သမယေန အာယသ္မာ သမိဒ္ဓိ ဘဂဝတော အဝိဒူရေ အပ္ပမတ္တော အာတာပီ ပဟိတတ္တော ဝိဟရတိ။ အထ ခော အာယသ္မတော သမိဒ္ဓိသ္သ ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘‘လာဘာ ဝတ မေ, သုလဒ္ဓံ ဝတ မေ, ယသ္သ မေ သတ္ထာ အရဟံ သမ္မာသမ္ဗုဒ္ဓော။ လာဘာ ဝတ မေ, သုလဒ္ဓံ ဝတ မေ, ယ္ဝာဟံ ဧဝံ သ္ဝာက္ခာတေ ဓမ္မဝိနယေ ပဗ္ဗဇိတော။ လာဘာ ဝတ မေ, သုလဒ္ဓံ ဝတ မေ, ယသ္သ မေ သဗ္ရဟ္မစာရိနော သီလဝန္တော ကလ္ယာဏဓမ္မာ’’တိ။ အထ ခော မာရော ပာပိမာ အာယသ္မတော သမိဒ္ဓိသ္သ စေတသာ စေတောပရိဝိတက္ကမညာယ ယေနာယသ္မာ သမိဒ္ဓိ တေနုပသင္ကမိ; ဥပသင္ကမိတ္ဝာ အာယသ္မတော သမိဒ္ဓိသ္သ အဝိဒူရေ မဟန္တံ ဘယဘေရဝံ သဒ္ဒမကာသိ, အပိသ္သုဒံ ပထဝီ မညေ ဥန္ဒ္ရီယတိ။
158. Ekaṃ samayaṃ bhagavā sakkesu viharati silāvatiyaṃ. Tena kho pana samayena āyasmā samiddhi bhagavato avidūre appamatto ātāpī pahitatto viharati. Atha kho āyasmato samiddhissa rahogatassa paṭisallīnassa evaṃ cetaso parivitakko udapādi – ‘‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’’ti. Atha kho māro pāpimā āyasmato samiddhissa cetasā cetoparivitakkamaññāya yenāyasmā samiddhi tenupasaṅkami; upasaṅkamitvā āyasmato samiddhissa avidūre mahantaṃ bhayabheravaṃ saddamakāsi, apissudaṃ pathavī maññe undrīyati.
အထ ခော အာယသ္မာ သမိဒ္ဓိ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော အာယသ္မာ သမိဒ္ဓိ ဘဂဝန္တံ ဧတဒဝောစ – ‘‘ဣဓာဟံ, ဘန္တေ, ဘဂဝတော အဝိဒူရေ အပ္ပမတ္တော အာတာပီ ပဟိတတ္တော ဝိဟရာမိ။ တသ္သ မယ္ဟံ, ဘန္တေ, ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘လာဘာ ဝတ မေ, သုလဒ္ဓံ ဝတ မေ, ယသ္သ မေ သတ္ထာ အရဟံ သမ္မာသမ္ဗုဒ္ဓော။ လာဘာ ဝတ မေ, သုလဒ္ဓံ ဝတ မေ, ယ္ဝာဟံ ဧဝံ သ္ဝာက္ခာတေ ဓမ္မဝိနယေ ပဗ္ဗဇိတော။ လာဘာ ဝတ မေ, သုလဒ္ဓံ ဝတ မေ, ယသ္သ မေ သဗ္ရဟ္မစာရိနော သီလဝန္တော ကလ္ယာဏဓမ္မာ’တိ။ တသ္သ မယ္ဟံ, ဘန္တေ, အဝိဒူရေ မဟာဘယဘေရဝသဒ္ဒော အဟောသိ, အပိသ္သုဒံ ပထဝီ မညေ ဥန္ဒ္ရီယတီ’’တိ။
Atha kho āyasmā samiddhi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno āyasmā samiddhi bhagavantaṃ etadavoca – ‘‘idhāhaṃ, bhante, bhagavato avidūre appamatto ātāpī pahitatto viharāmi. Tassa mayhaṃ, bhante, rahogatassa paṭisallīnassa evaṃ cetaso parivitakko udapādi – ‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’ti. Tassa mayhaṃ, bhante, avidūre mahābhayabheravasaddo ahosi, apissudaṃ pathavī maññe undrīyatī’’ti.
‘‘နေသာ, သမိဒ္ဓိ, ပထဝီ ဥန္ဒ္ရီယတိ။ မာရော ဧသော ပာပိမာ တုယ္ဟံ ဝိစက္ခုကမ္မာယ အာဂတော။ ဂစ္ဆ တ္ဝံ, သမိဒ္ဓိ, တတ္ထေဝ အပ္ပမတ္တော အာတာပီ ပဟိတတ္တော ဝိဟရာဟီ’’တိ။ ‘‘ဧဝံ, ဘန္တေ’’တိ ခော အာယသ္မာ သမိဒ္ဓိ ဘဂဝတော ပဋိသ္သုတ္ဝာ ဥဋ္ဌာယာသနာ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ ပက္ကာမိ။ ဒုတိယမ္ပိ ခော အာယသ္မာ သမိဒ္ဓိ တတ္ထေဝ အပ္ပမတ္တော အာတာပီ ပဟိတတ္တော ဝိဟာသိ။ ဒုတိယမ္ပိ ခော အာယသ္မတော သမိဒ္ဓိသ္သ ရဟောဂတသ္သ ပဋိသလ္လီနသ္သ။ပေ.။ ဒုတိယမ္ပိ ခော မာရော ပာပိမာ အာယသ္မတော သမိဒ္ဓိသ္သ စေတသာ စေတောပရိဝိတက္ကမညာယ။ပေ.။ အပိသ္သုဒံ ပထဝီ မညေ ဥန္ဒ္ရီယတိ။ အထ ခော အာယသ္မာ သမိဒ္ဓိ မာရံ ပာပိမန္တံ ဂာထာယ အဇ္ဈဘာသိ –
‘‘Nesā, samiddhi, pathavī undrīyati. Māro eso pāpimā tuyhaṃ vicakkhukammāya āgato. Gaccha tvaṃ, samiddhi, tattheva appamatto ātāpī pahitatto viharāhī’’ti. ‘‘Evaṃ, bhante’’ti kho āyasmā samiddhi bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Dutiyampi kho āyasmā samiddhi tattheva appamatto ātāpī pahitatto vihāsi. Dutiyampi kho āyasmato samiddhissa rahogatassa paṭisallīnassa…pe… dutiyampi kho māro pāpimā āyasmato samiddhissa cetasā cetoparivitakkamaññāya…pe… apissudaṃ pathavī maññe undrīyati. Atha kho āyasmā samiddhi māraṃ pāpimantaṃ gāthāya ajjhabhāsi –
‘‘သဒ္ဓာယာဟံ ပဗ္ဗဇိတော၊ အဂာရသ္မာ အနဂာရိယံ။
‘‘Saddhāyāhaṃ pabbajito, agārasmā anagāriyaṃ;
သတိ ပညာ စ မေ ဗုဒ္ဓာ၊ စိတ္တဉ္စ သုသမာဟိတံ။
Sati paññā ca me buddhā, cittañca susamāhitaṃ;
ကာမံ ကရသ္သု ရူပာနိ၊ နေဝ မံ ဗ္ယာဓယိသ္သသီ’’တိ။
Kāmaṃ karassu rūpāni, neva maṃ byādhayissasī’’ti.
အထ ခော မာရော ပာပိမာ ‘‘ဇာနာတိ မံ သမိဒ္ဓိ ဘိက္ခူ’’တိ ဒုက္ခီ ဒုမ္မနော တတ္ထေဝန္တရဓာယီတိ။
Atha kho māro pāpimā ‘‘jānāti maṃ samiddhi bhikkhū’’ti dukkhī dummano tatthevantaradhāyīti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. သမိဒ္ဓိသုတ္တဝဏ္ဏနာ • 2. Samiddhisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. သမိဒ္ဓိသုတ္တဝဏ္ဏနာ • 2. Samiddhisuttavaṇṇanā
